Yakobus ara, Yesus wipdeiyamuk mapu sik 12 nang kan-kan kum ulamuk.

Yakobus minyuma ara, Yesus ati diba kum tenyamuk (Yohanes 7:2-5). Bukni, aminyan talak ara, Yakobus arye Yesus ati, diba tenebukce, Yesus dobolbalamuk. Yesus ati, diba tenelamukce, aminyan talak Yerusalem mutuku diba tenelamik ninye, sik deiyoknye ton ulamuk (Galatia 2:9). Paulus arye Yerusalem mutuku biyuk talak ara, Yakobus ton epdarik (Galatia 1:19).

Yakobus arye, ‘Yahudi yala ninye diba tenelamik ninye arye, abuku dobuka bobikirye, ayupu diba tenepnamak’ tenen, abuk sekuk. Asurat doprobik ninye ara, Yahudi yala nang, Yerusalem mutuku ulamik ninye. Bukni, Yerusalem mutuku noutamak, tonoknye si ara Espanus, Yesus el laka teleb yupu peterebukba, malye nang arye keil dobuka, el nong deice cobuka obik.

Atalak arye deiya koubuka, diba tenena kum ninye arye, diba tenena ninye ati, ikin ning weik, sik nong deice delilamik. Winilamikba, Yerusalem mutuku diba tenelamik kili sal weika arye, amutuku batakuka, yuk-yuk mutuku bindobik. Aning ati ara, sik gereja deiyoknye Yakobus arye, ‘Sik kanye talima melipnamne’ tenen, abuku sekeibuk.

Yakobus arye, ‘Aning ara, weik mambule’ tenen, sekeipsuk ning ara, ‘Yesus ati diba tenenyak ninye nirya, talye yupu deice arye, “Na diba tenenune,” nyaplobuka, talye-talye kum unamak bukni, dipkoprop diksukumuk wininamak’ tenen, sekuk.