E Pita e hala nema u raranga turu kristenira i Jerusalem
11
Tara pöata teka u aposol na u kristen ti kaia i Judia i hengoen u raranga te pei u katuun tema Jiu ri i lu hakapi u raranga tere Sunahan me hanige ren.
2 Ba tara pöata te la poutsia e Pita i Jerusalem,
ba u kristen tara pala turu Jiu e raharahe ren.
3 Ba nori e poeier,
“E hana balö e lauaiem turu luma turu katuun tema Jiu ri,
balö tena nou gono mera men?”
4 Be Pita e tanian hatei nena a mamanaka te butu.
5 Ba nonei e poeiena,
“Alia u kama tara taun i Jopa ba tara pöata tu singo ia lia ba lia e taregu u töa u hiharöto.
A töa ka e koulma i Kolö te here mei u labalaba u kapan.
E here ii a tohats a katuun e pileia tara tohats a makum i runguna u labalaba me hakoul menarumeien i puta me la uanama i tar.
6 Pöata tuna tara haniga koru ia lia iahana u labalaba teka ba lia e taregu a mamana mar enimol na i puta turu labalaba teka,
u poum na u kori na mamanaka te silna turu tsiktsiki,
na u apena has.
7 Ba lia e hengo hasegu u töa u raranga bate poeiena i tar,
‘O Pita,
alö go takei ba lö te atung hamatem ta ka turu labalaba balö te noue men.’
8 “Kaba lia u pei,
‘E möa koru,
o Tsunono.
Alia ema mala nouegi ta töa ta ka tu hagonein lö.’
9 Kaba nonei u ranga teka e la lelma i Kolö me ranga hahuol menou lia me poeiena,
‘A ka te hanigein e Sunahan tegi noui,
alö ema tatei agono namien.’
10 A ka teka e butu a topisa a pöata,
ba mamanaka hoboto teka e las sei pouts menari i Kolö.
11 “Ba nonei tara pöata,
a topisa katuun emi butuna tara luma tu kaia lia.
A töa katununa i Sisaria e tula mera meien i tar.
12 U Namnamei tere Sunahan e ranga meioulia,
‘Alö go la gono meraien,
ma hakats hapara ii.’
Na tönomo a kristen i la gono has meiou lia.
Ba lam ena tasu mia tara luma tere Konilius.
13 Ba nonei e hatei ranei lam te tara menaien a angelo te tuol ia iahana luma i tanen me poeiena,
‘Alö go tula menai ta katuun i Jopa,
batena sake nama e Saimon te ngö haseri e Pita.
14 Nonei emi hale noi lö u ranga,
na turu raranga teka e Sunahan e lu pouts gono hoboto mera noi lö a pala i tamölö.’
A angelo e mar ranga uu teka tere Konilius.
15 “Ba pöata tu na butuia lia tere Konilius me tanian rangagu,
ba u Namnamei u Göagono e koul uana i taren,
te markato has uaien i tarara tara pöata tutuun.
16 Ba lia e hakats lel negu u raranga tara Tsunono te pei,
‘E Jon e baptais ra ii u katuun u ramun tuun,
kaba limiou ena habaptais moua turu Namnamei u Göagono.’
17 Te hala naia e Sunahan u Namnamei u Göagono i tanen turu katuun teka ti hamana uaien tere Iesu Kristo a Tsunono,
temar hala has meraien ra,
galia a saha mar katuun te hatu kap nagou a maroro tere Sunahan?”
18 Pöata ti hengoien u ranga tere Pita,
ba nori e haniga korue ren.
Ba nori e soloseier e Sunahan me poeier,
“U mana,
e Sunahan e haniga hasir u katuun tema Jiu ri tegi habirits ba menaien a man markato a man omi ba nori te töatöa has riou!”
U kristenira i Antiok
19 U kristen ti sata noahasia ti titi hatu hamateia e Stiven na ti kato homi merai u katuun ti hamana uu tere Iesu.
A tou la kalakala i taren e noan töa ma i Pinisia na i Saiprus na i Antiok.
Nori i hala puku naia u Bulungana u Niga turu Jiu.
20 Kaba e ka has meir u katunura i Saiprus na i Sairini,
nori i sohala ma turu katuun ti lauama tara taun i Antiok bate hatei laner u raranga turu katuun has tima Jiu ii.
Nori i hahatein u Bulungana u Niga tere Iesu Kristo.
21 A nitagala tara Tsunono e kaia i taren,
ba katuun a parpara e hamanar be habirits uaier tara Tsunono.
22 U kristenira i Jerusalem i hengoin u raranga tara ka teka,
ba nori e hala menari e Banabas i Antiok.
23 Pöata tena tukuien,
ba nonei e tarena a nihitaguhu tere Sunahan e ka gono meraien,
ba nonei e sasaalana.
Na nonei e kato hatagali u hakats turu katuun hoboto tegi hatagala menaien a toriren bate hamana nitöa uaier tere Sunahan.
24 E Banabas a katuun a niga,
na u Namnamei u Göagono e saputeien,
na nonei e ka has mei u nihamana u tagala.
Ba u katuun u parpara e la uaier tara Tsunono.
25 Be Banabas e la uana i Tasus tena sake menaien e Sol.
26 Nonei e sabeien memi piou nanen i Antiok.
Ere Banabas mere Sol i ka gono mer u katuun tere Iesu i Antiok turu töa u hiningal u ohots,
me hatuts rari u katuun u parpara,
u raranga tere Sunahan.
U katunun tsitsilo tere Iesu i ngö tutuun raia u kristen nonei tara taun teka.
27 Tara pöata teka,
a palair u propet i laba nema i Jerusalem,
me la uaier i Antiok.
28 A töa i taren,
a solonen e Agabas,
e tuol ia turu hagum,
ba tara nitagala turu Namnamei u Göagono ba nonei e hatei nena a bes pan e butu noa tara mamana han hoboto i puta.
A bes pan teka e butu hamanaia tara pöata te gamman pan ia e Klodias.
29 Ba man tötöa man kristen hobotor i Antiok e kitser u ranga tegi hala hapopo naien u monin hitaguhu turu kristenira i Judia.
30 Nori i markato uu teka,
ba nori e tula rer ere Banabas mere Sol tegina piou menaien u moni turu tsunono turu kristenira i Judia.