2 Winibukopura, Allah arye Babel mutuku noutam ap, Siria mutuku noutam ap, Moab mutuku noutam ap, tonda Amon mutuku noutam ap ulamikce, yin talibuka ninye talye-talye olamik nang nirya ara, dopdeibukba, Yoyakim biti malye kibukabikce, Yehuda mutuku noutam ulamik ninye nirya, yanuka obuka, sirya dakmanto ubik. Ara, talye ati kuma. Deiyok ara, Allah el yupu nyapdeipniba, laka nyana deiyok nang, sik nabi-nabi nang, sik dam nyapdeiamukba, sikce Yehuda mutuku ninye kekenak, “Allah arye nun wenena ati, lo arepsiliba, yuk pera mutuku nang arye, winipnamsiyake,” nyabuka, laka nyapdeiamik touk winibik.

3 “Dipkoprop aning ara, winipnamsiyake,” nyabuka, Allah Yahweh, elce akunum nyapdeiamuka anya arye, aning atonun winibik. Ara, Yehuda tam ulamik ninye, sik malye una ati, Allah Yahweh arye, “Narye wenena ati, lo arepniba, pera mutuku yu nang arye yanuka, Yehuda tam unamak ninye nirya ara, sikti, areamse mutuku noutam arye, yakuka donoknamake. Winipnamaka deiyok ara, Raja Manasye birye, ninye deiyok kibuka, taleamuk talak arye, malye-malye ning pia weik ulamuka ati, Yehuda tam unamak ninye ati, yakuka dokwetepnamake,” nyapdeiamuk touk winibik.

4 Tonda, Raja Manasye birye, weik malye uamuk ning ara, sik malye kum ulamikce, talye kanye bobuka ulamik ninye, Yerusalem mutuku noutam daulamik ninye, weik tonun obuka, batakamuk ning, deken ati ara, Allah arye, lo arebukba, sik pera mutuku yu nang arye yanuka, Yehuda tam ulamik ninye yakuka, dokwetebik. Allah Yahweh arye, Raja Manasye birye, Raja kiamuk talak noutam arye, malye ulamukopura, ‘Luba kipnirye, kum lyepnamne,’ tenebuka ati, Yehuda tam ulamik ninye nirya ara, adiparyuk batakuk.

5 Ura, Raja Yoyakim ninye deiyoknye kibuka taleamukce, pil domuk ning ap, yupu nyalamuk ning ap, daulamuk ning ap, ton yuk ning nirya ara, Yehuda mutuku ulamik ninye, deiyok kibuka, talibuka ulamik nang, sik si seklamik buku noutam sekuka deiamik. Abuku si ara, ‘Sejarah Raja-Raja Yehuda,’ nyabik. 6 Raja Yoyakim akunum dibukopura, el punubuka Raja kina ati, elce deiamuk mi, el si Yoyakin, elce Raja kibuka, Yehuda tam ulamik ninye talibuka ulamuk. 7 Ura, atalak noutam arye, Babel mutuku ninye deiyoknye, Raja Babel birye, mitik mek si ara, Mesir mek, asukum arye dipdongobuka, Efrat mekin tam bukni, anoutam uamuk mutuku nirya ara, binamuka ani, alubuka doprobuk. Aning ara, outam dabu tam mutuku ara, minop talak Raja Mesir, elce taleamuk mutuku tuku wililamikak nirya ara, Raja Babel biryuk, malye kibukce taleamuk. Anya arye, Mesir mutuku ninye talibuka, ulamuknye birye, amutuku noutam ton binuka, pia kum olbalamuk. El mutuku noutamuk ulamuk.

8 Ura tonoknye el si Yoyakim bira el keting tamun yupa ara, delapan belas tahun ulamuk talak ara, Yehuda yala ninye, sik ninye deiyoknye deiyok koubuk. Elce Yehuda tam taleamuk talak ara wala weik kume. Winilye wala deice aryuk, Yehuda yala ninye sik ninye deiyoknye ulamukce, Yerusalem mutuku noutam ulamuk. El lin si ara, Nehusta. Akil ara, Yerusalem mutuku kil ulamukce, el li koproba ara, Elnatan ulamuk. 9 Yoyakim el li koproba ara, Allah el si Yahweh arye, ‘Awinin ning ara, na like. Aning ara malye,’ tenelamuk ninguk winilamuk touk, el mi Yoyakim babye, aning atonun winilamuk.

10 Atalak ara, Yoyakim birye Yehuda yala ninye talibuka ulamuk talak ara, Babel mutuku ninye deiyoknye Nebukadnesar birye, el yin talin nang ati nyabukba, Yerusalem mutuku yanuka warikik.^a

11 Ura, atalak ara, Babel mutuku ninye deiyoknye Nebukadnesar birye, Yerusalem mutuku dam dilyayuk. Dilyayuk talak ara, el amu tam yin talina deiyok nang arye, ‘Yerusalem mutuku yanamap’ tenen, amutuku dana-dana domik keil poka dam tuku palibuka delinmekba eibuk. Atalak ara, el yin talin nang arye, amutuku nirya yanuka warikuka denepdongamik ning ton eibuk.

12 Yanuka warikikopura, Raja Yehuda Yoyakim nyalamiknye ap, el lin ap, el amu tam bukni, weik deiyok nang ap, tonda el patalamuk pil dona deiyok nang ap, ‘Babel nang arye, oplopsicak’ tenen, sik ninye on ning nirya deiplobikce, ‘Nun akunuma,’ nyabikopura, Raja Babel arye, amutuku nang nirya bisibukabukce, tomobuk. Winibukce, Raja Babel mutukunye birye, el mutuku Babel taleamuka ani, keting tamun delapan tahun ning akunum kibuk talak ara, Raja Yehuda el si Yoyakim bisibukabukce tomobukce tapu koubuka bobiyuk.

13 Anang nirya tomobukopura, minop talak Raja Salomo birye, Allah el si Yahweh el si eren aik domukce, anyaik pum tam deiamuk dekna weik ning nirya ara, ubula dobuk. Ara, anyaik pum tam ap, tonda Raja Salomo el aik pum tam ap, dekna weik ning, kum nukmanto weik dongolamuk ning aning-aning nirya ubula dobuk. Tonda, Raja Salomo birye, Allah el si eren aik pum tam pil dona ati, dekna weik ning el si emas dobuka, apil don ning weik arye, kintinip deiamukce, anyaik pum tam deiamukba, awamuk ning nirya ara, Nebukadnesar birye ubula doprobukce, aning-aning nirya sekuka mitik-mitik nun kipdeibukce, libuka bobiyuk. Anyaik bitinye noutam uamuk kat ning nirya ara, dobukabikce, Babel mutuku bobiyik. Babel ninye deiyoknye birye, aning winibuk nirya ara, Allah el si Yahweh minop talak arye, ‘Wininamle,’ nyabuka akunum nyapdeiamuk touk winibuk.

14 Aning atonun Yerusalem mutuku ulamik nang weik nang ara, tapu koubukabikce, Babel mutuku bobiyuk. Ara, Raja Yoyakim ap, el amu tam weik deiyok nang ap, el yin talin ati deiyok nang ap, talye yin talibuka mikip deibuka oldan nang ap, aning-aning ayala-yala nirya kintinina deiyok nang ap, ikin ning, urasin teleb ning pil dona deiyok nang ap, tomobuka bobiyik. Anang nirya ara, ninye ara yupa weik, sepuluh ribu nang tapu koubukabikce bobiyik. Anang, bona weik talin nang ap, ikin pil dona deiyok nang nirya ap, aik dona kel nang ap, nirya Babel mutuku bobiyik. Batakuka biyik nang ara, mikip kum mitang ninye ap, talye bona utotoa talina kum ninye ap, kum bobiyik. Anang ara, Yerusalem mutuku noutamakuk batakikba daulamik.

15 Ati ara, Babel mutuku weik deiyoknye Nebukadnesar birye, Yehuda tam ninye nirya bisibukabukce, sik deiyoknye Yoyakim tapu koubukabikce, Babel mutuku bobiyuk. Aning atouk, Yoyakim tomobukabikce, el lin ap, el kilapu ap, el amu tam pil dona deiyok nang ap, tonda, Yehuda tam deiyok nang nirya bobuka Babel mutuku delilbiyik. 16 Atonun ninye mikip weik dobuka se tenebuka ulamik nang, sik yin talin nang bobiyik. Anang ara, yuk mutuku nang olbinmanto nang ara, tapu koubuka yupa weik tujuh ribu nang ap, aik dona kel nang ap, aning-aning, urasin teleb ning nirya weik kel arye, kintinina deiyok nang ap, yupa weik seribu nang tapu koubuka Babel mutuku bobiyik.

17 Winibik talak ara, Babel mutuku ninye deiyoknye Nebukadnesar birye, Yokakim el pununa ati, el mam koprop Matanya wipdeibukba, anye birye Yehuda yala ninye tuba batakik ning ap, Yerusalem mutuku ap, taleamuk. Anye el winiryuk sisina ati ara, Nebukadnesar birye, anye biti, ‘Minop talak ara, an si Mantanya nyalamkik bukni, an winiryuk si ara, Zedekia nyabuka si sisipmakine,’ nyabuka sisibuk.

18 Ura, Zedeikia elda keting tamun yupa ara dua puluh satu tahun kibuk talak ara, Yehuda yala ninye sik ninye deiyoknye deiyok kibuka ulamuk. Elce keting tamun sebelas tahun deice arye, Yerusalem mutuku noutam ulamukce, Yehuda yala ninye taleamuk. El lin, el si ara Hamutal. Akil ara, el li koproba ara, Yeremia ulamuk. Akil el mutuku koprop ara, Libna mutuku kil ulamuk. 19 Anye Zedeikia babye, Raja Yoyakim mince malye-malye weik winilamuk touk ulamuk. Ninye deiyoknye Raja Yoyakim ulamuk talak ara, malye weik winilamuk touk, el mam koprop Zedekia babye, malye weik winilamuk. Winilamuk ning ara, Allah eililamukce, ‘Aning ara, pia malye,’ tenelamuk.

20 Ura, aweik kanye imun ning nirya ara, Yehuda yala ninye nong deice uamuk ning ara, urdem ati kume. Deiyok ara, sik Yehuda yala ninye malye weik winilamika ati ara, Allah el si Yahweh arye, sik Yehuda yala ninye ap, Yerusalem mutuku ulamik nang nirya ap ati, wenebuka derebukce batakuk.

Lik ubuk ati Yehuda yala ninye batakukce, ‘Amutuku ulamak nang ara, wenenamne’ tenen, el dam arye, sikti, yakuka dopkwetebukba, Babel nang arye, aninye tapu koubukabikce, sik mutuku bobiyik.

Ura, atalak aryuk kum bukni, aminyan talak ara, Raja Zedekia birye, ‘Babel mutuku ninye deiyoknye, yanibuka bataknamabe,’ tenen, piripdeyuk.