Abuku sekuk deiyoknye bira, el si ara, Yudas ulamuk. Yudas ara, Yesus arye wibuka deibuk mapu, sik 12 nang kan-kan ton kum ulamuk. Anye bira, Yudas Iskariot pia kume. Asurat sekuk Yudas ara, Yesus el weit kopropa ulamuk (Matias 13:55; Markus 6:3). Yudas arye asurat sekuka dopkwetebukura, doprobik ninye ara, nun walwale, bukni, sikda Allah diba tenena ninye ulamik.

Yudas ulamuk talak ara, tilila yupu peteren nang weik ulamikce, sikce nyalamik. “Kume, Allah el kanye aryuk bico tenepsilirye, talye lyesulule. Nunce teleb winin ap, mambul pil dona ap deice arye, kum lyesulule. Aning nirya deice arye, kum teleb kipdeipdatibye. Dib tenena deice aryuk lyesulul anya arye, akunum lyepsilyopura, nun kanye tenebibye touk, talye kanye bobuka malye ning ton tuba winiptibye,” nyabuka peterelamik. Aning ara, Allah arye kum tenelamsuka ati, Yakobus arye, asurat sekuk.

Asurat noutamak ara, nyabuk. “Kume. Talya nyaltakana kum bukni, Yesus ati dipkoprop diba tenebibyopura, aminyan talak nirya diksukumuk wininamabe. Sik malyeuk tuba wininyak ninye ara, akunum lakak upsile. Anang ara, dipkoprop diba kum tenebika ati, winiryuk talima ap, winiryuk kanye tenena ning ap, kum doprobik. Sik talye nyaplobik. Dipkoprop diba tenenyak ninye arye, diksukumuk tuba wininyake,” nyabuka asurat deice arye sekeipsuke.