Paulus arye, Yesus laka teleb yupu peterebuka deice arye, Titus kekebuka diba tenebuk (1:4). Aminyan talak, Paulus peterepra balamuk noutamak, Titus arye Paulus ati, teleb ubuka melilamuk. Paulus arye, Antiokia mutuku batakuka, ‘Na peterenun yupu laka nyalbinun’ tenen, Yerusalem mutuku biyuk talak ara, Titus ap birik (Galatia 2:1-3). Titus ap birik ati, Paulus arye Yahudi yala ninye ati, “Kume, Titus ara Yunaninye ulul bukni, Yesus ati diba tenebuka ara, akunuma. Elda den bam bol mouse ning sekena ara, kum patalule. Aning ara dauplye,” nyabuk. Nyabuka deice arye, Yerusalem Yahudi yala ninye, ‘E, Yesus ati, diba tenenyaba deice aryuk, Allah arye kanye delisulule’ tenen, bita bikik (Galatia 2:3-5).

Paulus arye, ‘Titus ara Korintus diba tenenyak ninye ati, melinamle’ tenen, Titus dobuka, Korintus mutuku dopreibuk. Aminyan talak ara, Paulus ap, Titus ap, Kerit mutuku peterepra birik. Kerit mutuku ninye ara, pia malye-malye winilamik anye arye, pil dona kumce, talye-talye ulamikce, din ning weika arye dilamik. Tilila yupu ton weik nyalamik. Winilamik ati ara, ‘Kerit mutuku diba tenebik ninye melibuka peterenamle’ tenen, Paulus arye, Titus dobuka, Kerit mutuku bobina deibuk (1:5; 2:15; 3:12-13).