Ámvála bebwíni bá yian niŋ
3
Vá bɔ́ osímánn ná bé tɔbɔgé betébosú ya menguu medzwée ásí ya fe ábɔ bɔ́ mewók,
átɔbɔ fe nkomann á mfá mbamba mbɔann óse.
2 Bé táa kɔ́bɔ mot enziŋ abé,
bé táa ki bɔ́ ádzéŋ ya mitéé,
fáve ná bé bɔ añep,
béé lére evwévwé nlém áse ébe bot bése.
3 Amú ná bía fe ébe metám mevɔ́ɔ́ bí mbé akúkút bot,
bí tɔɔ́ fe melɔ́,
bíí lés,
bíí tɔɔ́ fe aloá ye mikómánn ya bivéé mendzaŋ ya mendzaŋ,
bíí niŋ ábé été ya miñamle été.
Bí tɔɔ́ é bot bá víni,
bíí vínan fe bevɔ́ɔ́ ya ébá bevɔ́ɔ́.
4 Ve eyɔŋ ededea ésós Nzamá Nkoro wea
e ngá léreban ya édziŋŋ deñ ébe mot binam,
5 éñe a ngá koro bía,
se akála mibɔann míye á nzósoó,
fáve amvála nyénánn engóngɔ́ɔ́ weñ ó né,
ébe nsopbán ye ábera tɔbɔ mfefeñ,
ya ábera tɔbɔ mfefeñ mbyálánn amú Mfúfúp Nsísim,
6 éñí a ngá swii ébe bía abwiññ
ya akála Yesukristo Nkoro wea,
7 á mfá ye á tɔbɔ benzósoó
ya akála é mvɔmm deñ,
ya fe ná bí nzu yaá bɔ beñɔŋ tsígá
ya oyan ye éniŋ é ne mbéámbéá.
8 Éfíá e ne tételé édɔ dí.
Éde ébe é mam má,
émɔ ma kómo ná o bíra vé ayágalé ná é bot bé bwíni yaá Nzamá,
bé kee bébyen ébe bembamba mibɔann.
Mam méte émɔ mé ne mvéáñ ya fe abúánn ébe bot.
9 Ve ásáale akúkút bisó,
ya mébárán mé bot,
ya mitéé,
ya fe melúmán ébe á mfá nkɔɔ́ metsiŋŋ;
amú ná mam méte mé ne kaa ábúánn ya kaa ayílí.
10 Ébe é mot aa sɔ́ ya nkánán mengamm,
niané wa vé ñí mbámm éyɔŋ ósúá,
ya édí beáñ,
ákánan ya ñí.
11 Yemŋe ná éñí te a ntɔɔ́ ekúkwát mot,
aa bɔ nsémm,
etɔɔ́ ná aa vé fe émyen meku.
Melépgá ya Mebéránn
12 Niané ma lóm wa Artemas,
ngé ki Tíkiko,
bɔɔ́ge avóó ná o nzu ébe ma á Nikópolis,
amú me kík yaá ná ma ye lot metám mé avép ó véa.
13 Á mfá nyem metsiŋŋ Zenas,
bá Apolos,
túgán bɔ́ ávwála átsíni ekena ósú,
á mfá ye ná dzóm enziŋ é táa bɔ́ ádzéŋ.
14 Ya fe é bot bea bá bé yága ná bé kee bébyen ébe bembamba mibɔann,
béé vwála é mam má bíra yi á mfá ye ná bé nza tɔbɔ kaa bibumá.
15 É bot bése bé ne bíabe bɔ́,
bá bérán ya wa.
Ábérán fe ya é bot bá dziŋ bía á mbwínánn été.
Mvɔmm eé tɔbɔgé ya mína bése.