U tuenrei e ka mena a mamana makum te kui hobotona
4
Alia e Pol,
alia e karabus silegu te kui menagi lia a toukui tara Tsunono.
Na e Sunahan e hopö kap raiou limiou tego katuun uaiam limiou i tanen.
Na lia e hatei ragou limiou ego marka uaiam temar ngil uana e Sunahan.
2 Alimiou go hatetenei iam a peisa milimiou tara mamana pöata na limiou go ranga hatami hasiam bate niga mia tara tana katuun.
Alimiou go hiangilngil iam batema hakats sil balemi a manka man omi tara tana katuun.
3 Alimiou go torohana hatagala iam tego pile kap hoboto mena milimiou u töa u hakats te hala nema u Namnamei tere Sunahan,
ba limiou te ka haniga hobotomiou.
4 E ka mena u töa u tuenrei na u töa u namnamei,
na e Sunahan e ngö sil has railimiou tego hahaloso mena milimiou a töa ka a niga tena la nama i murimuri.
5-6 E ka mena a töa Tsunono na u töa u nihamana na töa a baptais na töa Sunahan,
nonei e Tamarara hoboto.
Nonei e ka seina i tarara hoboto na nonei e kui silana i tarara hoboto na nonei e kana iaharara hoboto.
7 E Kristo e hala puku nema a man töa man nitagala tara man töa man katuun i tarara e popona tara man nitagala man kapan te ngilin hala nen turu katuun i tanen.
8 Na u Buku u Göagono e mar ranga uana teka:
“Pöata te la uen iasa
ba nonei e la gono merena u karabus,
me hala nena a man nitagala turu katuun i tanen.”
9 Na ime temar mouna uana a makumun ranga teka,
“te la uaien iasa”?
U raranga teka e mar mouna uana nonei has te la tutuun mam koru uama i puta.
10 Nonei a katuun te la uama i puta na nonei has te la uu iasa koru tara mamana makum hoboto i kolö.
Nonei e kato sile ii a ka teka tego ka uen tara mamanaka hoboto tara mamana makum.
11 Na nonei e hala nema a man nitagala teka turu katuun:
a palai i hala ramei a nitagalana tara aposol,
na palai a nitagalana tara propet,
na palai a nitagalana tara tson hahabulungana,
na palai a nitagalana tara tsonun halotu na tson hihatuts.
12 Nonei e kato silei a ka teka tego taguhu meraien u katuun tere Sunahan ba nori te kui beren.
Na tegi kato hatagala menaien u tuenrei tere Kristo a bate panina.
13 Na toukui teka e la lasnou e antunana tara pöata tena hamana hoboto rouara bate ka mera u töa u nihamana.
E antunanoa tara pöata tena atei sil haniga hobote rouara a Pien Tson tere Sunahan bate here nei a töa a niatei.
Ba ra tena butu here roi a katuun te ka mena u nihamana na markato a niga a tangoho,
te markato uana e Kristo.
14 Ba i murimuri bara tema here lele roi a galapien.
Taraha,
a galapien e hamana ria tara man hihatuts turu katuun u gamogamo hoboto te butu rima,
u katuun te gamo raren ba nori te katoeier a man markato a man omi.
Esi te hengo ranen bate hula hakatsina e here nei a ka te hula hapouseina i tasi,
tsi a ka te söatena a lomolomo bate hula tapana.
Kaba ara gima markato uai tara katuun teka.
15 Aragi hiangilngil bate ranga nera a ka te manana.
E kato uana teka ba ra te pan susul rou bate here roi e Kristo,
a kapan turu katuun i tanen.
Nonei e here nei u baku te hakuiena u tuenrei hoboto.
16 A luta tara spana e harokoto hatagala hobotena a mamana makum turu tuenrei.
Na pöata te kui haniga hobotona a mamana makum,
ba u tuenrei hoboto te pan hanigana.
Ara u katuun tere Kristo e here hase rei a man makum turu tuenrei.
Na ragi hiangilngil bate hiatagtaguhura ba u nihamana i tarara te pan susuluna.
I me tegi marka uu ra
17 Na tara solona a Tsunono alia e hatei ragi limiou a ka teka,
na lia e ranga hatagala koru nagien i tamilimiou.
Alimiou goma marka lel uami te markato uaier u katuun tema hamanari.
18 Nori e ka halehana ba ner a nitöatöa tere Sunahan.
Na bakuren e kuhilina na e kamer u tori u omi,
taraha,
nori e hipus korur bate kato hatutueier u hakats i taren.
19 Nori i möa lel ta nimatsingolo i taren,
na e tsikolo pinopino tunur.
Na nori e tagala sil korueier tegi kato menaien a mamana markato a omi.
20 Kaba e Kristo ema mar hatuts merai limiou teka.
21 Alimiou u hengo hanigeiam u raranga u mana tere Iesu,
na limiou e atei sil hasemiou a manka a man mana te hatuts raien limiou.
22 Na limiou go ba neiam u ngilngilina i puta i tamilimiou.
U ngilngil teka e kana tara nikaka mam i tamilimiou na nonei e kato homi susul ranou limiou.
23 Na torimilimiou na u hakhakats i tamilimiou egi hatsimus pouts nitöani.
24 Na limiou go marka uaiam temar ngil uana e Sunahan,
na markato i tamilimiou ega matskö bate göagonona.
25 Alimiou go hanöa ba neiam a markatona turu gamo bate ranga namiou a ka te manana tara tana katuun,
taraha ara hoboto e pala uara tara hun katuun tere Kristo.
26 Te raharaha mia limiou,
haka ba neiam a raharaha.
Ena mots kato ranou limiou ba limiou te kato homi miou.
Alimiou go hakapeiam a raharaha i mam te tsiruku na a pitala.
27 Alimiou ena mots kui bemi e Satan a maroro.
28 A katuun a kopkop ega hanöa ban a tou kop bate tanian kuina.
Nonei ega kuin a limanen peisa,
ba nonei te ka menou a mamanaka bate taguhu hasena a katuun te moana ta ka.
29 Alimiou goma ranga nami u ranga u omi.
Kaba limiou go katoeiam u raranga u niga tega taguhi a katuun te ranga gono memi limiou,
bate kato hasasaale nen.
30 Alimiou goma kato hataatagemi u Namnamei u Göagono tere Sunahan,
taraha nonei a hatöatongo tere Sunahan te haröto nena te hanöa ba mena milimiou romana a manka man omi hoboto.
31 Alimiou go ba neiam u mar hakats te ka nitöa menami limiou a raharaha.
Na limiou goma si koru has mi.
Na ego möa lel has ta hiaraharaha na ta hiangenngena na tu hamal.
Alimiou go hakapeiam u mamana u mar hakats u omi tara tana katuun.
32 Alimiou go hiakaka hanigaiam ba limiou te hiataatagi miou.
Alimiou go solopaleiam a markato a omi tara taina katuun bate tara poutse men,
temar luba has menai e Sunahan a man markato a man omi i tamilimiou tara solona e Kristo.