2 Winibikopura, tuba warikinauk ulamik. Winilamika ani, keting tamun bitinye deice arye, ton tuba warikil yangalamikce, amutuku tuba ulamik. Zedekia birye, Yehuda tam taleamuk keting tamun sembilan deice arye, keting tamun sebelas ning noutam, tuba warikil yanganauk ulamik. Babel mutuku nang arye, Yerusalem mutuku wariklamik talak noutamak ara, Yerusalem mutuku nang arye, talye, bai tam kum binmanto ulamik. Tonda, yuk nang bai tam arye, asik tam kum yanmanto ulamik. Ati ara, sik din kum dayukba, din bulunguk ulamikce, ikin weik ulamik.

3 Winilamika ati, wala dumbarye, noutam bukni, inina topne barye, ning akunum ubukopura, Yerusalem mutuku noutamak ara, din pia kum dayuka ati, amutuku ulamik ninye din pia kum dilamik ati ara, din weik arye, patalamukba, imun kanye weik bolamik.

4 Winilamik bukni, atalak ara, sik Babel mutuku wariklamik nang arye, akeil poka noutam bisik potokikopura, alukunyan uk sik Yerusalem mutuku yin talin nang nirya ara, amutuku batakuka bura sakuka bindobik. Sik bindobika ara, amutuku ninye deiyok Rajanye el wa win dam bukni, akeil poka pum bisik ara bisik bublan botobukabikce kintinip deiamik, poka abilinga bitinye noutam arye, bindobikce buru sakuka biyik. Sik yin talin nang ara, bindobik talak ara, sik Babel mutuku arye, yanmek yin talin nang ara, Yerusalem mutuku dana-dana nirya antanap dongobuka tuba warikina uk unmek bukni, Yerusalem yin talin nang bikbik abuka bindobikba, kum eibik. Yehuda yala yin talin nang nirya bai sakukabikce bikbik abuka Araba mutuku lyu bisik biyik.

5 Yehuda yala yin talin nang ap, sik Rajanye ap, Yerusalem batakuka bikbik abuka bai bindobik bukni, Babel mutuku yin talin nang nirya arye, ‘Anang tomopnuyap’ tenen, sik aminyan tam bikbik abuka dobolbanmekce, Yeriko mutuku lyuak noutam arye, Yehuda tam ninye deiyoknye Zedekia tomobik. Zedekia, el yin talin nang nirya ara, malye kanye bobikce, el batakuka ton tam yuk-yuk kibuka bindobikopura, el tonok ara, yukak bindobuk. Winibuka anya arye, sik Babel mutuku yin talin nang arye, Raja Zedekia tomobik.

6 Yehuda ninye deiyoknye Raja Zedeikia tomobukabikce, Babel mutuku ninye deiyoknye dam, mutuku si Ribla mutuku ulamukak bobiyik. Winibikopura, ‘El minopce, yata wiripnamap do?’ tenen, yupu talipmekce, elti, yupu bokeibikce, weik ikin ning el nong deice uk deibik. 7 Winibikopura, el adinmokbuk, el mapu nirya oplobik. Obikopura, Raja Zedekia el asing lukrobik. Winibikura, weik arye, malye nyanmok bukni, kat ning el si tembaga arye, kintinibik tapu arye, el taruk tapu koupdongobikce, Babel mutuku bobiyik.

8 Ura, Babel mutuku talina ati, ninye deiyoknye, el si Nebukadnesar birye, amutuku taleamuk ani, keting tamun sembilan belas (19) ning akunum ubukopura, tonda wala pamubarye, bukni, tanggal 7 ubukba, el amu tam pil dolamuka weiknye el si Nebukadnesar dopdeibukba, Yerusalem mutuku biyuk. Anye bira, Raja Babel el kalikna ati yin talin nang, sik deiyoknye ulamuk.

9 Nebukadnesar birye, Yerusalem mutuku yayukce, Allah el si Yahweh, el si eren aik domik ning ara, uku dongobuk. Tonda, Yehuda tam ninye deiyoknye el weik aik ton uku dongobuk. Aning atonun, Yerusalem mutuku noutam anyaik-anyaik dolamik ning nirya ton uku dongobukba, anyaik nirya uku dibukce kum dayuk. Aninguk kum bukni, Yerusalem mutuku weik aik nirya uku dongobuka sirya dakik. Tonok ning babye, kum batikik.

10 Winibikopura, atalak aryuk, sik Babel mutuku deiyoknye Raja, el kalikna ati yin talin nang, sik weik deiyoknye Nebukadnesar birye nyabukba, el yin talin nang arye, Yerusalem mutuku antanap dongobuka dobuka wilyamik keil poka nirya dakuka uluplobik. Winibik ning, Raja Nebukadnesar, el kalikna ati yin talin nang, sik deiyoknye Nebukadnesar birye, ‘Wininamlume’ nyabukba, poka uluplobik.

11 Uluplobikopura, Yerusalem mutuku noutam ton batakmekba, tuba unmek ninye nirya tapu koubukabikce Babel mutuku bobiyik. Aning babye, Nebukadnesar birye, ‘Winiplulume,’ nyabukba, Yerusalem mutuku tuba unmek ninye, talye ninye ap, tonda, ‘Babel mutuku nang, sik tam kipropnamabe,’ tenelamik nang ap, tapu koubukabikce Babel mutuku bobiyik. 12 Yerusalem mutuku ulamik nang weik nang ara, Babel mutuku bobiyik bukni, ‘Amutuku wa wipra unamak’ tenen, talye bona utotoa talina kum ninye wibuka bokukabikce, Raja Babel el kalikna ati yin talinanye birye nyabukba, anang batakuka asukumuk ulamikce, anggur tapu wa ap, yuk yala wa ap wipra ulamik.

13 Babel mutuku nang arye, Yerusalem mutuku sirya obuka dakik talak ara, dekna weik ning ton uluplobikce, aning bobuka sik mutuku bobiyik. Aning ara, Allah aik koprop ayukumna kat ning tembaga arye, moubuka, bitinye bintinip deiamik ning ap, tonda kat ning tembaga arye, kintinyamik meja dobuka bobiyik. Tonda weik pala ning memamikce, mek kwebuka dikildongolamik ning,^b aning memelamik ning babye dobuka bobiyik. Aning nirya ulubuka doprobikce, kat ning tembaga ara dobuka, sik Babel nang arye, sik mutuku Babel mutuku uk tamubuka bobiyik.

14 Winibik talak aryuk, sik Babel mutuku yin nang arye, Yerusalem mutuku Allah si eren aik koprop diamik ning nirya ubula doprobik. Ara, panci mek kwebuka yun ning ap, sikop ap, weisa minyak mek pum tam uku singilamle ning sekna ati kunting ap, tonda nintong teleb ning delina piring ap, tonda Allah el si eren aik pum tam pil dona ati, tembaga kat ning arye, memamikce anyaik koprop diamik ning aning-aning nirya bobukabikce sik mutuku Babel bobiyik.

15 Tonda aning babye atonun, Babel mutuku ninye deiyoknye, el kalikna ati yin talinanye birye, el si ara, Nebuzaradan ulamuk. Anye birye Allah el si eren aik pum tam noutam diamik ning, dekna weik ning el si emas ap, perak ap arye, merekeiamik ning ton dobuk. Ara, ‘Allah moropnuyap’ tenen, nintong teleb ning deiamikce, uku dalamik kat ning dobuk. Tonda kam ning opna arye, ining dobuka likeiamik mek makau ap, aning nirya dobuk. Aning nirya ara, dekna weik ning, emas ap, perak ap arye, memepdeiamik ning nirya ayin talinanye birye doprobukce, Babel mutuku bobiyuk.

16 Minop talak Raja Salomo birye, Allah el si eren aik dona ati, ayukumna bitinya ning ara, kat ning el si tembaga deice arye, domuk ning ap, tonda tembaga arye, domukce anyaik pum tam deiamuk meja ap, tonda mek ilikina ap, teleb kweimdina ap ati, weik pala mek makau domuk ning ap, aning nirya ara, ayin talinanye birye, ubula dobuk. Aning nirya ara, tembaga arye, domuk ning ara ikin weik ati ara, el ikin ara kum erebuka nukmanto ubuk. Pia weik ubuk.

17 Ura Raja Salomo birye nyabukba, abitinye ayukumna yo yuk-yuk deipdongamik ning ara, sik cang ara delapan meter ap, ton mitik tonun ton winiprik. Abitinye kat ayukumna yo bukni, deice tam kisok dubak ara, el cang ara 1.3 meter uamuk. Aning urasin deice ara, amutuku pia teleb yo duk el si delima, ayo duk urasin atonun gambar memebuka deiamik. Tonda rantai tapu urasin atonun ning ton memebuka deiamik. Otam kat ayukumna yo babye, el kisok dubak ara aning atonun yo duk delima urasin atonun memepdeibik. Aning memebuka deiamik ning ara, ‘Anyaik urasin teleb upnamle’ tenen, teleb kibuka domik.

18 Nebuzaradan birye, Yehuda yala nang, weik nang ton tapu koubukabikce, el deiyoknye Raja Babel dam bobiyik. Elce bobiyik nang ara, ani. Tonoknye bira Allah el si eren aik pum tam pil dona ati, deiyok nang, sik weik deiyoknye, el si imam Seraya tomobuka bobiyuk. Tonda, el amu tamnye bukni, mitik utam imam pil dolamuknye, el si imam Zefanya ap, bobiyuk. Tonda Allah el si eren aik bublan damak nang talibuka kalikna deiyok nang winilye bobiyuk. Anang nirya talibuka tapu koubukabikce Babel mutuku bobiyuk.

19 Tonda, Yerusalem asik noutam tuba ulamik nang noutamak arye, yanuka tomobuka tapu koubuka bobiyik nang ara, ani. Tonoknye bira Yehuda yala yin nang, sik deiyoknye ap, tonda Yehuda ninye sik ninye deiyoknye, el amu tam bukni, yupu nyana ap, yupu lak nyabuka melibuka nyana deiyok nang pamubarye, ap, tomobuka bobiyuk. Anang ara, Rajanye biti, ‘Winibuka-winibuka winina ara, telebe. Winipnamtibye ning ara, ani,’ nyabuka el yupu melin nang ulamik.

Tonda, Yehuda tam ninye deiyoknye, el weik ning sekne ap, amutuku ninye si sekne ap, asekna deiyoknye, Sekretaris Negara ton tomobuka bobiyuk. Anye el pil dolamuk ning ara, ‘Ikin pil dibipyeba, ninye arye, pil donamsiyak’ tenelamik talak ara, anye birye aninye wibuka sik si seklamuk. Sik Babel yin nang arye, anye ap, el amu tam pil melibuka dolamik nang enam puluh nang ap, tomobukabice, tapu koubuka Babel mutuku bobiyik. Anang ara, Yerusalem mutuku noutam tuba ulamikba, tomobuka Babel mutuku bobiyik.

20 Anang nirya ara, Babel mutuku yin taleamuka deiyoknye, el si Nebukadnesar birye, nyapdeibukopura, el yin nang arye, sik Yehuda nang tomobukabika tapu koubikce, Babel, mutuku ninye deiyoknye, Raja Nebukadnesar dam bobiyik. Raja Nebukadnesar ara, Ribla mutuku ulamukak, sik Yehuda yala nang tomobuka delilbiyik. 21 Winibikura, Babel mutuku ninye deiyoknye birye nyabukba, Hamat tam noutamak bukni, mutuku si Ribla mutuku uk, sik Yehuda yala nang nirya oplobik.

Ati ara, sik Babel mutuku nang arye, Yehuda yala ninye obuka sirya dakikce, Yehuda yala ninye ulamik mutuku noutam arye, tapu koubukabikce, bobuka Babel mutuku, binuka deiplobik. Atalak arye, deiyok koubuka dolyanamuk talak noutamak ara, Yehuda yala ninye sik mutuku tamubuka binmanto kum ulamika ati, sik Babel mutuku nang arye, ikin ning weik sik nong deice delilamikba, sik amu tam ulamik.

22 Babel mutuku yin talin nang arye, Yehuda yala nang, sik deiyok nang akunum tapu koubuka Babel mutuku bobiyikopura, Babel mutuku ninye deiyoknye Raja Nebukadnesar birye utenebuk. ‘Yehuda yalanye, el si Gedalya ara, Yerusalem mutuku noutam batakamik nang, Yehuda yala ninye, sik ninye deiyoknye Gubenur kipnamle’ tenen, erepdeibuk. Gedalya el li koproba ara, Ahikam. Ahikam el li koproba ara, Safan.

23 Ura, Babel weik deiyoknye birye, ‘Gubenur kipnamle’ tenen, Gedalya erepdeibukopura, yuk nang arye, lak nyalamikba, Yehuda yala yin talin nang, sik weik deiyok nang ap, sik amutuku talye yin talin nang ap, nirya kekebik. Kekebikopura, Gedalya Mispa mutuku unmokak biyik. Sik biyik nang ara, Netanya el mi Ismael ap, Kareah, el mi Yohanan ap, tonda Netofa mutukunye Tahumet el mi Seraya ap, Makha mutukunye el mi Yasanya ap, sik nirya Gedalya mutuku dam biyik. Sik biyik talak ara, sik amu tam talye yin talin nang ton melibuka biyik. Sik nirya ara, Gedalya mutuku dam biyik.

24 Biyikopura, Gedalya birye ayin talin deiyok nang ap, sik melina nang ati, nyabuk. “Sik mutuku ara, Babel mutuku nang, weik deiyok nang ara, nun Yehuda tam talinamsiyak bukni, ilil una kume. Amutuku noutamak ara, talye kanya aryuk unamlume. Babel mutuku ninye deiyoknye Raja Nebukadnesar birye, ikin pil dopsilirye arenamsil ning nirya ara, talye kanye bopmunce, el piluk dolamunyeba, aminyan talak aning-aning nirya telebuk unamsile. Aning ara anyapmasin touk, dipkoprob wininamsile, nyapsine,” Gedalya birye mikip arye, nyapdeibuk.

25 Nyabuk bukni, Babel mutuku talina ati, ninye deiyoknye, el si Nebukadnesar birye amutuku taleamuk bukni, keting tamun sembilan belas (19) tahun akunum ubukopura, tonda wala tekbarye, wala noutam arye, Rajanye el tamnye el si Elisama, elce deiamuk mi Netanya, anye elce deibuk mi Ismael ap, el melin nang yupa takobarye, nang ap nirya, Gedalya dam biyik. Sik nirya Gedalya mutuku dam biyikce, Gedalya oplobik. Gubenur Gedalya obik talak ara, Gedalya ap, Mispa mutuku neika ulamik Yehuda yala nang ap, tonda el ap, neika ulamik Babel mutuku nang ap, oplobik.

26 Obikopura, sik Yehuda yala ninye, amutuku tuba ulamik ninye nirya ara, ilil weik ubukba, adiparyuk, amutuku batakuka Mesir mutuku sakuka bindobik. Ara, Yehuda yala ninye bona utotoa talin nang, weik nang babye, talye noutamak ninye, talye mambul kum ninye babye, tonda sik yin talin nang, deiyok nang nirya babye, ‘Babel mutuku yin talin nang arye, yanuka opsicak’ tenen, ilil ubukba, adiparyuk Yerusalem mutuku batakuka, bikbik abuka Mesir mutuku bindobik.

27 Ura Babel mutuku nang arye, Yehuda tam ninye obuka sirya dakikce, sik ninye deiyoknye el si Yoyakim ap, tuba kam ulamik nang ap dobuka, tapu koubukabikce, Babel mutuku bobiyikce, asukumuk deiamik bukni, atalak arye, dipdongobuka keting tamun 37 akunum ubukopura, Babel ninye deiyoknye birye, Yehuda deiyoknye Yoyakim lopdeibuk. Ara, owala noutam bukni, tanggal 27 deice arye, Raja Yoyakim lopdeibukba, amutuku wenena aik deiamik noutamak arye, anyaik batakuka buru tam biyuk. Atalak ara, Babel mutuku ninye deiyoknye, el si Raja Erwil-Merodakh birye deiyok kibuka, Babel mutuku ninye deiyoknye tikukce amutuku taleamuk. Babel mutuku ninye deiyoknye kiamuk talak arye, bico tenebukce, Yoyakim lopdeibuk.

28 Babel mutuku ninye deiyoknye, el si Ewil-Merodakh birye, Yehuda yala ninye sik Raja Yoyakim biti, bico tenebukce, teleb yupu nyalamuk. Winilamuk talak ara, yuk Raja nang ton, sik ap, Babel mutuku noutamak ulamik bukni, aRajanye birye, sik ayuk Raja nang nirya ati ara, ‘Sikda mitik mambul uka,’ tenelamuk. Bukni, Raja Babel, el si Ewil-Merodakh birye, Yoyakim biti, ‘Elda mambul weiknye,’ tenelamuka ati, teleb bulamak ning arebuk. Arebukopura, el Babel tam ninye nirya ati, nyabuk. “Anye Yoyakim bira, weik arye, si erenamlume. Yuk mutuku deiyok nang, nun mutuku noutamak daunyak bukni, sikti, ara, mitik anun aryuk kinamlume,” nyapdeibuk.

29 Ayupu akunum nyabukopura, Raja Yoyakhin el wenena aik ulamuk talak ongolamuk baju, pia malye uamuk ara, kwiriplobukabukce, winiryuk ning ongobukopura, Babel mutuku ninye deiyoknye, Raja Ewil-Merodakh dam yanuka, neika din dibuka pia ulamdik. 30 Winilamdik ani, Babel mutuku ninye deiyoknye birye, Yoyakhin biti, asum-asum nirya, el patapne ning dekna ati, yo bok arelamukba, dekelbalamukce telebuk ulamuka ani, aminyan talak dibuk.