Paulus arye, Tesalonika mutuku diba tenelamik nang ati, asurat minop talak sekeibuk yupu.

Asurat minyuma sekuk talak ara, Korintus mutuku noutamak ulamuk talak arye sekuk. Tesalonika mutuku ara, weik asik dolamik mutuku ulamuk. Paulus ap, Silas ap, Timotius ap arye, Tesalonika ninye ati Allah yupu peterelamikba ninye weik diba tenelamik (1 Tesalonika 3:1-5; Rasul 17:1-4). Tesalonika ninye diba tenebikbuk, malye nang arye, ikin ning weik sik nong deice delilamik ati, Paulus arye, ‘Tesalonika ninye sik kanye tenen ning melipnamak’ tenen, asurat sekuk.

Abuku noutamak ara, Paulus arye, ‘Ayupu ara, weik mambul’ tenen, sekuka deipsuk ning ara, ani. Ton ning ara, “Diba tenena kum ninye arye, ikin ning sik nong deice deipsikca babye, Yesus batakna kum, pia pi dobuka telebuk wininamlulume,” nyabuk. Ton ning ara, “Allah tenesilye touk, pia diksukumuk wininamlulume,” nyabuk. Ton ning ara, “Ton nang dib tenebik bukni, Yesus arye tukwak mutuku tamubuka min kum yanmalye talak ara, akunum dibicopura, Kristus dam binuka unmakibuk, aminyan talak ara, Kristus ap neika tamubuka yanamake,” nyabuk. Ton ning ara, “Asum-asum nirya ara, anggun pil teleb ubuka donamlume. Nun du koprop Yesus arye dolyanamsil ati, ‘Pil dona ara, nun like,’ tenena meme,” nyabuk.