Abuku sekuk deiyoknye bira, Paulus ulamuk. Paulus birye, Yesus ati diba tenebukce, Yesus dobolbalamukce, Allah yupu buku weik sekamuk. Abuku ara, Galatia tam ninye ulamikce, diba tenelamik ninye ati sekuka dopdeibuk. Amutuku noutamak ara, Paulus peterelbalamuk. Minop talak peterepre balamukba, diba tenelamik ninye ulamik mutuku si ara, Antiokia ap, Ikonium ap, Listra ap, Derebe ap uamuk. Tonda Galatia tam kili sal ati peterelamuk.

Abuku noutamak ara, Paulus birye, ‘Ayupu ara weik mambule’ tenen, sekdeipsuk ning ara, ani. Sik Yahudi yala nang arye, Galatia tam diba tenelamik nang ati, nyalamik. “Kume, Musa sekamsuk mem yupu ara, tuba talibuka dobolbanamlume. Minop talak den bam bol mouse ning seklamubu ning ap, ‘Adin ning ara, mem ning ati, kum dinamabe’ nyabuka, peterelamubu mem ning nirya babye, talibuka unamlulume,” nyalamik. Nyabikce, sik nong deice ikin ning weik delilamika ati, Paulus birye asurat sekuk.

Paulus birye nyabuk. “Kume, Yesus ati diba tenebibya deice aryuk, Allah arye lyesulule. Mem yupu talibuka dobolbana ap, yuk pil aning-aning nirya don deice arye, teleb kibuka kum lyepdatibye. Allah el kanye aryuk bico tenesilirye, lyesulule. Deiyok ara, Kristus arye pil dopsukce, nun pununa ati dipsuka ara, kel kibibirye, diba tenenyaba deice arye, Allah lyesulule.