2 Kíkírí,

ákoan nlódzóp ó kwíñ yaá,

é mos ósúá ye á sóánn,

éde bé ngá ke sian á sɔŋ.

3 Ané bevɔ́ɔ́ bé ŋga ke bá síli ébá bevɔ́ɔ́ ná,

“Nzá aa ye bía vea ákwá é ne mbéñ sɔŋ?”

4 Niané bé ngá bére mís,

ané bé ngá yén akwá é fógan yaá,

afáŋbɔ ná dá é mbé ededea anén.

5 Éde niané bé ngá ñíi á sɔŋ été,

ané bé ngá yén ndómán enziŋ é tɔɔ́ ósí mfá meyóm,

e baga mifúm bilíŋŋá;

ané bé ngá sigan.

6 Ve ñí a ngá dzó bɔ́ ná,

“Míní táa sigan;

mína dzéŋ Yesus mot ye á Nasaret,

éñí bé ngá ywíñ á krús.

Á wómo yaá,

a sés ó vá;

dággán é vóm bé ngá bwíi ñí.

7 Éde keŋán,

dzógán béyága beñ ya Pedro ná aa ye mína ke ósú á Galilea;

ó wéñ éñe mína ye ñí yén,

amvála ébyen a ngá dzó mína.”

8 Niané bé ngá kwíñ,

ané bé ngá kólo ó sɔŋ mibíí,

amú ná abwiññ ngom ya eñúñuŋŋ bí ngá biñ bɔ́;

ébɔ́ kaa ki fe kat mot enziŋ dzam amú ná bé ngá kɔ wɔŋŋ.

9 [Kíkírí,

é mos ósú ye á sóánn,

niané Yesus a ngá wómo,

éde a ngá tára yéne ébe María Magdalena,

éñí a ngá vea mimbéa misísim zaŋgbéá.

10 Ané ñí a ngá ke,

a kat dɔ é bot bábe Yesus bé ngá wulu,

ákoan bé ngén bé tɔɔ́ ya meyep béé yi fe.

11 Niané bé ngá wók ná a ne ntétéá,

ya fe ná á yén ñí,

béé ndzí dɔ yébe.

12 Nia véa,

éde a ngá ke yéne amvála afé,

ébe bot bé beáñ béye été,

béé wulu ná bá ke miyéŋ.

13 Ané bot béte bé ngá ke dɔ kat ébá bevɔ́ɔ́,

ve bá béé ndzí ki bɔ́ yébe.

14 Nia véa,

a ngá ke yéne ébe beyága awóm ya mbɔ́ɔ́ bébyen éyɔŋ bé mbé bé tɔɔ́ ó téble,

éde a ngá vé bɔ́ mbámm ya akála é kaa mbwínánn weba ya milém áleét myeba,

amú ná béé ndzí yébe é bot bé ŋga yén ñí,

niané a ngá wómo.

15 Éde a ngá dzó bɔ́ ná,

Keŋán éniŋ ngúrá míní kat fe é dzóm áse é ne mvelann mbamba fwéñ.

16 Éñí aa ye bwíni,

aa duuban fe,

éñe aa ye tɔbɔ nkoránn;

ve éñí aa ye bɔ kaa ábwíni aa ye ñɔŋ meku.

17 Méndem má émɔ má ye bee é bot bé bwíni yaá.

Ya éyola dam bá ye tsílán ya mimbéa misísim,

bá ye kɔ́bɔ mifefeñ mikɔ́bɔ.

18 Bá ye biñ beñó ya mó,

atwaa bá ñú é dzóm dá ywíñ mot,

dăá ye bɔ́ dzugu;

bá ye bere mikúkwann mó,

mí ŋga tɔbɔ mvwaá.

19 Niané Ntí Yesus a ngá mana kɔ́bɔ ya bɔ́,

éde bé ngá ñɔŋ ñí á dzóp été,

a tɔbɔ fe ósí á mfá méyóm Nzamá.

20 Éde bá bé ngá kólo,

bé ŋga ke bá kat mbamba fwéñ ébe mevóm mése,

Ntí eé vwála bɔ́,

eé bána fe éfíá deñ ya méndem mé ngá bee dɔ.

Amén!]