Ma tsili ndzindziŋŋ Gayo é kálara ñí,

éñí ma dziŋ ya bébélá edziŋŋ.

2 Á ndzindziŋŋ,

ma kómo ná mam mése mé ke wa mvéáñ,

o tɔbɔ fe mvwaá,

amvála ané nlém we,

wá wá ke mvéáñ.

3 Amú ná má bíra sán éyɔŋ bɔbédzaŋ benziŋ bé ngá sɔ́,

béé vé ngañiá ébe é bébélá we,

amvála ané wa wulu á bébélá été.

4 Mésán má daŋ belé mé né,

fáve ná ma wók ná é bɔ́ŋŋ bam bá wulu á bébélá été.

5 Á ndzindziŋŋ,

wa bɔ édí é ne nzósoó,

éyɔŋ wa belan ya bɔbédzaŋ,

ádaŋdaŋ beyéŋ,

6 ébɔ́ fá bá vé ngañiá ye édziŋŋ dwe á mfá ékóánn bebwíni áse.

Wa ye bɔ mvéáñ ná o vwála bɔ́ mfá átsíni ya ékena deba ámvála dá ñep ya Nzamá;

7 amú ná bé ngá kólo ákála Éyola [Kristo],

bá kaa áñɔŋ dzóm enziŋ ébe é bot bé sés bebwíni.

8 Éde bía,

bía yian ñɔŋ amvála bot te,

á mfá ye ná bí bɔ eséññ á mfá bébélá fufúlu bíabe bɔ́.

9 Má tsili ekóánn bebwíni dzam enziŋ,

ve Diótrefes,

é mot aa dziŋ aa bɔ ntébosú énzénzaŋ deba,

ăá ñú bía táŋ.

10 Ya akála dzam te,

ngé me sɔ́,

măá ye vwían míbɔann myeñ aa bɔ,

eé sɔ́mán bía ékúkwát été ya mbéa bifíá,

éñí kaa átɔbɔ mvwaá ya édí te,

ăá ñɔŋ bɔbédzaŋ,

é bot bá bá kómo bɔ́ áñɔŋ aa kili bɔ́ dɔ,

aa tsílán fe ya bɔ́ ékóánn bebwíni été.

11 Á ndzindziŋŋ,

o táa vú abé,

fáve mvéáñ.

Éñí aa bɔ mvéáñ a ne é mot Nzamá;

éñí ñí aa bɔ abé,

ăá bé yén Nzamá.

12 Bot bése bá vé yaá Demetrio ngañiá ya fe bébélá émyen.

Éde,

bía bía vé fe ngañiá,

wa yem fe ná é ngañiá wea a ne bébélá.

13 Mé mbé mé belé abwiññ mam méye átsili wa,

ve măá kómo wa tsili ya afép ya nsɔŋ;

14 ve déá,

ma tɔɔ́ ya mebúnn ná avítsaŋ tám ma ye wa yén,

véa bía ye kɔ́bɔ asú ya asú.

15 Mvwaá ya wa.

Bemvwíññ bea bá sómo wa.

Wa sómoŋé fe bemvwíññ bea,

kada mot ya éyola.