Abuku sekamuka deiyoknye bira, Paulus ulamuk. Yesus ati, min diba kum tenyamuk talak ara, Paulus birye, ‘Yesus diba tenenyak ninye nirya kum danamake’ tenen, yu weiknye ulamukce, ikin ning sik nong deice pia weik delilamukce, kili sal weik oltaklamuk. Bukni, Yesus ati diba tenebukce, el malye ulamuk ning nirya batakukce, Yesus el yupu talibuka dobolbalamuk. Tonda, ‘Yahudi yala kum ninye ton, diba tenenamak’ tenen, Allah yupu buku weik seklamuk.

Korintus mutuku noutamak ara, ton ninye diba tenelamik bukni malye una ning weik winilamik. Ton ninye ara, telebuk winilamik. Ati ara, yuk ninye arye, Paulus dam lak nyamikba, Paulus arye sik Korintus mutuku kili sal wenena ati, asurat sekuk.

Abuku noutamak ara, Paulus birye, ‘Ayupu ara weik mambule’ tenen, sekdeipsuk ning ara, ani. Allah arye, ‘Yahudi nang babye, Yahudi yala kum nang babye, ninye nirya malyeuk unyaka ati ara, ninye yupa weik lyepnamne’ tenen, Kristus dopdeipsukba, wanwanun yo deice obikba, nun pununa ati dibuka deice arye nun lyena deiyok ning kintineipsuke. Alyena deiyok yupu ap, akunum diba tenebibiba, lyesilyopura, Kristus ap talima dukdongobuka, kam pia unamap ning ap nirya ara, ‘Min kum unamsile,’ nyapsuk ning ap, aupmale.