3
Alam uma ngilin hahalosoi,
taraha alam u taatagi koru raiou limiou.
Na lam e hakats has nem alam gona ka buia tara taun i Atens.
2 Ba tara markato tala teka ba lam e tula namula e Timoti a hahatoulana i tarara te kui gono mera noulam tara toukui te habulungana menari u Bulungana u Niga tere Kristo.
Nonei e la silela tegona hatagala meraien limiou na tegona kato hatagala menien u nihamana i tamilimiou.
3 Ba u katuun te omi ra riou limiou tema tatei hamatout rari limiou.
Alimiou e atei silemiou a ka a omi teka e tatei butuna i tarara,
u katuun te hamana ria tere Kristo.
4 U mana koru,
a pöata tu ka gono meraia lam alimiou i manasa,
alam u hatei mam railimiou tego lu merai ra a kamits.
Ba nonei e mar butu hamana has uana ti mar atei uaiam limiou.
5 Ba tara markato teka,
alam uma antunan hahaloso leli,
ba lam e tula namula e Timoti egona sakesake te popo hamanasana u nihamana i tamilimiou.
Alia u toku sil korui e Satan e namots kato homi ranou limiou ba toukui i tamulam te lala pukuna.
U hahatei tere Timoti e hatagali e Pol
6 E Timoti e tuku poutsia i tamulam te laba mera meien limiou.
Nonei e piou nema u bulungana u niga te hamana hatagala noahas uami limiou tara Tsunono bate hiangilngil noa hasmiou.
Na nonei e hatei has railam alimiou ema solopala rami lam,
kaba limiou e ngilin tara koru ramou lam temar ngilin tara koru has merami lam alimiou.
7 Pöata tu hengo nai lam u ranga teka,
ba torimulam e nigana me sasaala poutsuna.
Alam u tori tiama koru mei a kamits te lue mulam turu katuun te hahamanar,
kaba lam e sasaala pouts talam te hengo mena milam te hamana noa uami limiou tara Tsunono.
8 Na te kato nitöa uamou limiou teka,
ba torimulam te niga nitöa hasi nou.
9 Na pöata te singo bera mia lam alimiou tere Sunahan,
alam e haniga koru uaiem tere Sunahan te kato hasasaala koru mera milimiou alam.
10 Na lam e roron singo hatagala korum tara lan na bong tego tatei tara menai lam a peisa milimiou na tego taguhu merai lam alimiou tara pöata te lagi hamana mia limiou.
11 Alam e ngilem e Tamarara e Sunahan na Tsunono i tarara e Iesu egi hala pouts merai lam i tamilimiou.
12 Na lam e ngil hasem a Tsunono ega kato raiou limiou balimiou te hiangilngil hatagalamiou bate ngil hatagala has ramiou u katuun hoboto,
bate kato talasina.
Na lam e ngil hasem alimiou go mar ngil koru merami a palair u katuun temar ngil koru has mera milam alimiou.
13 Taraha,
a Tsunono e ngilena a torimilimiou ega gogoso nega matsköia i matana e Tamarara e Sunahan,
tara pöata tena la pouts nama romana a Tsunono i tarara e Iesu na u katuun hoboto i tanen.