3
U Jiu e kamer ta ka tema kameri a palair u katuun?
E ka mena ta ka ta niga te hapö sileri u katuun a hatöatongo tere Sunahan?
2 Aa,
u Jiu e kamer a parpara ka tema kameri a palair u katuun.
E Sunahan e haniga mam merai u Jiu tegi lu menaien u raranga i tanen bate tara kap naren.
3 E manana,
a palai i taren ima hamanei e Sunahan.
Kaba ema antunan hapiou nai e Sunahan a ka te ranga hamana naien ega katoeien.
4 E möa koru!
E Sunahan e ron ranga hamana nitöa lasina,
noahasina te roron gamo hoboto uer u katuun.
Taraha,
u Buku u Göagono e mar ranga mena nei e Sunahan teka:
“U raranga i tamölö e haröto nanou alö e matsköm.
Te kout narouen lö ba nori te sabie riou u raranga i tamölö e matsköna.”
5 Kaba te kato homi rara e haröto halesala nena e Sunahan te matsköna,
aragi pei aha?
(Alia e ranga heregi a katuun tuun.)
Ga e niga hasina tegi pei menaira e Sunahan te kato homina te hahuna mera neien ra?
6 E möa koru.
Sanena e Sunahan egoma hahuna raira,
ba nonei tema antunan ona has ranei u katuun hobotora i puta teka.
7 Kaba a katuun e tatei poeiena,
“Te haröto nena u gamo i tar e Sunahan e ranga hamanana ba u gamo i tar te soloseie nen,
gaha tsiponi te pei meneien alia gi hahune iou?”
8 A palair u katuun e mar gamo uar teka bate poeier,
“Aragi markato uu teka,
‘Aragi kato homi sil tega butu uu ta ka ta niga.’”
Nori e ranga homi nariou lia bate poeier nonei a man raranga i tar teka.
Kaba e möa.
E Sunahan e hala ranouien a nihahuna te matsköna i taren.
E möa ta katuun ta matskö
9 Na lia e hohou rangata leligu,
a nikaka turu Jiu e niga bala nena a nikaka turu katuun tema Jiu ri?
E möa koru.
U katuun hoboto,
na u Jiu na pala tema Jiu ri,
nori e ka hoboto mer a markato a omi.
10 Temar ranga has uana u Buku u Göagono:
“E möa ta töa ta katuun tega matskö,
e möa koru.
11 E möa ta katuun tega atei.
Na e möa ta töa ta katuun tega sake e Sunahan.
12 A mamana katuun hoboto i laba hakapein a maroro a matskö.
Nori e kato talaser a markato a omi.
E möa koru tegi kato lel menaien ta markato ta niga,
e möa koru lasi.
13 U ranga i taren e omi here nei a kioun mate te kaho poutseier bate soka koreme homi koruna,
nori e gamo tuneri a tana katuun a penrung ren.
U ranga u omi i taren,
te here nei a matuna te ka mena a kökötsi.
14 A runguren e saputena u ranga u mal,
na te omi menarien a tana katuun.
15 Nori e ma hahanei sil nitöa naier tegina atung hamate meraien a palair u katuun.
16 Tara mamana han te la uaren,
nori e habuter a niomi bate kato hatiamer a torina a tana katuun.
17 Nori ema atei sileri a markatona tara masalohana.
18 Nori ema matout ri na ema hatsitsieri e Sunahan.”
19 Ara e atei silera a mamanaka te ranga nena a Lo tere Mosis e la uana turu katuun te kukuteier a Lo teka.
A ka teka e hapiou rena u katuun hoboto te ngilin poeier,
“Alia e möa ta markato ta omi.”
20 A katuun te kukutiena a mamanaka te ranga nena a Lo ema matskö neia i matana e Sunahan,
taraha a Lo e haröto nena a katuun te kato homina.
E Sunahan e mar hamatskö mena nei a katuun teka
21-22 Kaba e Sunahan e ka mena a maroro te kato hamatskö mera neien u katuun i matanen,
na nonei ema maroro uanei tara Lo tere Mosis.
E möa.
Nonei a marorona tara nihamana tere Iesu.
I romana e Sunahan e kato hamatskö rena u katuun hoboto te hamana ria tere Iesu Kristo.
A Lo tere Mosis na u raranga turu propet e hatei naier a ka teka.
U katuun hoboto e markato uaier iesana i matana e Sunahan.
23 U katuun hoboto i kato homi na ema antuna ria tara mar katuun te ngilena e Sunahan.
24 Na e Sunahan e kato hamatskö has rena u katuun,
taraha nonei e taatagi ranen.
Na e Iesu e sakahis hakapa pouts raien kaba ema holeri.
25 E Sunahan e hopö kapiin e Iesu tega nolo be pouts meraien u katuun hoboto.
Nonei e mate sil tego luba menai e Sunahan a man markato a man omi turu katuun,
tegi hamana uaien tere Iesu.
E Sunahan e kato mei a ka teka tego haröto menaien te matskö uanen.
Taraha,
i manasa nonei e tara hahalongolo tuni a man markato a man omi turu katuun.
26 Kaba i romana nonei e haröto nena te matskö uanen na te kato hamatskö has mena neien a katuun te hamana uana tere Iesu.
27 Ara ema tatei pei lele rei,
“Tara muma.
Alia a katuun a matskö,
taraha alia e kukutiegu a Lo tere Sunahan.”
E möa.
Ara e matskö las mera te hamana uarara tere Iesu.
Te markato uanen teka bara tema tatei solosei lele rei a peisarara.
28 A katuun e matsköna tere Sunahan turu nihamana i tanen.
A katuun ema matskö neia te kukute menaneien a Lo.
29 E Sunahan nonei a Sunahan pepeisa turu Jiu?
E moa.
Nonei a Sunahan has turu katuun tema Jiu ri.
30 Taraha,
a töa puku a Sunahan te kato hamatskö ranou u Jiu na u katuun tema Jiu ri turu nihamana i taren.
31 Ge hana,
ara e kato homiera a Lo tere Mosis te kukute mena reira a markatona turu nihamana?
E moa koru.
U nihamana i tarara te tupa mera neira tara saha ka te ngilena a Lo.