A toukui te kato bei e Pol u katuun tema Jiu ri
3
Alia e Pol,
alia i hakarabus sile ii ti kui menai lia a toukui tere Iesu Kristo.
2 Alia e ateigu alimiou u atei sil hakapeiam e Sunahan te hale mei lia a toukui teka ego taguhu merai lia alimiou,
taraha nonei e taatagi koru ranoura.
3 Nonei e haröte ii lia u ngilngil i tanen ti hamous mameien.
Na lia u koloto hakapa berai limiou a tsi tabubun raranga tara ka teka.
4 Na te rite moa limiou u raranga teka ba limiou te luemou a niatei ti mar atei sil menai lia u ranga momous te hatei mamin e Kristo.
5 I manasa a ka teka ima hatei rai u katuun,
kaba i romana u Namnamei tere Sunahan e haröto naien turu aposol na turu propet u niga i tanen.
6 Nonei u raranga momous teka e markato uana:
alimiou u katuun tema Jiu mi e ka gono hoboto mera moulam bara te katoeiera a töa hun katuun.
Alimiou has e lue miou a manka man niga tere Sunahan.
Na u ranga hamana teka e kato sila naia e Sunahan tere Iesu Kristo.
Na ka teka e butu sila ma turu Bulungana u Niga.
7 E Sunahan e taatagi naiou lia me hale ne lia a nitagala pan i tanen,
nonei e katoe ii lia a katunun kui i tanen tego habulungana menai lia u Bulungana u Niga i tanen.
8-9 Alia e ka puta koru gia turu katuun hoboto tere Sunahan.
Kaba e Sunahan e taatagi naiou lia me hale ne lia a toukui tego hahatei merai lia alimiou u katuun tema Jiu ri a manka a man kapan te nigana tere Kristo,
bate haröto has ragi u katuun hoboto temar butu hamana uanou u raranga te hamouseier tere Sunahan.
E Sunahan te habuti a mamanaka,
e hamous u raranga teka tara man pöata i manasa noa.
10 Nonei e kato sile ii a ka teka tego haröto menaien a mamana mar niatei i tanen i romana.
E haröto sila naien turu katuun i tanen ba u angelo na pal kapan tara han i Kolö te tatei tare ren.
11 Nonei a ka te ngileien i manasa na tara mamana pöata,
na nonei a ka teka e butu hamana sila talana tere Iesu Kristo a Tsunono i tarara.
12 Ba ra tema tatei matout tala rei,
bate singo hamatskö uara tere Sunahan,
taraha ara e hamana uara i tanen bate katuun has uara i tanen.
13 Na lia e hatei ragou limiou,
alimiou goma tori tiama silemi te sagoho kamits sil mera gilia limiou.
Taraha,
a ka teka e haröto nena alimiou ema katuun papala mi i matana e Sunahan.
U ngilngil tere Kristo
14-15 Pöata te hakats nagia lia a manka teka,
ba lia te hatukunugu bate singo uagu tere Tamar,
nonei te katoe a mamanaka te kana i Kolö na i puta na nonei has te hala raien a man solo.
16 Alia e singo silegu e Sunahan ega hala sila nama a nitagala i tanen i tamilimiou turu Namnamei i tanen,
ba u namnamei i tamilimiou te tatei tagala hapopona tara nikapan i tanen.
17 Na lia e singo sil hasegu e Kristo e tatei kana i torimilimiou,
alimiou te hamana mia i tanen.
A mouna ka te singo sil korue gulia,
turu hakhakats na markato i tamilimiou:
alimiou go hiangilngil iam.
18 Alia e singo silegu alimiou na u katuun hoboto tere Sunahan e tatei ka memiou a nitagala tego atei sil mena milimiou temar ngil hapopo mera nei e Kristo u katuun.
U ngilngil i tanen e pan koruna,
na e ngahangaha koruna na e la nitöa uana iasa na i puta has.
Na e la hoboto uana tara mamana han na tara mamanaka.
19 Alia e singo silegu alimiou e tatei atei silemiou ime temar ngil koru mera nei e Kristo u katuun,
noahasina te pan bala mena nei u ngilngil teka a niatei turu katuun.
Kaba a mamanaka a niga te saputu mena e Sunahan alimiou e saputu has memouen.