Abuku sekuk deiyoknye bira, Paulus ulamuk. Abuku ara, Kolose mutuku ninye ulamikce, Yesus dib tenelamik ninye ati sekuka dopkwetebuk. Asurat sekuk talak ara, Roma mutuku noutamak bukni, wenena aik dongamik talak arye, Yesus dib tenen ninye ati, surat weik sekuka dolkwetelamuk. Ton ning ara Efesus, ton ning ara, Kolose, ton ning ara Pilipi, ton ning ara Pilemon sekuka dopkwetebuk. Paulus arye, Efesus mutuku peterelamuk talak noutamak, tonoknye el si ara Epafras dib tenebukce, Yesus el lak teleb yupu dobuka, Kolose mutuku ninye ati, peterelbiyukura, ninye weik dib tenebik. (Rasul 19:10, Kolose 1:7-8)

Abuku noutamak ara, Paulus arye, ‘Ayupu ara weik mambule’ tenen, sekdeipsuk ning ara, ani. Ton ning ara, tilila yupu peteren nang arye malye yupu peterelamik ati, Paulus arye asurat deice lipsisikuka peterebuk. Ayupu ara, ani. “Dina yala-yala nirya ara diptibye, din yala nirya ara, aning ara mem ning anya arye, kum dinamabe,” kum nyaptibye. Aning atonun, “Mem pil yala-yala nirya dawaplye,” nyabuk. “Kristus ara, aning-aning nirya talibuka ulirye, nun weik deiyoknye usulule ati, el siuk erenamabe. Kristus arye, Allah danatam, ninye danatam, ansinilina deiyoknye usulule. Im deice pil donang, sik malaikat ara, mambul unyak bukni, anggunda mitik mambule. Kristus ara, weik mambul ulule,” nyabuk.