E Iesu e ngör u katunun tsitsilo tutuun
5
Tara töa pöata e Iesu e tuol ia i mounsingmou tara Ramun a Perperere i Genesaret.
Nonei noa has a pöata ti hiasösongo sileia u katuun tegi hengo menaien u raranga tere Sunahan.
Luk 5:1-16
2 Nonei e tari a huol a tolaala ti hasung ia i kotolana.
A man tsonun hagala i laba raien mena galuser a man abe.
3 Be Iesu e osana tara tolaala tere Saimon,
me tahule nen ega gamon tupa ba nai a tolaala a mounsingmou.
Be Iesu e gumna iahana tolaala me hatuts rena u katuun.
4 Pöata te ranga hakapaien,
be Iesu e poeiena tere Saimon,
“Tula menai a tolaala tara makum a ruku,
ba limiou te harukue miou u abe bate soohe mou ta iena.”
5 Be Saimon e ranga palisina,
“O Tsunono,
alam e hagala halan mula,
kaba lam ema soohe mulei ta ka.
Kaba turu ranga i tamölö ba lia te hakoule gou u abe.”
6 Ba nori e hakouler u abe me sooher a iena a parpara koru,
ba abe e katsin takalana.
7 Ba nori e ku raier a palai i taren tara tana tolaala egi lama batemi taguhu raren.
Ba nori e la rima memi ongo hasaputeri a huol a tolaala u iena me katsin rukur.
8 Be Saimon Pita e tarena a manka teka,
ba nonei e hatukunna i mouna e Iesu me poeiena,
“Alö ego laba naiou lia,
o Tsunono!
Alia a katuun a omi!”
9 Nonei emar ranga uu teka taranaha,
nori i asingoto koruni u iena u parpara koru ti sooheien.
10 Ti markato has uu ere Jemis mere Jon,
a galapien tere Sebedi ti kukui gono mei e Saimon.
Be Iesu e poeiena tere Saimon,
“Ma matout ii.
Alö a katuun a sosooho iena.
Kaba tara man pöata te la nama,
alö e na lu mera mumei u katuun i tar!”
11 Ba nori e hasung menari a man tolaala i taren i kotolana,
me laba ner a mamanaka me kukutier e Iesu.
E Iesu e kato haniga poutsi a töa katuun a toba
12 E Iesu e kaia tara töa taun te ka hasia a töa katuun a peisanen hoboto e ka mei a toba.
Ba nonei e tarena e Iesu me hatukununa i matanen me singouana i tanen,
“O Tsunono,
te ngil mia lö,
alö e tatei kato haniga poutse moulia.”
13 Be Iesu e hasoa nena a limanen me sebele nen me poeiena,
“Alia e ngiligu.
Alö ego niga pouts!”
Ba nonei puku has tara pöata teka ba toba e tia ba nena a katuun.
14 Be Iesu e ranga menen,
“Ma hahate ii ta katuun a ka teka,
kaba lö go la hamatskö uu tara pris ba nonei tena tarena a peisamölö te niga pouts uanen.
Ba lö te hale moien a kaan haats te haröto nena a toba e kapa hamana,
temar ranga uu e Mosis i manasa.
Ba u katuun te tatei atei sile riou a toba i tamölö e kapa koru.”
15 Kaba u bulungana te hatein a manka te katoe e Iesu e tasata uu i lehana.
Ba u katuun u parpara e la sile rima tegimi hengo uaien na tego kato haniga pouts meraien man siki i taren.
16 Kaba tara man palaina man pöata nonei e la pepeisa uu tara makum a ski batena singona tere Sunahan.
E Iesu e kato haniga poutsi a katuun a matekata
17 Turu töa u lan e Iesu e hihatutsia turu katuun.
U Parasi nu tson hihatuts tara Lo tere Mosis i gum has.
Nori i lama turu han hoboto i Galili na i Judia na i la hasma i Jerusalem.
Na nitagala tere Sunahan e kaia tere Iesu tego kato haniga pouts meraien u katuun ti ka mei a siki.
Luk 5:17-39
18 Ba pal tson e söate rimei a töa katuun a matekata a pöapöa.
Nori i torohanan söata menaien iahana luma bate hake rien i matana e Iesu.
19 Kaba a makum e saputu koru tara katuun,
na e möa ta makum tegi sila meien.
Ba nori e sei meren ieluna a luma me luba ner a töa makum tara pungana.
Ba nori e hakoul gono meri a katuun a pöapöa i gusuna ti gonoia u katuun me hakerien i matana e Iesu.
20 E Iesu e atei sil ti hamana uaien i tanen me poeiena tara katuun a matekata,
“A tsomi,
alia e luba hakap nagula a markato a omi i tamölö.”
21 Ba u tson hihatuts tara Lo na u Parasi e tanian hiarangrangatar me poeier,
“Te ha uanen ba nonei temar ranga uana teka?
Nonei e katsin guleiena a nitsunono tere Sunahan!
E möa ta töa tego tatei luban a markato a omi,
e Sunahan puku lasi a töa!”
22 E Iesu e atei sil u hakats i taren me poeiena,
“Aha te hula hakats memi limiou?
23 Aha te gigahana na ha te tiamana?
Alia ego pei,
‘Alia e luba negu a markato a omi i tamölö,’
tsi alia ego pei,
‘Alö ego takei ba lö te lam’?
24 Alia e haröto ragi limiou,
alia tu butun Katunuma e ka megu a nitagala i puta tego luba has menai lia a markato a omi tara katuun.”
Be Iesu e ranga mena a katuun a matekata me poeiena,
“Alia e ranga megou lö,
takei,
ba lö te söatem a holholasa i tamölö bate laam i han!”
25 Ba nonei tara pöata puku has teka ba nonei e takei seina i matar u katuun hoboto me söatena a holholasa te opöien me soloseiena e Sunahan me lana i han.
26 Ba u katuun hoboto e asingoto korur me matout hakapar.
Ba nori e soloseier e Sunahan me poeier,
“Ara e tare lila a manka man kapan koru i romana!”
E Iesu e ngöi e Livai
27 I murina a ka teka,
e Iesu e tari a töa katuun te lului a takis a solonen e Livai e gumia tara luman takis bate kuina.
Be Iesu e poeiena i tanen,
“Kukute moulia.”
28 Be Livai e takeina me la ba nena a mamanaka me kukutena e Iesu.
29 Be Livai e katoena a kannou pan tere Iesu i luma i tanen.
U katuun u parpara ti lului a takis na palair u katuun i nou gono meraien.
A pal kapan turu Jiu i ngö raien u katuun u omi.
30 Ba palair u Parasi na u tson hihatuts tara Lo e tara raren me ranga sil rer u katunun tsitsilo tere Iesu,
“Taraha tsiponi ba limiou te nou gono mera miou u katuun te lulueier a takis na palair u katuun u omi?”
31 Be Iesu e ranga mera nen,
“U katuun te möar ta siki ema tatei la uari tere dokta.
E möa.
U katuun lasi te ka mer a siki te lar.
32 Alia u ma la sile mei tegomi ngö merai u katuun u matskö.
E möa.
Alia u la silema tegomi ngö merai u katuun u omi bate habirits hamatsköer a toriren.”
A markato te agono menari a kannou
33 Ba u katuun e poeier tere Iesu,
“U katunun tsitsilo tere Jon e roron agono ner a kannou bate singo uaier tere Sunahan.
Na turu Parasi e markato has uaier iesana.
Ga taraha tsiponi bu katunun tsitsilo i tamölö te namala agonori?”
34 Be Iesu e poeiena i taren,
“Tara pöata te hiakökoto gono meria a halis,
a tsonun hitöl te kana na pala tara tson ema tatei agonori.
E möa.
35 Kaba a pöata e la nama romana ba tsonun hitöl te luba nariou.
Ba pala i tanen te agono riou nonei tara pöata.”
E Iesu e haharuein u hihatutsuna i manasa na u hihatuts u tsimus
36 Na e Iesu e ranga has meraien u haharuei teka:
“E möa ta katuun tega kiis ban ta makumun labalaba ta tsimus bate tupe neien a tabutu turu labalaba u toutounei.
Te markato uanen teka,
ba u labalaba u tsimus ti kiisi tema tatei taratara haniga gono menei u labalaba u toutounei.
37 Na e möa ta katuun tega tatei kis naia u uain u tsimus tara pikpiköna meme te toutouneina.
Tega markato uen teka,
ba nitagala turu uain u tsimus te gololona bate pan susuluna,
bate kato butena a kaan osul a toutounei tema antunan talas nei.
Ba uain te tatsu uana i puta,
ba pikpiköna meme te omi hasina.
38 U uain u tsimus tegi kis naia turu pikpikö u tsimus.
39 Na e möa ta katuun tega ngil a uain a tsimus i murina te ua hakape nen a uain a toutounei.
Taraha?
Nonei e poeiena,
‘A uain a toutounei te niga balana.’”