Yohanes ara, Yesus arye wepdeibuk nang, sik obarye nang kan-kan ton, Yohanes ulamuk. Yohanes arye, minyuma talak sekuk surat ara, ake. Ange akunum sekupopura, surat bitinye tonap sekuka, yuk talak ara surat winilye ning ton, el si deice sekdeibuk. Tonda, anye Yohanes arye, elcuk Injil Yohanes ap, buku Wahyu ap, sekuka deipsuke. Yesus arye, Yohanes ati, el talima aribukce, elti, kanye deibuk (Yohanes 13:23). Yohanes ara, Yesus ap, neika balamrikce, Yesus pil dolamuk ning nirya ap, peterelamuk ning nirya ap, kekelamukce elilamuk (1:1-4). Yohanes ara, Asia tam noutamak peterepra balamukce, Efesus mutuku ulamuk talak arye, sekuka dopreibuk.

Yohanes arye asurat sekuk talak ara, tilila yupu peteren nang weik peterepra balamikce, ayupu nyalamik. “Nun nong nirya ara, pia malye ning anya arye, Yesus ara, dipkoprop ninye nong atonun kum dayuke,” nyabuka tilila nyalamik. Tonda, “Malye winin ning yala-yala nirya ap, talye yolana ap, telebuka,” nyabuka tilila nyalamik. Tonda, “Lyen ning ara, Yesus diba tenen deice arye, ninye lyen ning kum dopropteipye,” nyabuka, tilila yupu peterelamik. Winibuka peterelamikbuk, Yohanes arye, ‘Asia tam diba tenenyak ninye arye, atilila yupu diba tenebicak’ tenen, asurat sekamuka deice arye, yupu sekdongobuk.

Yohanes arye, ‘Ayupu ara weik mambule’ tenen, sekuk ning ara, ani. “Tilila yupu peteren ninye unyak ning ara ani,” nyabuk (2:26). Tonda, “Anggun diba tenelulum ninye ara, kanye teniltona kumce, ‘Dipkoprop Yesus akunum lyepsuke’ tenen, kanye lamabuka diba tenenamlulume,” nyabuk (5:13).