Abuku sekamuka deiyoknye Paulus bira, Allah arye, ‘Anye bira, na yupu dobuka, Yahudi yala kum ninye unyak mutuku peterelbinamle’ tenen, Paulus wipdeibuk.

Paulus ara, Yesus min diba kum tenyamuk talak ara, Paulus birye, ‘Yesus diba tenenyak ninye nirya kum unmak’ tenen, ton nang ara, tapu koubuka, wenena aik dongolbalamuk. Ton nang ara, oltaklamuk. Elda pia yu weiknye ulamuk bukni, el malye ulamuk ning nirya batakuka, Yesus diba tenebukce, Yesus talibuka dobolbalamuk. Tonda, ‘Yahudi yala kum ninye diba tenenamak’ tenen, Allah yupu buku weik seklamuk. Abuku Roma ara, Roma mutuku ninye ulamikce, Yesus ati diba tenyamik ninye ati, sekdeibuk.

Abuku noutamak ara, Paulus birye, ‘Ayupu ara, weik mambule’ tenen, sekdeipsuk ning ara, ani. Allah arye, ‘Ninye nirya, Yahudi nang babye, Yahudi yala kum nang babye, malyeuk unyaka ati ara, kili sal weik arye lyepnamne’ tenen, Kristus dopdeiamsukba, wanwanun yo deice obikba, nun pununa ati dibuka deice arye, nun lyena deiyok ning kintineipsuke. Kristus pil dopsuka deice, Allah el kanye aryuk, Yesus ati diba tenenyak ninye nirya, ‘Diksukum ubuka unyake,’ nyalilamsilule. Lyepsilyopura, Kristus ap talima dukdongobuka, kam pia unamap ning ap nirya ara, kume kum danamle.