Abuku sekuk deiyoknye bira, Peterus ulamuk. Asurat ara, Peterus arye bitinye talak sekuk surat anya arye, el si ara, 2 Peterus nyanyabe. Peterus ara, Yesus arye wibuka deibuk mapu, sik 12 nang kan-kan ton ulamuk. Yesus ap, balamrikce, Yesus el yupu kekebuka diba tenebukce, dobolbalamuk. Tonda, aminyan talak Peterus ap, Paulus ap, epdarikce, Peterus arye Paulus ap, el seklamuk surat nirya ap, weik arye kel kiyamuk (2 Peterus 3:15-16, Galatia 1:18; 2:1-21). Peterus ara, Yahudi yalanye ulamuk bukni, Yunani yupu ton kel kiyamuk. Asurat ara, el bitinye talak arye sekuk. Ton surat ara, minop talak sekuk. Asurat bitinye talak sekuk talak ning ara, Peterus akunum wisi danamuk (1:12-15).

Peterus arye, asurat bitinye ning sekuka, diba tenen ninye dam dopkwetebuk. Asurat sekuk deiyok ara, weik aubuk bukni, ton ning ara, tilila yupu peteren nang arye duknubuka, diba tenena ninye sik kan-kan akunum wekika ati, ‘Dipkoprop ulamik ninye arye, tilila nang sik yupu kekebicak’ tenen, asurat sekuk. Ton ning ara, Peterus arye, ‘Nun deiyoknye Yesus, minopce tamubuka yanamle,’ tenebuka anya arye, asurat doprobik ninye arye, ‘Kanye talima kintinibuka, pia dinauk unamak’ tenen, asurat sekuk. Tonda, ‘Aninye sik talima wisipnamle’ tenen, asurat sekuk.