A toukui tere Pol i Tesalonaika
2
Alam e hatei ramou limiou a matsi hahatoulana,
alimiou e atei silemiou alam u ma mastein la uamei i tamilimiou.
2 Alimiou e atei miou,
nori i kato homi raia lam tara taun i Pilipai.
Kaba e Sunahan e kato ha ongolo raioulam ba lam e la noahas uaiem i tamilimiou mena hatei rami limiou u Bulungana u Niga tere Sunahan,
noahasina ti hapiou u katuun u parpara.
3 Alam ema katoemi u ranga te katoeier u katuun u omi na u gamogamo.
E möa.
Na lam ema hakats homi mi nema gamo has rami u katuun.
E möa.
4 E Sunahan e hala railam u hanhaniga tego rarare mei lam u Bulungana u Niga,
na nonei e torohana raiou lam,
tego matskö nitöa uu a torimulam tsi e möa,
ba lam tema rarare uami temar ngil uaier u katuun.
E möa.
Alam e mar rarare uam te ngil uana e Sunahan.
5 Alimiou e atei silemiou alam uma mala angoso railimiou,
na e Sunahan e atei sil hasena a torimulam ema ngile nei ta ka.
6 Alam ema kui silemi a solo pan te aposol uamulam.
E möa.
Alam ema ngilemi alimiou go hapan ramou lam na lam ema ngil hasemi a tana katuun ega hapan raiou lam.
E möa.
7 Alam u tuatami gono meraiou limiou,
te kato uana a tahol te tuatami gono merena a galapien i tanen.
8 Alam u ngil koru raiou limiou bate hala rami limiou u Bulungana u Niga tere Sunahan.
Na lam uma peits ba railimiou ta töa taka i tamulam,
na peisamulam has,
taraha alimiou a matsomi i tamulam.
9 A matsi hahatoulana,
hakats kap naiam alam i kuin moni hatagala koru mei a lan na bong.
Alam uma ngilin hala railimiou ta nitiama tara pöata tu habulungana nailam u Bulungana U Niga tere Kristo i tamilimiou.
10 Alimiou na e Sunahan has,
alimiou u tareiam alam u kato haniga na u kato hamatskö tara pöata tu ka gono meraia lam alimiou.
Alam uma katoei taka ta omi.
11-12 Alam u ranga meraiou limiou temar ranga mena nei a katuun a galapien i tanen.
Alam u tahul raiou limiou a man tötöa na lam u ranga hatagala gono meraiou limiou tego kato mena milimiou a markato te kato hasasaalena e Sunahan.
Taraha,
nonei e ngö ranou limiou tara Nipepeito i tanen ba limiou te tatei atei silemiou a nitsunono pan i tanen.
13 Na tana ka has te roron haniga sile mia lam tere Sunahan.
Pöata tu piou naia lam u raranga tere Sunahan i tamilimiou,
alimiou u ma poeiemi nonei u raranga tara katuun tuun lasi.
E möa.
Alimiou u hanige men bate hamanemiou nonei u raranga hamana tere Sunahan.
Na u raranga i tanen e kato haniga ranou limiou te hamana mena mien limiou.
14 A ka te butuia i tamilimiou e butu hasia turu Jiu te hamana uaier tere Kristo.
U Jiu i kato homir u katuun i Judia te hamana uar tere Iesu Kristo,
na u katuun pouts has i tamilimiou e kato has uar iesana i tamilimiou.
15 U Jiu i atung hamatir u propet tere Sunahan i manasa,
na nori i atung hamate hasi e Iesu a Tsunono.
Na nori i kato homi has raioulam bate tsuga rariou lam.
Nori e kato haraharaha koruer e Sunahan na nori e omi rer u katuun hoboto.
16 Taraha,
nori e hapiou rariou lam tegoma hatei menai lam u raranga tere Sunahan turu katuun halhal turu Jiu na tegoma lu pouts meraien e Sunahan.
Nori u Jiu e kato homi nitöar,
ti roron kato uaien.
Kaba e Sunahan e hahuna tala ranouen romana.
E Pol e ngilin la pouts lel uu i Tesalonaika
17 A matsi hahatoulana,
alam u laba ramou limiou a tsitabubun pöata puku,
kaba a torimulam e matesil koruena tegona tara pouts merai lam,
alimiou.
Alam e kagono mera mou limiou i torimulam na turu hakats i tamulam kaba lam e ngilin tuol koru mia i matamilimiou bate tara ramou limiou.
18 Alia e Pol u ngil korui tego la uu lam i tamilimiou,
kaba e Satan e roron hatu kap raiou lam.
19 Alam u ngilin na tara raiou limiou,
taraha a nihamana i tamilimiou tere Iesu e kato hasasaala raiou lam.
Pöata te la pouts nama romana e Iesu a Tsunono,
alam e haröto ramoua limiou i tanen.
A ka teka e here noi a hihol i tamulam.
Nonei a ka teka te roron kato sile mulam.
20 Aa,
alimiou te kato hasasaala koru ramou lam.