Abuku sekuk deiyoknye bira, Paulus ulamuk. Allah arye ‘Paulus bira na yupu dobuka, Yahudi yala kum ninye peterelbinamle’ tenen, Paulus wepdeibuk.

Korintus mutuku ara, weik asik pia weik dolamik. Yunani ninye pia weik amutuku ulamik. Korintus mutuku noutamak ara, ton ninye ara, Yesus ati dib tenelamikce, teleb ulamik bukni, anang kan-kan babye, tilila yupu peteren nang ninye duknubuka peterelamik. Aning ati ara, ‘Korintus mutuku ninye, mankau kanye bobuka, tilila yupu dib tenebicak’ tenen, Paulus arye asurat sekuk.

Abuku noutamak ara, Paulus arye, ‘Ayupu ara weik mambul’ tenen, sekdeipsuk ning ara, ani. “Minop talak narye, ‘Anggun dam dilyanamsine,’ nyapsise bukni, kum yasa ara, deiyok ton aupmale anya arye, ‘Paulus ara, talye yupu nyaplopsuke,’ nyana meme,” nyabuk. Tonda, “Yerusalem mutuku unyak ninye, pia bona utotowa talina kum ninye unyaka anya arye, aninye sik melina ati, yo bok bulubuka deiplum ning ara, kintinipnamlulume. Aripnumunyopura, na bobinirye, Yerusalem mutuku unyak ninye arepnamnea anya arye, adiparyuk yo bok bulubuka kintiniplulume,” nyabuk. Winilye ning ara, “Sik ti lila yupu peteren nang arye, na Paulus ati, ‘Elda talinye,’ nyalamnik bukni, Yesus arye wipdeipnuka ati, el yupu peterena deiyok kouna deiyoknye unune. Malye winin ninye ati ara, sik dam yanyopura, anang ati mikip arye wenepnamne,” nyabuk.