Paulus arye asurat sekuk. Efesus mutuku peterelbiyuk talak, minyuma ara, Timotius ap birika ati, (Rasul 19:22), Paulus arye, ‘Timotius ara, Efesus diba tenebik ninye melibuka peterenamle’ tenen, Timotius dobuka, Efesus mutuku dobuka bina deibukba, elda biyuk (1 Timotius 1:3). Paulus arye, Timotius ati, ‘Winipnulyame ayupu peterenamlyame,’ nyapnyopura, ‘Elcuk peterenamle’ tenen, asurat sekuka, Timotius dam dopreibuk.

Timotius ara, pia teleb pil donanye ulamuk. Paulus arye Listra mutuku peterebuk talak ara, Timotius kekebukce, diba tenebuka ati, Paulus arye Timotius ati, “Na mi kopropa atonun ulyame,” nyalamuk (1:2). Timotius ap, Paulus ap, sik neika peterepra balamrik mutuku ara, Makedonia mutuku tam nirya ap, Akaya tam ap (Rasul 17:14-15; 18:5), tonda Efesus mutuku ap, Korintus mutuku ap, peterepra balamrik. Tonda, Paulus arye diba tenena ninye ati, surat weik sekuka dolilamuk talak ara, Timotius ap melibuka seklamuk. Asurat si ara, Korintus, Pilipi, Kolose 1-2 Tesalonika, Pilemon.

Abuku noutamak ara, Paulus arye mambul yupu sekeipsuk ning ara ani. “Tilila yupu peteren nang arye nyanyak yupu ara, yupu seklyame,” nyabuk (1:3-7, 4:1-8). “Efesus mutuku diba tenen nang arye, Allah el si erepdeipnamak talak unamak ning ap, sik neika unamak talak, wininamak ning ati, melibuka peterepnamlye,” nyabuka, Timotius ati nyabuk (2:1-15). Tonda, “Efesus mutuku diba tenen nang, sik deiyok nang wibuka deipnamlyame,” nyabuk (3:1-13; 5:17-25).