E Timoti e la gono mer ere Pol mere Sailas
16
Ere Pol mere Sailas i la mam uu tara taun i Debi be la lelir i Listra te kaia a töa kristen a hitots,
a solonen e Timoti.
E tsinanen a toun Jiu,
nonei a kristen has kaba e tamanen a toun Grik.
2 U kristenira i Listra na i Aikoniam i hamana korui a markato tere Timoti me poeier,
“Nonei a katuun a niga.”
3 Pol e ngil korui e Timoti ga la gono meien.
Ba nonei e lue nen me hapö nanen,
taraha,
u Jiu hoboto ti kaia tara han teka i atei sil e tamane Timoti a toun Grik.
A tei Grik ima kukute ii a markato te hapö uaier ti tagala mei u Jiu.
4 Pöata ti tataala ien tara man taun teka nori i hateirai u kristen u raranga ti kitseia u aposol na pal kapan i Jerusalem bate poeier,
“Alimiou go kukuteiam a ka teka.”
5 Ba u nihamana turu kristen e butu hatagala koruna,
na u hihase i taren e butu hapan susul turu mamana u lan.
E Pol e tari a katununa i Masedonia
6 Nori i silaia i gusuna a provins i Prigia na i Galesia.
U Namnamei u Göagono e hatei raien tegima tatei hihatuts menaien u raranga tere Sunahan tara han i Eisia.
7 Pöata tina butuien i Misia,
ba nori e torohanan katsin la uaier iahana a provins i Bitenia.
Kaba u Namnamei tere Iesu e hatu kap raien.
8 Ba nori e la karasa ba ner i Misia me la uaier tara taun i Troas.
9 Tara bong be Pol e tarena u töa u hiharöto.
A töa tsonuna i Masedonia e tuol me poeiena i tanen,
“Alö go aroho uama i Masedonia batemi taguhu ramou lam!”
10 Pöata te tara hakapeien u hiharöto,
ba lam e haseseim me torohanan lauaiem tara provins i Masedonia,
taraha alam u atei sil e Sunahan e ngö sil rai lam tegona polasa menai lam u Bulungana u Niga turu katuun tara han teka.
E Lidia e hamanaia tere Iesu
11 Ba lam ena osa mia tara tolaala be laba nem a taun i Troas me aroho hamatskö uaiem tara tolo i Samotres.
Ba u hamahö ba lam e la sokö uaiem tara taun i Niapolis.
12 Alam u laban i Niapolis be kete uaiem tara taun i Pilipai,
a han pan tara provins i Masedonia,
a han has turu katunura i Rom.
Ba lam e gamon ka bumia i Pilipai.
13 Turu Lan u Göagono turu Jiu,
ba lam e lakasa uam ielesala tara taun i rehina ramun olo tu peia lam te kaia a makum ti roron singoia u Jiu.
Ba lam e gumum me raranga gono merem a touhaliou ti gono hakapaia nonei tara makum.
14 A töa tahol a solonen e Lidia e kaia i gusura a touhaliou ti hengoia i tamulam.
Nonei a taholuna tara taun i Taiataira na nonei e roron haholin u labalaba a hihol i tanen te la sei.
Nonei e roron hatsunoni e Sunahan,
ba Tsunono e kalatena a torinen ba nonei e hanige iena u raranga tere Pol.
15 Ba nonei na u katuun ti sösohoia i luma i tanen e habaptaisir.
Ba nonei a tahol e ranga hataatagina me poeiena,
“Te atei sile mia limiou alia e hamana hatagala koru uagu tara Tsunono,
ba limiou temi ka bumia i luma i tar.”
Ba nonei e tagala sil koru ranou lam ba lam e lam i luma i tanen.
Ere Pol mere Sailas i kaia tara karabus i Pilipai
16 Turu töa u lan alam u la uu tara makum ti roron singoia,
be tupalem a taholun kukui puku te ka mei a masaloho te hatein a manka tena la nama.
A tahol teka e harangi a töa liliahanei a omi,
ba nonei e lu bera nei u katuun ti hakuie ien a pan nen a moni.
The Conversion of the Jailer (Aposol 16:16-40)
17 Pöata te kukuteien e Pol na lam,
nonei e ku nitöani,
“A pal tson teka u katunun kui tere Sunahan iasa koru.
Nori e haröto rari limiou a maroro te lu sila namia limiou a nihitaguhu tere Sunahan.”
18 A tahol teka e kato nitöa las uu teka turu mamana u lan.
E Pol e sökana koru mei te rangan töa uu a tahol ba nonei e habiritsina me poeiena tara liliahanei,
“Alia e ranga megou lö tara solona e Iesu Kristo,
alö go koul ban a tahol teka.”
Ba nonei tara tsi pöata puku has ba liliahanei e laba nanen.
19 U katuun ti hakui a tahol teka i atei sil a ka ti lulueien a moni e kapa tala.
Ba nori ena las boroboro raier ere Pol mere Sailas me las tsibil me rarien tara makumun töana i matar a pal kapan.
20 Ba nori ena piou rarien turu katuun tara gamman me poeier,
“A pal tson teka u Jiu,
nori emi kato homier a taun i tarara.
21 Nori emi hihatuts has ner a markato te hapiou nena a lo i tarara.
Ara ema tatei hanige rei a ka teka,
taraha ara a tei Rom.”
22 Ba u katuun e hatangana hoboto ner u ranga teka.
Ba gamman e hatangana hasir ba u katuun i taren e kiis kata ba ner u hasobö tere Pol mere Sailas,
ba nori e singata rarien a pata.
23 I murina ti singata hohomi koru rarien ba nori ena lapo ba rarien tara luman karabus.
Me poeier tara tson pepeito kap tara luman karabus,
“Pepeito kap haniger a huol a katuun teka.”
24 Tara pöata te hengoeien u ranga teka,
ba nonei e haka ranen tara töa rum iogana nitöa me hakits kap ranei a man mouren a makumun ruei a tiama.
25 Tara gusuna bong bere Pol mere Sailas e singo uaier tere Sunahan me soloseieren turu köman lotu,
a palair u karabus i hehengoia ti köma uaien.
26 Ba töa nun a pannen koru e songots butuna me gas hapanena a luman karabus me tagas hanöa nitöa nama i kopina u tul tara luma.
Ba man tamana hoboto e takalatar,
na u tsien i tapurese ba hasir a mour u karabus me rusur.
27 Ba tson pepeito kap e supakatana me tagulena.
Ba pöata te tareien u tamana i takalata hakapa,
ba nonei e lousena u kilatan hiatatung i tanen me katsin ngats hamate iena a peisanen,
taraha nonei e pei u karabus i bus hakapa.
28 Be Pol e ku hapan koruna me poeiena,
“Möa tu ngatsi a peisamölö!
Alam hoboto e kam!”
29 Ba tson pepeito kap e ngö silena tu alesala me piata tasuna mena tuhatukun nena i matana ere Pol mere Sailas,
bate toltololo tala mena a nimatout.
30 Ba nonei e las mera neien i biou me poeiena,
“A matsi tsunono,
aha tego kati lia balia te luegou a nihitaguhu tere Sunahan?”
31 Ba nori e poeier,
“Hamana uu tara Tsunono e Iesu,
balö te lueiem a nihitaguhu tere Sunahan,
na pal katuun has i tamölö.”
32 Ba nori e hatei rien u raranga tere Sunahan na u katuun hoboto has ti kaia i luma tanen.
33 Ba nonei noahas tara bong teka ba tson pepeito kap e lu rena ere Pol mere Sailas me galus rena a man takiraha i taren.
Ba nonei na u katuun hoboto i tanen e lu sokön töa ner a baptais.
34 Ba nonei e lu rena ere Pol mere Sailas mena sei ria i luma i tanen,
ba nonei e hanou ranen.
Nonei na pala hoboto i tanen i sasaala koru mei ti hamana uaien tere Sunahan.
35 Tara bongbong ba gamman e tula ranama u polis,
nonei e hatei rema u polis me poeiena,
“Halakasa raiam u katuun teka.”
36 Ba tson pepeito kap ena hatei rena ere Pol mere Sailas me poeiena,
“A gamman e hala nenama u ranga te poeiena,
alimiou mere Sailas egi halakasa raiou.
Bara!
Lakasa tala muma,
a masalohana e tatei la gono mera noulimiou.”
37 Be Pol e poeiena turu polis,
“Nori i ma kout hamatskö merai lam na nori i singata railam a pata i matar u katuun.
Alam has u katunura i Rom,
kaba nori i haka has raia lam tara karabus.
Nori e katsin halakasa hamous rariou lam.
E möa koru!
Nori peisa egi lama batemi halakasa rariou lam!”
38 Ba u polis ena hatei ner u raranga teka tara gamman.
Pöata ti hengo naien ere Pol mere Sailas u katunura i Rom,
ba nori e matout korur.
39 Ba nori ena ranga hataatagi koru ria i taren ba nori e lakasa gono mera ren tara luman karabus be tahul raren egi laban a taun.
40 Bere Pol mere Sailas e laba ner a luman karabus me lauaier i luma tere Lidia,
ba nori ena tara raier u katuun ti hamanaia tere Iesu.
Ba nori e ranga gono mera ren me kato hatagaler u nihamana i taren,
ba nori e töan lar.