Pilemon
Paulus arye, talya pil donanye, el si Onesimus, anye taleamuknye, el si Pilemon ati, surat sekeibuk yupu
Asurat Pilemon ara, Paulus arye, Pilemon ati sekuka dopkwetebuk. Pilemon ara, Kolose mutuku ulamukce, Yesus el laka teleb yupu ati diba tenebuk. Pilemon ara, sisinanye ulamuka anya arye, el pil don nang weik talyamuk. Anang ara, yo bok deice dekukce, aninye talyamukbuk, el nyapdeiamuk pil nirya, dolamik. Asurat noutamak Paulus arye, ninye si, Onesimus, nyabuknye bira, minop talak Pilemon el pil donanye ulamuk. Winilamuk bukni, Onesimus arye, ‘Na song’ tenen, Pilemon batakuka, yuk mutuku bindobuk. Bindobukce, daulamuka ani, Paulus dam binuka Allah yupu kekebukce, diba tenebuk. Diba tenebukce, Paulus ap, neika ulamrikce, Paulus ati, melilamuk.
Ura, atalak noutamak ara, talye pil don nang arye, sik deiyok nang batakuka, yukak bindomik nang nirya ara, Roma mutuku yin talin nang arye, adiparyuk oplobik. Winilamik bukni, Paulus arye, utenebuk. ‘Na ka Pilemon ati, moropnyeba, kekepturye, “Telebe,” nyapnutopura, el pil donanye Onesimus tamubuka, Pilemon dam dopkwetepnibuk, bilyopura, Pilemon arye, Onesimus dobuka, yin talin nang kum arepnamle. Onesimus arye malye winibuk ning ati ara, namin kipturye, sik teleb ubuka neika unamrake,’ tenebukce, asurat sekuk.