Paulus, Pilipi mutuku diba tenelamik ninye ati, asurat sekuk. Abuku sekuk deiyoknye bira, Paulus ulamuk. Abuku ara, Pilipi mutuku ninye ulamikce, diba tenelamik ninye ati sekuka dopdeibuk.

Paulus abuku sekuk talak ara, Roma mutuku noutamak bukni, wenena aik dongamikba, asurat sekuka, Pilipi mutuku diba tenen, ninye ati dopdeibuk. Pilipi mutuku ara, Roma mutuku weik deiyok nang talyamik. Pilipi ninye kan-kan noutamak, yin talin nang weik ulamik. Sikda yin talina pil dolamik bukni, aning batakuka amutuku yanuka ulamik. Roma mutuku deiyok nang tuku arebikbuk, atuku talibuka amutuku ulamik. Tonda, yuk talye ninye ton, amutuku noutamak ulamik. Amutuku ara weik asik dolamikaruma domik mutuku kume.

Abuku noutamak ara, Paulus, ‘Ayupu ara weik mambule’ tenen, sekuka deipsuk ning ara, ani. Ton ning ara, yuk ninye amu tam una ap; nimalye una ap; ‘Allah arepnuk pil donamne’ tenen, pia pi deibuka, mikip pil dona ap; ‘Se, yata upnamne do?’ tenena kum aryuk, kanye deibuka una ap; ‘Allah el mikip deice meliniliba, elce arinulul pil nirya doptinya’ tenen, una ap ati, ayupu nyabuk. Tonda, Kristus, aning-aning deice tam ulamuk bukni, aning nirya batakuka, ninye atonun dayukce, nun dam tukwak mutuku yanuka lyepsuk ning ati, ayupu nyabuk.