Abuku sekuk deiyoknye bira, Yohanes ulamuk. Yohanes ara, Yesus arye wibuka deibuk mapu, sik 12 nang kan-kan ton ulamuk. Yohanes arye, asurat ap, bitinye tonap sekuka, asurat winilye deice el si deibuk. Asurat ara, bitinye ning sekdeibuk. Tonda, Yohanes arye, Injil Yohanes ap, buku Wahyu ap sekeipsuke.

Yohanes ara, Asia tam noutamak peterebuka balamukce, Efesus mutuku ton binmoka anya arye, asurat ara, Asia tam noutamak bukni, Efesus mutuku ulamuk talak arye, sekuka dopkwetebuk buk, Asia tam ninye bobuka balamikce, elilamik.

Yohanes arye, asurat sekuk talak ara, Yesus el laka teleb yupu peterelban nang ap, tonda Allah yupu nirya peteren deiyok nang ap, arye, ayupu dobuka yuk mutuku nirya peterepra balamik. Winilamik talak noutamak ara, sik balamik mutuku ninye arye, apeteren nang sik patan ning melibuka arilamik. Allah el dipkoprop yupu peterena deiyok nang arye, aning ulamik touk, siktilila yupu peterena nang babye, atonun winilamik ulamik. Aning ati ara, Yohanes arye, ‘Yesus diba tenenyak ninye, tilila yupu peteren nang sik dam yakibuk, mankau kanye bobuka, sik patan ning ati melibuka aribicak’ tenen, yupu sekuk. Ati, Yohanes arye, “Tilila yupu peterena nang nirya, sik dam yakceura, talye kanye bobuka, kum kekenamlulume. Sik nyanyak yupu nirya ara, moubuka kekepmumce, ‘Tek do, tilila do’ tenen, moupra kekenamlulume. Teleb ning, kekenamlulume. Tilila ning ara, kekena meme,” nyabuk.