Abuku 2 Timotius ara, Paulus arye, Timotius ati sekuka dopdeibuk. Paulus arye Timotius ati, abuku bitinye ning sekuka dopdeibuk ara, Roma mutuku weik ninye deiyoknye Nero birye, Paulus tapu koubuka wenena aik pum bisik dongobukura, daulamuka ani, anoutam talak arye abuku sekuka, Timotius dam dopkwetebuk. Atalak ara, Paulus arye, ‘Kume, like mitik anun ton akunum uplyopura, na opnamniak’ tenen, akunum kel bikdamuk. Aning ati, ilil kanye bobukce, ‘Timotius ara, minopce na dam yatubuk, ila tonap, eibdatinimnye’ tenen, “Timotiuso, na dam minopce yalyame,” nyabuka, abuku sekuk (2 Timotius 1:4; 4:9,21).

Timotius ap, Paulus ap, neika pil dolamrik anya arye, Paulus arye Timotius ati kanye deibuk (Pilipi 2:19-22). Abuku noutamak ara, Paulus arye, ‘Timotius arye, Efesus mutuku nang melina ati, weik mambul yupu peterenamle ning ara anye’ tenen, sekuka deipsuk ning ara, ani. “Tilila yupu peteren nang arye nyanyak yupu deice arye, Yesus el laka teleb yupu, ninye lyena yupu malye upsilyak ati, narye anti petelamkesi yupu ara, moubuka talipmince, kalikinamlyame,” nyabuk (1:14, 3:14). Tonda, “Allah yupu peterepminyebuk, ikin ning an nong deice deipkikca babye, kanye kintininauk unamlame. Peterena ara, batakna pia kume,” nyabuk (1:3-7; 4:1-8).