Abuku sekuk deiyoknye bira, Yohanes ulamuk. Yohanes arye asurat sekuk talak ara, Roma mutuku nirya talibuka weik ninye deiyoknye, el si ara Nero Domitian, ulamuk. Sik Roma mutuku deiyok nang nirya arye, ‘Nun siuk ereipnamsilyame,’ nyapdeibika ati, Yesus si ap, Allah el si ap erelamik ninye nirya ati, ikin ning sik nong deice delilamikce, olamik. Winilamika ati, ton diba tenena ninye arye, Yesus el yupu bataklamik. Ton ning ara, kum bataklamik bukni, ilil weik ulamik. Roma mutuku deiyok nang arye nyapdeibikba, yin talin nang arye, Yohanes dobuka, tapu koubukapnarye, tonok mutuku Patmos noutamak, wenena aik pum tam dongamik. Patmos mutuku ara, laut mekwen noutamak, dana-dana tam nirya mekwen sekdongamuk mutuku ulamuk. Yohanes arye, amutuku ulamuk talak noutamakarye asurat sekeipsuk.

Abuku noutamak, ‘Weik mambule’ tenen, sekeipsuk yupu ara ani. Ara, “Yuk ninye si ap, yuk talye ning ap ati, sik si erebuka si dona meme. Allah el siuk erenamlulum,” nyabuk. Tonda, “Amenyan talak ara, Yesus Kristus arye, Isa Mutuku Dongonye ap, el mapsilip ap, el amu tam unyak ninye nirya ap ati, malye kipnamle. Atalak ara, Allah arye ninye mutuku-mutuku nirya ati, yupu lipsisikuka bokeipnamsile. Malye ninye ati, weneplirye, uku din mutuku yakwetepnamle. Elti diba tenebuka, diksukum unyak ninye ati, ‘Telebe, na dam yalulume,’ nyabuka, dengna ning arepnamsile,” nyabuk.