U hihatutsina te mate uu e Kristo tara kuruse
2
Tara pöata tu lama lia i tamilimiou,
a matsi hahatoulana,
alia uma la memei u raranga u mola tsi u mar raranga tara katuun a atei temi habulungana naia lia u raranga tere Sunahan.
E möa.
2 Alia uma ngilin ranga nai ta taina ta ka kaba lia u ngilin hatagali e Iesu Kristo i gusumilimiou na saha ka te mate sileien tara kuruse.
3 Na pöata tu kaia lia i tamilimiou,
alia uma tagala ii na lia u toltololo mei a nimatout.
4 A man raranga na man hihatuts i tar ema tagala ii tego tuke menaien a katuun.
E möa.
U raranga i tar e harötein a nitagala turu Namnamei tere Sunahan.
5 A ka teka i kato sila naia alimiou goma hamana mia tara niatei turu katuun,
kaba limiou go hamana mia tara nitagala tere Sunahan.
6 Alia e ranga noa has megu a niatei turu katuun te atei siler a markato tere Sunahan.
Kaba ema niatei uanei tara han i puta teka tsi tara pal kapanira i puta te taia riou romana.
E möa.
7 Kaba a niatei te ranga nemu lam nonei a niatei tere Sunahan te mous i manasa.
Na a niniganiga tere Sunahan e haka beraien ra i mamuna te taniaia a pöata.
8 U tsunono panira i puta ima atei sile ii a manka teka.
Sanena nori ti atei sileien,
ba nori tema antunan nila nari a Tsunono Pan i tarara tara kuruse.
9 U Buku u Göagono e mar ranga uana teka:
“A ka ti namala tare ii u katuun
na tima hengo naien
na tima hakats has naien,
nonei a ka te kato hahaloso berai e Sunahan u katuun ti ngileien.”
10 A mamanaka teka e Sunahan e haröto sila raien ra turu Namnamei i tanen.
Taraha u Namnamei e tara sabiena a mamanaka tara mamana makum na e tara sabe hasena a mouna a manka tere Sunahan te mousuna.
11 Esi i gusuna u katuun te atei silena temar hakats uana a katuun?
U namnamei peisa lasi tara katuun te atei silena u hakats i tanen.
Na e markato has uana iesana tere Sunahan.
U Namnamei peisa has tere Sunahan te atei silena u hakats tere Sunahan.
12 Ara ima lue ii u namnamei tara han i puta teka.
E möa.
Ara i lui u Namnamei te lama tere Sunahan tegi tatei atei sil menai ra a manka te hala raira e Sunahan.
13 Ba lam tema ranga nami u raranga tara niatei turu katuun tuun.
E möa.
Alam e ranga nem u raranga te hatuts railam u Namnamei tere Sunahan bate hatarare nem a manka tere Sunahan turu katuun te ka mer u Namnamei tere Sunahan.
14 A katuun tema ka menei u Namnamei tere Sunahan ema tatei lue nei a manka te hala nena u Namnamei tere Sunahan.
Turu hakats tara katuun teka,
a manka tere Sunahan e here nei a manka man tutu.
Nonei a katuun ema antunan atei sile neien,
taraha u Namnamei lasi tere Sunahan te antunan haröto nena a mouna a manka teka.
15 A katuun te ka mena u Namnamei tere Sunahan e antunan sabiena a mouna a mamanaka,
kaba tana mar katuun ema antunan atei haniga sile neien.
16 U Buku u Göagono e mar ranga has uana teka:
“Esi te atei silena u hakats tara Tsunono?
E möa.
Esi te antunan hatutse neien ta ka?
E möa koru.”
Kaba ara e ka mera u hakats tere Kristo.