Binukabikce wekuka kekenmek bukni, Yosia birye, Allah arye, Israel ninye ati, ‘Aning wininamlume, winipmunyopura, na dipkoprob kalikuka melinamsine,’ nyapdeiamuk yupu, abuku uamuk yupu nirya yinibukba, abulupmek ninye nirya kekenmek. Elce nyabuk yupu ara, yuk yupu kume, ara, Allah el si eren aik pum tam deiamikba, wangamik bukni, winiryuk eibikce arebik buku yininmokba kekenmek.

3 Yehuda yala ninye sik ninye deiyoknye Raja Yosia birye, abuku nirya akunum yinibukopura, winibuk. Elce, Allah el si eren aik pum tam bukni, weik cang ayukumna yo tikdeiamika dam tikukce, nyabuk. “Na ni Allah arye, nyapdeiamuk touk, dipkoprob narye, ayupu moubuka kekepnirya, pia talibuka dobolbanamne,” nyabuk. Raja birye, anyaik ayukumna dam binuka tikuka, ara Allah el dam atonun tikukce ayupu nyabuk. “Naie ance, ‘Aning ara wininamlume, aning ara ton kum wininamlume,’ nyapdeipsulum yupu, mem yupu nirya, na akanye ap, talima ap, dukdongobuka tonok kanye bobuka, Allah an yupu buku noutam nyabuka sekeipsulum atonun wininamne,” nyabuk.

Nyabuka adeice arye, ara ‘Allah el dib yupu ara dipkoprob talibuka unamne,’ nyana atonun ati ayupu nyabuk. Nyabukopura, anyaka bulubuka wekmek nang nirya, sik Israel nang nirya arye, “Nun babye, dipkoprob Allah el yupu nirya moubuka kekebibirye, aninguk talibuka unamabe,” nyabik.

4 Ura, aning nirya akunum winibikopura, Raja Yosia birye, ‘Winiplulume,’ nyapdeibukba, Allah el si eren aik pum tam pil dona deiyok nang, sik weik deiyoknye, imam Hilkia ap, el amu tam pil don nang, yuk imam nang ap, tonda Allah el si eren aik bublan dam tikuka kalikin nang ap arye, Allah el si eren aik pum tam wekuka dipdeyikce, isa si eren ning nirya dobukabikce, bai tam boyayik. Ara, isa mer sik si Bahal^a ap, Asyera ap, si erena ati, ninye taruk deice arye, memebuka deiamikce, anyaik pum tam deiamik ning ap, tonda, im deice tam ulul ning ati si erelamik ning ap, aning dobukabikce anyaik pum tam arye, bai tam boyayik. Boyayikopura, weik asik Yerusalem mutuku bai tam bukni, mek si Kidron mek dam bobiyikce, uku dabikba, uku dibuk. Aning-aning nirya uku akunum dibukce, atue dayuk ning ara, bobukabikce, mutuku si Betel mutuku bobinuka, donokikce batikik.

5 Tonda minop talak Israel ninye taleamika deiyok nang, Raja nang arye, wibuka deiamikba, isa si erena ati wibuka deiamika deiyok nang, malye imam nang nirya ara, Raja Yosia birye batakuk. Amalye imam nang arye, minop talak diprongobuka atalak ara, sik isa si erena ati, Yerusalem mutuku dana-dana tam ap, Yehuda tam noutam bukni, yuk ninye asik domik mutuku dam ap, mutuku kon deice welebuka balamikce, nintong teleb ning dobuka uku dongolamikce, isa si erelamik. Isa Mutuku Dongonye si erelamik ning ara, Bahal si ap, tonda isa sisibuka keting ap, wala ap, kurya ap, tonda im deice tam ulul ning ati, ‘Nun ni yape’ tenen, aning nirya ati si erelamik. Ati, sik malye imam nang arye, isa si erelamik nang nirya ara, Raja Yosia birye anang nirya kum daneibuk.

6 Tonda, Allah el si Yahweh, el si eren aik noutam, cang yo ikdeiamikce isa si erelamik yo kwinibukabukce, buru tam bobiyuk. Acang yo ara, isa si Asyera nyabuka si erelamika anya arye, acang yo ton dobuka buru tam dopkwetebikce, Yerusalem mutuku buru tam Kidron mek dam binukabikce uku dabik. Dabikba uku dibukopura, uku dinmokce atue danmok ning ara, bulukabukce, talye ninye tuku palilamikak binuka yamuplobuk.

7 Aning atonun, yuk malye ulamik aik ton uluplobuk. Ara, Allah el si eren aik dam bukni, isa si eren aik noutam dobuka wilyamik aik daklobuk. Anyaik ara sik malye nang arye, sal arye, sal mamun talye yoldalamik. Amalye ning winilamik nang, sik ulamik aik nirya daklobuk. Tonda, isa si Asyera si erena ati, kilapu arye, baju wilyamik. Abaju wilyamik kilapu ulamikak uku bulung aik nirya babye, Yosia birye dakuka uluplobuk.

8 Yehuda yala nang ulamikak arye, amutuku-amutuku nirya noutam, Raja Yosia birye nyapdeibukba, Allah el aik pum tam pil dona deiyok nang, imam nang nirya bulubuka yayikopura, yuk nang arye, isa si erena do, Allah el si erena ati do, talye nang arye, sik talye si eren aik domik ning nirya uluplobikce malye-malye kipdeibik. Deiyok ara, ‘Anyaik tuba kum wekenamak’ tenen, anyaik nirya ulubuka batakik. Winibik ning ara, mutuku si Geba mutuku arye, diprongobuka anerye, Bersyeba mutuku ap, anoutam mutuku ap nirya, ‘Allah si erepnamap’ tenen, nintong teleb ning dobuka uku dongona ati, domik aik ap, pala keil yangapdeiamik ning nirya ara, ulubuka daklobik. Tonda, Yosia birye nyapdeibukba, sik imam-imam nang nirya Yerusalem mutuku bulubuka yayik.

Yayikopura, isa si erena ati, malye nang arye, delilamik ning ulubuka batakik. Ara, Yerusalem mutuku dana-dana cang keil poka wibuka bublan wekna ati, botoamik bublan weik ning dam, isa si eren ati domik ning ulubuka batakik. Tonok weik bublan el si ara, Yosua bublan. Ton ning ara, Yerusalem mutuku wekelbana ati, abublan dam bukni, kwanim tam botobik bublan ara, abublan el si ara, Yosua nyalamik. Deiyok ara, amutuku Gubenur el si babye, Yosua nyalamik. Abublan bitinye dam ara, isa si erena ati dobuka delilamik ning nirya ulubuka batakik.

9 Atalak ara, Allah el si eren aik bukni, talye-talye mutuku deice welebuka, kam ning bobuka uku dongolbalamik imam nang nirya ara, Yerusalem mutuku noutam domik aik, Allah Yahweh el si eren aik dipkoprob dam pala keil yangap deiamikak binuka kam ning obuka kum arelamik.^b Yerusalem mutuku noutam, teleb imam nang arye, Allah el si Yahweh, el si erena ati, kam un ning obuka arelyangalamikak dipkoprob ara, sik malye imam nang arye, yanuka kum arelamik. Anyaik pum tam kum weklamik bukni, amalye imam nang ap, dipkoprob teleb winin imam nang ap arye, roti kwaning, weik kina kum ning dobuka, neika dilamik.

10 Tonda Raja Yosia birye, winibuk ning ton ani. Elce, isa si Molek, el si erena ati, domik ning babye, daklobukce malye kipdeibuk. Winibuka deiyok ara, ‘Ninye arye, delilamak mapu bobuka, uku dongolamikba, uku dipnopura, winina deice arye, isa si Molek erelamik ning ara, bataknamak’ tenen, winibuk. Ara, ‘Amalye winin ning nirya ap, akintinibik mutuku ap, kum danamle’ tenen, aning ton uluplobuk. Amutuku si ara, Topet bukni, mutuku si ton Ben-Hinom mutuku dam winibuke. Amutuku ara isa si Molek, el si erena ati domik ning ati daklobukce malye kipdeibuk.

11 Tonda, Yosia birye apil ton dobuk. Ara, minop talak Yehuda yala ninye deiyok nang arye, sik balye deice bukuka balamik basam, el si ara kuda, aning ton dobuka Allah el aik bublan dam deiamik. Winilamika deiyok, ara ani keting ara, ‘Nun ni’ tenen, keting si erena ati, kuda basam ton dobuka delilamik. Akuda basam delilamikak ara, Allah el si eren aik wekna ati bublan dam delilamik. Akuda basam ara, tonok deiyoknye el si Natan-Melek, el ulamuk aik dam delilamik. Bukni, Yosia birye nyabukba, akuda basam dobukabikce, yukak delilbiyik. Winilamika ati, Yosia birye nyapdeibukba, kuda basam kirikuka tuku deice balamik ning, el si ara kereta kuda, aning babye dobuka uku dongobuk. Akereta basam babye, sik malye nang arye, keting ati tenelamikce, ‘Nun ni,’ nyabuka akereta basam dobuka arelamik. Winilamika ati ara, Yosia birye akereta nirya dobuka uku dongobukba dibuk.

12 Tonda, minop talak ara, yuk ninye deiyok nang arye, Yehuda tam taleamik nang Raja-Raja yuk nang, Allah el si erena ati, kam ning obuka arenak, pala keil yangabukabikce kintiniamik. Ton ning ara, ninye si Ahaz el alip aik dam bukni, kat aruma domik ning deice arye, pala keil yangapdeiamik. Aning ara, Raja Yosia birye uluplobuk. Ton ning ara, minop talak, Yehuda yala nang, sik ninye deiyoknye el si Manasye, kam ning obuka, Allah el arena ati, elce nyapdeibukba, pala keil yangabukabikce, bitinye deibikce kintiniamik. Apala keil yangapdeibik ning ara, Allah el si Yahweh, el si eren aik buru tam lilun deibik. Apala keil yangabukabikce kintinip deiamik ning bitinye ara, Raja Yosia birye, daklobukce, yamubuka pouplobuk. Winibuka atue buklobukopura, Kidron mekin donokuk.

13 Aning atonun ninye sik kanye aryuk, Yerusalem mutuku bukni, keting yangan tam isa si erena ati, aik domik ning daklobukce malye kipdeibuk. Aning ara, Yerusalem mitik eitam bukni, mutuku si ara, ‘Pia Malye Un mutuku,’ nyabuka si silamik. Amutuku deice isa si erena ati domik aik uluplobuk. Aning ara, minop talak ninye deiyoknye Salomo birye, sik Sidon tam ulamik ninye talibuka si erelamik isa si Asytoret, el si erena ati domuk ning ara, uluplobuk. Tonda, sik Moab tam ulamik ninye talibuka si erelamik isa si Cemus, el si erena ati domuk ning ara, uluplobuk. Tonda, sik Amon tam ulamik ninye talibuka si erelamik isa si Molek, el si erena ati domuk ning ara, uluplobuk. Aisa mer nirya ara, pia malye weik ulamika ati, Allah el kanye ara, ‘Aisa nirya ara pia na like,’ tenelamuk.

14 Tonda Raja Yosia birye winilamuk. Amutuku nirya isa si erelamik ning uluplobukce, isa si Asyera si erena ati, ikamik cang yo nirya weblobuk. Tonda, sik isa si erelamik nang arye, talilamik keil, akeil talibuka sik isa sisibuka si erelamika nirya Yosia birye, dobuka teikuka batakuk. Winibukce, atue kiplobuk. Aning-aning si erelamika nirya ara, ninye yok uk yamubukabukce weik ubuka langdibuk. Winyamukce ninye yok uk erelamuk. Deiyok ara, ‘Amutuku-amutuku nirya ara, tuba tonap, ninye yanuka isa si kum erenamak’ tenen, winibuk.

15 Minop talak ninye ton Nebat el mi Yerobeam bira, Yehuda yala nang, sik ninye deiyoknye ulamuk. Yerobeam birye, malye weik winilamuka deice arye, Yehuda tam ninye elilamikce, sik babye weik arye, malye winilamik. Atalak aryuk Yerobeam birye, el ninye deiyoknye Raja ulamuk talak ara, Betel mutuku binuka, mutuku kon deice welebukce, Allah el si erena ati, pala keil yangeiamuk. Apala keil yangeiamuk ning ara, ‘Kam ning opnirye, Allah si erenamap’ tenen, deibuk. Amutuku kon deice, pala keil yangaeibuk ning babye, Allah si erena ati domuk aik babye, Yosia birye ululbuka yamuplobuk. Ninye deiyoknye Yosia birye Allah si erena ati Betel mutuku deice domik aik ara, ululbuka yamuplobukabukce, atue kiplobukba, atu atonun ubuk. Tonda, isa kil si Asyera, el si erena ati, cang ayukumna yo ikamik ning babye, Yosia birye kwinipbukabukce uku dongobuk.

16 Yosia birye, aning akunum winibukopura, tuba tamubuka, amutuku dam bukni, ninye wilamik mutuku tam nirya dipdeyukce, el mapu ati nyabuk. “Winida otam ninye tuku palilamice, keil ikuka deiamikak nirya bimunce, tuku palibuka, akunum wilamik nang sik yok nirya lukmunce, ayok dobuka boyamunce uku dongopnululume,” nyabukba winibik.

Aning winibik ning ara, isa si erena ati pala keil yangeiamika deice arye, uku dongobuka anya arye, awinibuka deice arye, aisa si erelamika nirya malye kibuk. Awinibuk ning nirya ara, Allah el yupu deice arye, “Wininamlume,” nyapdeiamuk touk, Allah el yupu lak nyana deiyoknye, nabi arye, dukdongobuka nyapdeiamuk touk winibuk. Aning nirya Yosia birye, min kum winipmok talak ara, anabi arye, “Wininamlarya,” nyabuka akunum lak nyabuk. Anyalamuk atonun, atalak ara Yosia birye winibuk.

17 Winibukopura, Yosia birye atam nirya dipdeyukce, sik amutuku ulamik nang ati asipdeyuk. “Otam ara, ninye tuku palinyak dam keil ikilinyaka ara, yatanye tuku palyamikce, akeil deibik do?” nyabuk. Nyabukba, sik Betel mutuku ulamik nang arye, tamubuka nyabik. “Kume, ara Allah el yupu lak nyalamuknye, tonok nabi arye, Yudea tam arye, nun mutuku yanuka yupu nyapdeipsuknye weibikak eiplamce nyanmalam adano.

Anye bira, Allah ap, dukdongobuka ulamukce, yupu lak nyalamuknye. Ance Betel mutuku pala keil yanangeiamikak, ululbuka yamuplopmalam ning ara, min kum winipmalam talak arye, anye birye, ‘Winipnamle, winipnamle,’ nyabuka, akunum lak nyapdeiamsuke. Min kum winiplum talak, anye birye, ‘Wininamlarya,’ nyabuka, lak nyalamuk touk wini talak ara, ance akunum winipmalame. Anye bira, el dibukba el nong ara asukumuk weiamik,” nyabik. 18 Nyabikopura, Raja Yosia birye, tamubuka nyabuk.

Akunum weibiknye adano. ‘Yuk nang arye, anye el yok dobuka yukak deibicak’ tenen, anggunce kalikinamlulume. Nyabuk ati ara, amutuku nang arye, anye el yok ap, tonda Allah el yupu lak nyana deiyoknye, Samaria mutuku arye, yanamuknye, el yok ap, lukamikak ara, tuba tonap kum palibikce kum doprobik. Asukumuk talye batikik.

19 Ura, Raja Yosia birye, Betel mutuku nyamuk touk, Samaria mutuku dolamik asik noutamak nirya, mutuku deice arye, Allah el si erena ati, ninye sik kanye aryuk domikak uluplobuka malye kipdeibukce, daluplobuk. Ara, minop talak Israel ninye talibuka ninye deiyok ulamik nang, Raja nang arye, Allah si erena ati, domik aik ap, mutuku deice kintinip deiamik ning ap, ulubuka daluplobuk. Aning nirya ara, minop talak ara, Allah el si Yahweh arye, dilamukba, el kanye yu weik ulamuk. ‘Na si erena ara, narye, nyapsise mutuku uk binuka na si erenamnulume. Yukak ara kume. Ati, sikcuk donyak ning, nirya ara, na pia like,’ tenelamuk. Yosia birye aning nirya ululbuka daluplobuk.

20 Sik amutuku nirya Allah el si erena ati domik aik ara, anyaik-anyaik talibuka pil dolamik nang, sik malye imam nang nirya ara, Raja Yosia birye oplobukce, sik nong dobuka apala keil yangeiamika deice deibukce, uku dabuk. Ninye yok dobuka akeil tuku yangabuka deiamika deice ak deibukce uku dabuk, winibuka deice arye, aning nirya malye kipdeibuk. Ara, ‘Allah el si erena ati, tuba tonap, apala keil deice kam ning obuka kum arelyanganamak’ tenen, winibuk.^c Aning nirya akunum winibukopura, tamubuka Yerusalem mutuku biyuk.

21 Yerusalem mutuku tamubuka biyukopura, Yosia birye sik amutuku ulamik ninye nirya ati nyabuk. “Anggun bulupmunce, nun ni koprop Allah, el si Yahweh, el si erena ati, Kaplina Kwalina el si Paskah kwalipnalume. Ara, nun apu yape, Mesir mutuku noutam arye, banuyik talak, Allah arye, sik winiryuk mapu kum obukce, sik aik kaplibuka bindomuka ati, Kaplina Kwalina nyalamap kwalina kwalipnamalume. Ara, tilila ati kume, Allah arye nunti, ‘Aning wininamlume, aning winipmunyopura, dipkoprob narye, kalikuka melinamsine,’ nyapdeipsukba, buku noutam sekeiamsikba, tuba nyasilye touk winipnalume,” Raja Yosia birye, aninye ati nyabuk.

22 Minop talak Allah arye, “Kaplina Kwalina kwalinamlulume,” nyapdeiamuk ning aubuk bukni, anoutam nirya ara, aning yubuka kum ulamik. Ara, minop talak sik Israel ninye, sik deiyok nang, yupu bokolina deiyok nang arye, anang ati, ‘Wininamlume, wininamlume,’ Nyalamik nang ulamik talak diprongobuka, wini talak nirya ara, Israel ninye talibuka weik deiyok nang Raja nang ap, sik Yudea tam ninye talibuka ulamik weik deiyok nang, sik Raja nang ap, anang nirya ulamik talak noutam babye, aKaplina Kwalina atonun kum yubuka dilamik. Atalak noutam nirya ara, Kaplina Kwalina akunum batakamik.

23 Bukni, wini talak ara, ninye deiyoknye Raja Yosia birye, Yehuda yala ninye talibuka ulamukce, keting tamun delapan belas (18) tahun akunum ubukopura, aketing tamun deice arye, Raja Yosia birye, “Akwalina kwalipnamabe,” nyabukura, Yerusalem mutuku noutam arye, Allah el si Yahweh, el si erena ati, Kaplina Kwalina kwalibik.

24 Ura, Raja Yosia birye, kum daneibuk ning ara ani. Allah el yupu minop buku noutam arye, ayupu nirya, ‘Wininamlume,’ nyapdeiamukba sekeiamik yupu awamuk touk winibuk. Abuku ara, Allah el si Yahweh, el si eren aik pum tam deiamik bukni, wangamikba, Allah el aik pum tam pil dona deiyoknye imam Hilkia birye eibukce, abuku dobuka Yosia biti arebuk. Arebukba, abuku eibuka kel bikukce, isa si erelamik nang nirya yakuka dopkwetebuk.

Ara, ‘Yata wiripnamap do? Yata wiripnamsil do?’ tenen, isa mer ati morolamik deiyok nang ap, tonda akunum diamik nang, sik kanye asilena deiyok nang ap, kir dona deiyok nang ap, ‘Nun ni’ tenen, kat ning dobuka memebuka sik aik pum tam delilamikce si erelamik ning nirya ap, yakuka dopkwetebukce, sik bon ning nirya ap, isa urasin atonun memebuka delilamik ning nirya ap, dobuka uku dongobukba dibukce kum dayuk. Winilamikak ara, Yehuda yala ninye ulamik mutuku nirya ap, weik asik Yerusalem noutam nirya ap, aning nirya kum daneibukce, dalubuka donokuk.

25 Ura Yosia ninye deiyoknye birye, Allah ap, talima dukdongobuka ulamuk touk, yuk nang nirya ara, atonun kum ulamik. Elce, ‘Se, nun malye winilamupu ning nirya batakuka, Allah el tam tuba tonap kipdopnamabe,’ tenelamukce, winilamuk nirya ara, yuk nang arye, aning atonun kum winilamik. El min kam ulamuk talak babye, el dibukba, aminyan talak ulamik Raja nang babye, Raja Yosia ulamuk touk, yuk Raja nang ton kum winilamik. Raja Yosia, el kanye ap, talima ap, nong ap, mikip ap nirya ara, Allah el si Yahweh, el deice uk deibuk touk, yuk nang ton kum winilamik. Aning winilamuk ning nirya ara, Allah arye, ‘Wininamlume,’ nyapdeibukba, minop talak Musa kekebukce, sekeiamsuk atonun winilamuk. Raja Yosia elda Allah el yupu pia moubuka kekelamukce, aninguk winilamuk. El winilamuk atonye ton kum punubuk.

26 Raja Yosia bira, pia teleb ubuka diksukumuk ulamuk bukni, ninye deiyoknye, el si Manasye ulamuk talak ara, pia malye-malye weik winilamuka ati ara, sik Yehuda yala ninye ati, Allah el yu pia weik tuba ulamuk. Allah arye, sik Yehuda ninye ati yu ulamuk ning ara, weik uku dinmaliba buppu weik ulamle touk, el yu ara pia weik ati ara, min kum danmanto kum ulamuka anya arye, batak kum ubuk.

27 Winilamuka ati ara, Allah el si Yahweh arye, sik Yehuda yala ninye ati nyabuk. “Israel yala nang arye, pia malye weik ulamikba, bataksirye na dam arye, yakuka bai tam donokse touk, sik Yehuda yala ninye babye ati, wenepnirye, na dam arye donoknamnarya. Tonda narye, Yerusalem mutuku ati, ‘Amutuku wibuka deipne,’ nyapdeiamse bukni, amutuku bataknamnarya. Aning atonun, na bidamnye arye, Yerusalem noutam domik aik ati ara, ‘Anyaik ara, na si dobuka anyaik pum tam dongopnamne,’ nyapdeiamse bukni, na si eren aik babye, bataknamnarya,” nyabuk ara, Allah arye, yu weik ubuk ati, ayupu nyabuk.

28 Ura, Raja Yosia birye el ulamuk talak winipnin yangalamuk ning nirya ap, Yehuda ninye talibuka ulamuk talak arye, winilamuk ning nirya ara, akunum sekuka deiamik. Aning nirya ara, sik Yehuda tam ninye, sik ninye deiyok nang arye, winilamik ning, sekne buku noutam akunum sekuka delilamik. Ati, asukum ara yuk ning ton kum sekupe.

29 Raja Yosia birye, Yehuda yala ninye talibuka ulamuk talak noutam arye, Mesir mutuku ninye deiyoknye, el si Firaun Niko birye, utenebuk. ‘Na wit Asyur mutuku weik deiyoknye melipnamne’ tenen, el mutuku dam arye, batakuka, weik mek si Efrata mekin biyuk. Winibukopura, Raja Yosia birye, ‘Anang olbinamap’ tenen, el ap, el yin talin nang ap arye, sik ak olbiyik. Olbiyik bukni, Firaun Niko birye, mutuku si Megido mutuku binuka epdarikce, oldanmek talak ara, Yosia oplobuk. Oplobukba, Raja Yosia el pil don nang arye, el nong eibik.

30 Eibikopura, el pil don nang arye, Yosia el nong dobukabikce, kuda arye, kirikuka tuku deice balamuk ning, el si kereta kuda deice deibukabikce, Megido mutuku arye, batakuka Yerusalem mutuku boyayik. El nong ara, Yerusalem mutuku ninye deiyok nang weina ati, akunum kintinip deiamik keil deiya deibikce tuku lukik. Winibik talak ara, sik amutuku ulamik ninye nirya arye, el mi Yoahas bobuka yayikce, ‘Eluk Raja unamsile,’ tenebikce, minyak mek dobuka, el kisok deice dikdongobikce, elti, erepdeibik. Winibikopura, Yoahas bira, el li koproba pununa ati, Yehuda tam ninye, sik ninye deiyoknye ulamukce, aninye taleamuk.

31 Yoahas el ulamuk talak keting tamun ara, dua puluh tiga (23) tahun nebuk talak arye, ninye deiyoknye Raja kibuka, Yehuda tam ulamik ninye ati, Raja kibuka talibukce, Yerusalem mutuku noutam ulamuk. Bukni, elce amutuku talibuka, ulamuk talak ara, yupa weik kume. Ara, wala winilye deice aryuk, elce deiyoknye kibuka talipmok. Yoahas el lin si ara, Hamutal. Akil Hamutal, elda Libna mutukunye, Yeremia birye deiamuk kil ulamuk. 32 Yoahas bira, el apu yapu nang arye, malye un ninguk, talibuka ulamik touk, el babye aninguk talibuka malye ulamuk. Ara, Allah Yahweh arye, “Aning ara, pia malye un ning,” nyapdeiamuk ning ara, talibuka ulamuka deice arye, Allah el dam malye ninguk talibuka ulamuk.

33 Yoahas elce ninye deiyoknye kibuka, talipmok talak aryuk, Mesir mutuku ninye deiyok kibuka taleamuknye, Firaun Nekho, elce Yoahas tomobukabukce, Hamat mutuku noutam bukni, mutuku si Ribla mutuku noutam binuka, dobuka wenen aik pum tam deiamuk. Winibukopura, Mesir mutuku ninye deiyoknye, Firaun bira, Yehuda mutuku ulamik ninye ati, “Anggunda, na si erebuka kina ati ara, anggun dekna weik ning weik tonun, natibuk arepnamnulume,” nyapdeiamukce, sik deice ikin deiamukba, sik amutuku ulamik ninye nirya ara, aning dekna ati, arebik ning yupa ara, tiga ribu empat ratus (3.400) kilogram perak ap, tonda tiga puluh empat (34) kilogram emas ap, aning nirya boyanuka arebik.

34 Tonda, Mesir mutuku ninye deiyoknye, el si Firaun Nekho, elce Yosia birye deiamuk mi yuknye bira, el si ara Elyakim, ‘Elda Yehuda tam talipnamle’ tenen, ninye deiyoknye una ati, wipdeibuk. Winibukba, anye elce ninye deiyoknye kibuka, Yehuda mutuku ulamik ninye nirya ati, taleamuk bukni, Firaun el amu tamuk ulamuk. Firaun Nekho birye, Elyakim wibuka deiyoknye una ati, deibuk talak ara, anye el si ara, Elyakim nyalamik bukni, Nekho birye, yuk si sibuk. Ara, “Wini talak arye, dipdongobuka do, unamle talak ara, anye bira el si ara, Yoyakim nyanamake,” nyabuk. Winibukopura, Nekho birye, Raja Yoahas bira bobinuka, Mesir mutuku tamubuka delilbinamukba, binuka wenen aik pum dongamukba, dabinuka ulamuk bukni, Yoahas bira, asukumuk dibuk.

35 Ura, Mesir mutuku taleamuk ninye deiyoknye, el si Firaun Nekho birye, Yehuda tam ulamik ninye ati, “Na si erebuka kina ati, deken ning weik tonun arepnamnulume,” nyapdeiamuk ning arena ati ara, Nekho birye wipdeibukba, Yehuda mutuku ninye deiyok kibuka talibuknye, Raja Yoyakim birye, Yehuda ninye ati, “Anggun yuk-yuk talibuka dekemunye ning nirya aulye touk, deken ning el si pajak ara, anggun bona nirya aupmasilye touk, bulubuka boyamunce, yanuka arepnunulume,” nyabukba, boyanuka arelamik.

36 Yoyakim el ulamuk talak keting tamun ara, dua puluh lima (25) tahun nemuk. Atalak ara, Yoyakim birye, ninye deiyoknye kibuka, Yehuda tam ulamik ninye nirya taleamukce, weik asik kota Yerusalem mutuku noutam ulamukce, Raja kibuka taleamuk. Ataleamuk keting tamun nirya ara, sebelas (11) tahun deice arye taleamuk. Yoyakim el lin si ara, Zebuda. Akil Zebuda, elda Ruma mutukunye, el si Pedaya birye deiamuk kil ulamuk. 37 Yoyakim bira, Yehuda tam taleamuk bukni, el apu yapu nang arye, malye winin ninguk talibuka winilamikce, Allah dam malye weik winilamik touk, el babye malye ninguk talibuka, Allah dam malye winilamuk. Ara, Allah Yahweh arye, “Aning ara, pia malye un ning,” nyapdeiamuk ning ara, anye Raja Yoyakim birye, talibuka winilamuk.