Allah arye, sik Israel nang ati, ‘Aning ara wininamlume, aning ara, ton pia kum wininamlume,’ nyapdeiamuk yupu wangabik bukni, Yehuda yala nang, sik ninye deiyoknye, Yosia birye eibuka ati, nyabuk yupu
22
Yosia el keting tamun ara, pinbarye ubukopura, Yehuda yala nang sik ninye deiyoknye kina ati, erepdeibikba, Yerusalem mutuku talibuka ulamuk. Ara, keting tamun yupa ara, tiga puluh ap, ton adeice arye, talibuka ulamuk. El kil si ara Yedida, akil el li koproba si ara Adaya. Tonda akil el mutuku koprop ara, Boskat. 2 Yosia elda diksukumuk ulamuk. Ara, Allah el si Yahweh arye, ‘Aning ara wininamlulume, aning ara ton kum wininamlulume,’ nyapdeiamuk yupu nirya moubuka taleamuka ati, el ap, Allah ap, talima dukdongobuka ulamrik. Minop talak el apu koproba Raja Daud babye nimalye arye, Allah nyapdeiamuk yupu nirya talibuka ulamuk touk winilamuk. Winilamuka ati ara, winipmanto ara, ‘Kwanim tam binun do? Aning kum sirik tam binun do?’ tenena kum aryuk, pia noutam teleb bisikuk tuba balaminye touk, el winilamuk ning ara, diksukumuk winilamuk, malye ning ara, kume.3 Winilamuk ani, Yosia bira Israel ninye taleamuk bukni, keting tamun delapan belas (18) tahun akunum ubukopura, atalak ara el amu tam pil dolamuknye, amutuku ninye si sekna ati deiyoknye el si ara, Safan ulamuk. Anye bira Sekretaris Negara ulamuk. Safan el li koproba ara Asalya. Safan el apu koproba ara, Mesulam. Ura, Raja Yosia birye nyapdeibukba, Safan bira, Allah el si Yahweh, el si eren aik dam dilbiyuk. Anyaik binuyuk talak ara, Yosia birye Safan biti nyabuk.
4 Wini talak ara an bimince, Allah el aik pum tam pil dona deiyok nang, sik weiknye Hilkia biti nyapnulyame.
Anda, Allah el si eren aik boyangalamak yo bok bulubuka kintinip deipnunilyame. Ara, ‘Allah el si erepnuyap’ tenen, Israel ninye arye, anyaik boyangalamikiba, sik anyaik bublan kalikna deiyok nang arye, dololamak yo bok ati nyapkine. 5 Ayo bok bulubuka deibicopura, auang ara sikce Allah el si eren aik tuba yinibuka talilamak nang, sik pil moubuka dona deiyok nang, anang ati ayo bok bulubuka arepnamake. Arebikiba, Allah el si Yahweh, el si eren aik akunum daksakuk ning moubuka dolamice nang arepnamake.
6 Ara, anyaik moubuka don nang ara, sik yo cakne nang ap, aik nong dona deiyok nang ap, keil deibikiba, urasin teleb kina ati memena deiyok nang ap, arepnamake. Ara, sik pil dolamica dekna ati, ayo bok arepnamake. Tonda, ayo bok noutam arye, bokuka, ton tam ning ara, wini teleb yo ap, urasin teleb keil ap, dekikiba, aning arye, anyaik lipsisikuka donamake. 7 Anyapmakin touk wininamak bukni, sik apil dona ati kalikna deiyok nang ara, pia dipkoprob unyak nanguk unyaka ati ara, yo bok doprobikirye, arenamak ara, ninye si ap, arepnamake yo bok ap, daftar kina ati kum sekenamake. Aning sekuka kum arenamake. Aning ara, diksukumuk unyaka ati ara, dib teneptibye.
Raja Yosia birye, Sekertaris Negara, si sekna deiyoknye el si ara, Safan biti nyapdeibukba, anyapdeibuk touk winibuk.
8 Safan birye, anyapdeipmok yupu nirya akunum winibukopura, Allah el aik pum tam pil dona deiyoknye imam Hilkia birye apil dobuk. Akunum dobukopura, Hilkia birye Safan biti nyabuk. “Minop talak ara, Allah el si Yahweh arye, nun apu yapu Israel ninye ati, ‘Aning ara wininamlulume, aning ara ton kum wininamlulume,’ nyapdeiamukba sekuka deiamik buku, wangapsuk bukni, wini talak ara, na akunum eipmane. Ara, abuku ara Allah el si eren aik noutamakuk awamukak, eipse.” Hilkia birye nyabukabukce, abuku dobuka Safan binyak arebuk. Arebukopura, Safan birye abuku dobuka yininmok.
9 Safan weik asik ati si sekna deiyoknye birye, abuku akunum yinibukopura, elce ninye deiyoknye Raja Yosia el aik tamubukabukce, Yosia dam biyukce, binuka lak nyabuk. “Naie, ance nyapnulum touk, Yehuda yala ninye arye, Allah el si Yahweh, el si eren aik weklamak talak, delilamik yo bok ara, an amu tam pil dona deiyok nang arye, akunum bulubuka deiamikce, auang dobukabikce, Allah el aik moubuka dona ati, pil dona deiyok nang ati akunum arebikopura, anang arye, sik anyaik nong pil don nang akunum bokuka arebik,” nyabuka laka nyabuk.
10 Weik asik ati si sekna deiyoknye Safan birye, ayupu akunum lak nyabukopura, ayupu ton dukdongobuka nyabuk. “Tonda na ni, Allah el aik pum tam bukni, Allah arena ati pil dona deiyoknye imam Hilkia birye, mambul buku dobukabukce nati arepnuke. Abuku ara boyanmakine,” nyabuk. Nyabukura, tikukabukce abuku, Raja Yosia el kekena ati yininmokba, Yosia birye kekenmok.
11 Minop talak Allah el si Yahweh arye, Israel ninye ati, ‘Aning ara wininamlulume, aning ara ton kum wininamlulume,’ nyapdeiamukba sekuka delilamik buku ara, Safan birye, Yosia el kekena ati yininmokba, Yosia kekebukopura, malye kanye bobukabukce, ‘Se, ayupu ara ikine’ tenen, ninye deiyoknye el nong bol deice pia teleb baju ongolamuk ning ara kwiribuka, kwiliki bataklobuk. 12 Winibukopura, ninye deiyoknye Raja Yosia birye, ninye pamubarye nangak, ayupu nyapdeibuk. Ara, Allah el aik pum tam pil dona deiyoknye, imam Hilkia ap, Safan el mi Ahikam ap, Mika el mi Akbor ap, amutuku ninye si seklamuka deiyoknye, Sekretaris Safan ap, tonda Raja Yosia, el pil melibuka dolamuknye, el si Asaya ap ati, ayupu nyapdeibuk.
13 “Anye bira, na ikin weik upnile. ‘Allah el si Yahweh arye, yata nyapnamsil do?’ tenen, na melina ati ara, anggun bimunce Allah arye, nyalye yupu lak nyan nang dam binuka asipdenululume. Ara, winiryuk eipmakce arepmaniyak buku ara, winira aupmasila ati, na ap, na amu tam unyak ninye ap, Yehuda yala ninye nirya ap ara, ‘Yata wirinamap do?’ tenen, binuka asipdenamalulume. Deiyok ara, ani. Allah el aik pum tam pil dona deiyoknye Hilkia bira, Allah arye, nyapdeiamuk yupu nyapdeibukba, sekuka deiamik buku, wangapsuk bukni, winiryuk eibukce arepnuke.
Tonda, Allah arye, abuku noutam nyapsuk yupu ara, nun apu yapu nirya arye, moubuka kekena kumce, ayupu talibuka kum ulamike. Malye weik ulamika ati, nun ni koproba Allah arye, derepsilirye, ‘El yu ara, uku buk dilamle atonun ubuka weik arye, wenepsilyak’ tenen, nyapsine. Aning ara, tilila ati kume. Minop talak arye, dipdongobuka, wini talak babye, nun apu yapu ara, Allah arye, nun Israel nang ati, ‘Wininamlulume,’ nyapdeiamsuk yupu atonun ning ton kum kekelamikce, talibuka kum dobolbalamik. Ati ara, ‘Allah arye, yata nyapnamsil do? Tonda, nun yata wiripnamap do?’ tenen, Allah el yupu lak nyana deiyok nang dam binuka asipdenululume,” Raja Yosia birye, el pil dona deiyok nang ati nyapdeibuk.
14 Nyabuka ati, Allah el aik pum tam pil dona deiyoknye Hilkia ap, Ahikam ap, Akbor ap, Safan ap, Asaya ap, sik nirya ara, Allah el yupu lak nyan kil tonok, el dam biyik. Akil ara nabi ulamuk. El si ara Hulda biti, anang arye, ‘Nun yata wiripnamap do?’ tenen, “Allah tenelye ning ara, ayupu nirya lak nyapsilyame,” nyabuka binuka morobik. Akil ara el akanye el si ara, Salum. Salum el li koproba el si ara, Tikwa. Tikwa el li koproba el si ara, Harhas. Harhas el pil dolamuk ning ara, amutuku weik deiyoknye Raja, el ongolamuk baju kintinilamuknye ulamuk. Tonda Hulda el ulamukak ara, Yerusalem mutuku noutam bukni, distrik kedua nyalamikak ulamuk. Anang arye, akil dam binuka asipdeyikba, akil arye, sik yupu nirya kekenmok. 15 Kekenmok ani, akil arye, tamubuka sikti, nyabuk.
Israel ninye kalikuka melilul Allah, el si Yahweh arye, nyapmasile. Anggun dopdeipmasunye biti, binuka nyaplulume. 16 Allah el si Yahweh arye, nyapdeipmasil yupu ara, ani.
Na Allah arye, dipkoprob nyapsine. Yerusalem mutuku ap, amutuku unyak ninye nirya ara, narye, piripnirya weik arye, wenepnamsine. Weik kanye imun ning arepnamsine. Ara, minop talak arye, narye nyapdeiamsiba, abuku noutam sekuka deiamik bukni, wini talak ara, Yehuda yala ninye talibuka ninye deiyoknye Raja Yosia birye, winiryuk eibukce yinibuka nyapmok yupu, abuku noutam nyalye touk, narye, dipkoprob winipnamsine.
17 Aning nirya winipnamne deiyok ara, tilila ati kume. Sik Israel ninye arye, nati ‘Nun like’ tenen, bataklamnikce, sik nirya ara isa si erena ati, nintong teleb ning bobuka uku dongolamikce, isa si erelamik. Aning atonun, sik taruk arye, kat ning dobuka sik isa si eren ning urasin atonun ning memebikce, aning ati, ‘Nun ni,’ nyabuka si erelamik. Winilamika ati ara, na yu weik unulule. Ati, na yu ara uku dilamle touk weik upnile. Ati, sik Yehuda yala nang ap, aninye unyak mutuku ap ati, weik ikin ning sik nong deice delinamne. Na yu ara kum bataknamne, pia tuba unamnila ati ara, aninye dipkoprob wenepnamnarya.
18 Tonda, Yehuda yala nang, sik ninye deiyoknye Raja Yosia birye sikti, ‘Allah el si Yahweh arye, yata yupu nyapnamsil do?’ tenen, dopdeipsuknye biti, ayupu ton nyalbinululume. Allah el si Yahweh, Israel ninye pia kalikuka melilul Allah arye, elce minop talak nyapdeiamuk yupu wangamik bukni, winiryuk eibuka arepkikba, kekepmom yupu ati, nyapkine.
19 “Minop talak, Allah narye, Israel ninye ati, ‘Aning ara wininamlume, aning ara kum wininamlume,’ nyapse. Tonda, nyapse. ‘Na yupu kum kekepmunyopura, winibuka-winibuka wenepsinirya, ikin ning anggun nong deice delinamsine. Winipsinirya, anggun mutuku ap, anggun nirya ap ara, obuka sirya daknamsine,’ nyapdeiamse. Anda anyamse yupu winiryuk kekeplum talak ara, talima mitang upkuke. Winipkukba, anda Yosia birye, ‘Se, nun apu yape ap, nun ap ara, dipkoprob malye weik ulamupue,’ tenyamlume.
Utenyamlum, ‘Ati, nun ni Allah, el si Yahweh arye, nyapnamsil yupu moubuka kekenamabe’ tenen, talima kintiniplumce, ikin kanye bona ati, an baju kwilikloplumba, malye kanye boplumce, na dam yanuka engebuka, nati moropnulume. Aning nirya ara, na Allah arye, akunum eipkise. Aning nirya winipluma ara, nara Allah, na si Yahweh arye, nyapkine. Ance moropmanilam yupu ara, akunum kekepkine.”
20 “Ati ara, na Allah arye, nyapkine. Dipkoprop Yehuda yala ninye wenepnirya, ikin ning sik nong deice deipnirya, Yerusalem mutuku kum daneipnamne talak ara, anda kum eipnamnilame. Deiyok ara, narye, nyapdeipniba, an dipnalame. Imun kanye bona kumce mangkau arye, dipminyopura, yuk nang arye, an nong bobuka, an apu yapu weilbalamik touk, an babye dipminyopura, weipnamkiyake. Nara, Allah na si Yahweh arye, nyapkine.”
“Ayupu nyabuka, anggun deiyoknye Yosia biti lak nyalbinamlume.” Akil Hulda birye nyabuk. Nyabukba, el dam yanmek nang arye, kekebik. Akunum nyabukopura, ninye deiyoknye Raja Yosia birye dopdeipmok nang nirya ayupu kekebikce, bobuka el damuk tamubuka lak nyalbiyik.