Paulus ap, Silas ap arye, Tesalonika ninye ati Allah yupu peterelamrik. Tonda Timotius arye peterelamuk (1 Tesalonika 3:1-5). Sik nirya peterelamikba, Yahudi yala ninye ap, Yahudi yala kum ninye ap, dib tenelamik bukni, weik ning ara, Yunani ninye dib tenelamik. Bukni, malye nang arye ikin ning weik sik nong deice delilamik ati, Paulus arye, ‘Tesalonika nang sik talima melipnamne’ tenen, asurat sekdeibuk.

Abuku noutam ara, Paulus arye, ‘Ayupu ara weik mambul’ tenen, sekdeipsuk ning ara, ani. Ton ning ara, “Dib tenena kum ninye arye, ikin ning nun nong deice deipsikca babye, Yesus batakna kum, pia pi dobuka teleb wininamlulume,” nyabuk. Ton ning ara, “Allah tenesilye touk, pia diksukumuk wininamlulume,” nyabuk. Ton ning ara, Yesus arye tukwak mutuku tamubuka yanamle talak ati, yupu weik ton ap asurat noutam sekuk. Ton ning ara, “Nun du koprop Yesus dolyanamsil ati, ‘Pil dona ara, nun like,’ tenena kume,” nyabuk.