2 Raja-Raja 21

Manasye birye, Yehuda tam ulamik ninye deiyok kibuka, Raja tikukce, taleamuk yupu

Manasye el nemuk talak keting tamun ara, dua belas (12) tahun kunum ulamuk talak ara, Manasye birye, ninye deiyoknye kibuka, Yehuda tam ulamik ninye ati, ninye deiyok Raja kibuka taleamukce, weik asik ara, kota Yerusalem mutuku ulamuk. Amutuku ulamukce, Yudea tam taleamuk talak ara, keting tamun lima puluh lima (55) tahun mamuk. Manasye el lin si ara, Hefsibah ulamuk. 2 Manasye bira, Allah Yahweh arye, ‘Aning ara, pia malye un ning,’ tenelamuk ning ara, Manasye birye, el malye un ninguk talibuka winilamuk. Amalye winilamuk ning ara, ani. Sik Israel ninye, amutuku binuyik talak ara, Kanaan mutuku ulamik ninye arye, Allah kum bikamika anya arye, sikce malye winin ning weik winilamikba, amutuku ulamik ninye nirya ara, Allah arye yakdonokamuk. Ayakdonokamuk mutuku ninye arye, malye winilamik touk, Manasye babye, malye ninguk taleamukce, malye-malye pia weik winilamuk. 3 Minop talak, Yehuda tam ulamik ninye arye, isa si erelamika ara, Manasye el li Raja Hizkia birye, obuka batakamukce, akunum kum daneiyamuk. Winyamuk bukni, el mi Manasye birye, Raja kina ati tikukabukce, Bahal, aisa si erena ati arelyanganak mesba ara, tuba tamubuka dobukce, memepdeiamuk.

Tonda, isa si ton Asyera, aisa si erebuka kina ati, weik cang yo urasin, teleb kibuka puturubukabukce, ikukba, aning dam isa si erelyangalamik. Ara, Israel mutuku noutam, Raja kibuka taleamuknye, Raja Ahab birye, memepdeiamukce, si erelamuk touk ubuka, Manasye babye aning deiamukce, isa si erelamuk. Tonda, Manasye elda, im deice ap, im noutam ap, kam ulamle mikip ning ton, ‘Sikda pia weik mambul’ tenen, sik si erelamuk.

4 Tonda, Allah Yahweh, elce Yerusalem mutuku ara, elce akunum nyapdeiamuk ara, “Yerusalem mutuku ara, na unamnak aulule. Tonda anyaik pum ara, ‘Na’ tenen ninye arye, na si pia erenamniyak,” nyapdeiamuk bukni, Allah si eren aik dam, Raja Manasye birye, isa si erena ati, domba ato ning opnarye, dobuka uku dongonak, ton memepdeiamuk. 5 Tonda, Allah Yahweh si erena ati kintinilinak ara, anyaik dam bukni, bai tam bitinye wilibuka, memepdeiamik noutam ara, Raja Manasye elce, talye im deice ap, im noutam ap, mikip ulamle ning si erena ati, kambing ato ning opnarye, delilyangalamikak ara, el si mesba dobuka kintinyamuk.

6 Aning kum bukni, pia malye weik winibuk ning ara ani. Ara, mesba dobuka kintinip deiamikak ara, Manasye birye, el mi koproba obuka, isa si erena ati, yanuka uku dongamuk. Tonda, Manasye elcuk, doyanamle talak winipnamle ning ati, isa mikip deice arye, aning laka nyan ninye wibuka delina ap, apil donak ati, kintinilina ap, tonda diamne nang, sik kanye arye, yupu sisikin nang ap, yupu ara, el ulamle ninye, on ning ati, kir don pil ap, “Do talak winipnamle ning laka nyapsilyame,” nyabuka, moron nang ap, malye ulamik nang nirya ati, ‘Neika ubirye, na ton biknamne’ tenen, memepdeiamuk. Winyamukce, Manasye elda, Allah el dam pia malye ulamuk. Adeice arye, Allah Yahweh arye, el Manasye biti, ‘Na dam kum yatue,’ tenelamukce, yu weik el deice delilamuk.

7 Asyera isa kil, el urasin atonun ubuka, dobuka kintinip deiamik ning ara, Allah si eren aik noutam deiamuk. Allah Yahweh arye, Raja Daud ap, el mi Salomo ap ati, sik deice nyapdeiamuk. “Amutuku noutam ara, Yerusalem mutuku ati, anyasik kota Yerusalem ap, amutuku noutam, na si eren aik dopnamlumak ara, na Allah Yahweh, na si asukum pia erenamniyake. Ura, Israel yala ninye unyakak ara, asik weik aupmal bukni, anyasik Yerusalemuk wipdeipne. Sik dua belas (12) nang, yala-yala yuk ukirye, sik unyak mutuku yuk-yuk aulamikca babye, ‘Yerusalem mutuku tonok ati, na si eren aik ara, asukum dopnamak’ tenen, akunum wibuka akwamse,” Allah arye nyapdeiamuk.

8 Tonda, Allah Yahweh arye, Israel ninye ati, “Narye, ‘Aning ara wininamlume, aning ara, pia kum wininamlume,’ nyapdeiamsirye, keil pala deice sekdeiamsiba, na pil donanye Musa birye, ayupu dopdeiamuk yupu uk, anggunce moubuka talipmunce, upmunyopura, narye anyasik teleb kipdeipniba, asukum noutamuk pia aunamlume. Ara, Israel yala ninye, anggun apu yapu ati, ‘Arepnamsine,’ nyapdeiamse mutuku noutam arye, asukum ulamunyeba, yuk ninye arye, kum yakuka donoksitinge. Tonda, yuk pera mutuku yu nang arye, anggunti malye kipsikirye, tapu koubuka, sik mutuku tamubuka, kum bobinamsiyake. Asukumuk unamlume,” nyapdeiamuk.

9 Bukni, sik Yehuda yala ninye arye, Allah el nyapdeiamuk yupu ara, moubuka kum talibik. Ara, Raja Manasye birye, malye ning ulamuka deice arye, Yehuda tam ulamik ninye, sik deice benebukba, sik nirya babye, aninguk talibuka, weik malye ulamik. Ara, min talak Kanaan mutuku ulamik ninye, Allah ati kum bikamik ninye arye, pia malye ning ulamika ati, Allah Yahweh arye dobuka, Israel ninye arepnamuka ati, sik malye ulamik ninye dobuka, yakdonokamuk. Awal-wal ninye ara, mitik tonun malye winilamik bukni, sik Yehuda tam ulamik ninye ara, pia weik tonun, malye winilamik.

10 Ati ara, Allah arye, el pil dolamik nang ap, tonda sikda dotalak winipnamuk ning ati, yupu nyapdeipniba, lak nyan nang, sik nabi-nabi nang ati, sik dam yanuka, yupu nyapdeiamukba, sikce Yehuda tam ulamik ninye ati, laka nyalyangalamik. 11 Allah arye nyapdeiamukba, sik anang arye, ayanuka nyapdeiamik yupu ara ani.

Raja Manasye bira, weik malye ulule. Ara, min talak Kanaan mutuku noutam ulamik ninye, sik Amori mutuku ninye ara, mitik tonun malye ulamik bukni, Manasye elda, weik malye una deiyoknye ulule. Tonda, Manasye elcuk, talye isa mer si erenak ati, kintinip deibukce, aisa si erelamuka deice arye, sik Yehuda yala ninye babye, malye weik unyaka anya arye, elce sik dam ara, pia malye kipdeibuk.

12 Ati ara, na anggun ni koprop, Allah Yahweh arye, anggunda ‘Na’ tenen, kanye deiamse ninye, yala-yala nirya ara, anggun Yehuda tam ululum ninye babye, Israel tam ululum ninye babye, nara anggunce, na si erenamnulum, na Yahweh arye nyapsine. Weik ikin ning dobuka, sik Yehuda yala ninye deice ap, Yerusalem mutuku unyak ninye ap ati, sik deice deipnamne. Winipniba, aning eibikirye, ninye arye, yuk ninye ati eibikiba, kekebikirye, ilil weik upliba, imun kanye bobuka unamake. 13 Na Allah arye, Yerusalem mutuku unyak ninye nirya ara, sik wenena ati ara, min talak Samaria mutuku ulamik ninye, malye ulamikba, yu upnukce, weik tonun wenepsirye, ikin ning weik, sik deice deiamse touk, Yerusalem ninye babye, weik tonun wenepnamne. Tonda, Israel ninye talibuka ulamuknye, Raja Ahab, malye weik ulamuka ati, elce deibukba, dadeipdanin balamik nang ati, mikip arye wenebuka omse touk ubuka, sik Yerusalem ninye babye wenepnamne. Ara, Yerusalem mutuku ninye ara, yangalin ning piring moubuka, mek likuka delilamak touk upsilirye, anggunti sirya dakuka, kum kipdeipnamsile.

14 Yerusalem mutuku unyak nang ati, weik tonun wenepni bukni, ton tuba aunamak ninye ati, na Allah arye, sikti, lubakipniba, anggun mal olan nang arye, atuba unamak nang ara, bataknyopura, sik mal olan nang arye, anang ara tomobuka, wenen aik bobikirye, sik mutuku nirya ara, alubuka dorobikirye, alapdopnamake. 15 ‘Aning nirya ara, wininamlarya,’ nyapmasina ara, talye ati kum nyapne. Deiyok ara, narye, na mapu koproba Israel ninye ati wenepnirye, sik deice ikin ning deipnamne ara, sikce na dam malye un ninguk, pia talibuka unyaka atia. Ara, Israel ninye ara, sik apu yapu ati, Mesir mutuku noutam ikin weik ulamikba, narye lyebuka bobinamse bukni, atalak arye dipdongobuka, wini talak babye, sik ap, sikce deibikba, dadeipdanin balamik ninye arye, malye weik ukiba, na dam ati, yu kililamnik touk, sik atalak unyak ninye arye, tuba na damuk tuba yu kilininyake. Ati, sik dam arye wenebuka, kanye imun weik ning deipnamne.

16 Aning kum bukni, tonda yuk nang arye, malye un ning benelamikba, Yehuda yala ninye nirya ara, isa siuk erelamikce, sik ni Allah dam malye winilamnik. Atonun, tonda Raja Manasye birye, malye winin ning, pia kum ulamik nang ton, weik tonun olamukopura, weik mek balamle touk, Yerusalem mutuku noutam nirya ara, ninye ininguk pia weik tonun uamuk. Ati, sik dam arye wenebuka, kanye imun weik ning deipnamne.

Allah arye nyabuk.

17 Ura, Raja Manasye bira, ninye deiyoknye kibuka taleamuk talak arye, malye winilamuk ning nirya ara, tonda pil dolamuk ning ap, yupu nyalamuk ning ap, yuk ning nirya ulamuk ning ap ara, Yehuda mutuku ulamik ninye talibuka, ulamik Raja-Raja nang, sik si sekuka delilamik buku noutamuk sekdeibik. Abuku si ara, ‘Sejarah Raja-Raja Yehuda,’ nyabik. 18 Raja Manasye, el akunum dibukopura, urasin teleb ning kouamikak, el si ara, taman istana, ninye si Uza, elce deibuk ning noutam ara, Manasye el nong bobinuka weibik. Winiplyopura, Manasye el mi Amon, el li punubukce, ninye deiyoknye kibuka, Yehuda tam ulamik ninye talibuka ulamuk.

Amon birye, Yehuda tam ulamik ninye deiyok kibuka, Raja tikukce taleamuk yupu

19 Ninye tonok, el si Amon, el nemuk talak keting tamun ara, dua puluh dua (22) tahun kebuk talak ara, ninye deiyoknye kibuka, Yehuda tam ulamik ninye ati, Raja kibuka taleamukce, mutuku si, weik asik kota Yerusalem mutuku ulamuk. Ataleamuka ara, keting tamun bitinye deice arye taleamuk. Amon el lin si ara, Mesulemet ulamuk. Akil Mesulemet, el li si ara, Harus. Elda Yotba mutukunye birye, Amon deiamuk. 20 Ura, Amon bira, el li Raja Manasye bira, Allah Yahweh arye, ‘Aning ara, pia malye un ning,’ tenelamuk ningbuk talibuka, Allah el dam ara, malye ulamuk touk, elce deiamuk mi Amon babye, malye ninguk taleamukce, malyeuk winilamuk.

21 Ara Amon, el li bira, pil dolamuk ning ap, malye ning talibuka, malye winilamuk ning ap nirya ara, abisikuk dobolbalamuk. Tonda, Amon el li Manasye birye, isa sik siuk erelamuk touk, el babye aninguk dukdongobuka, talibuka si erelamuk. 22 Winilamuka deice arye, elda Allah Yahweh, el tenen ning ton, kum talibuka pil dolamuk. Winilamuka deice arye, el apu yapu si erelamik Allah, el si Yahweh ara, Amon batakamukce, talye isa siuk erelamuk. Winilamukce, Allah Yahweh arye, “Aning ara, wininamlume, aning ara, pia kum wininamlume,” nyapdeiamuk yupu nirya ara, yanibuka kum dobolbalamukce, malyeuk winilamuk.

23 Winilamikopura, Raja Amon el amu tam deiyok kibuka talibuka, pil dolamik nang nirya arye, ‘Se, anye bira, nun lik tenen, opnamabe,’ tenelamikce, yupu siriklamika ani, ninye deiyoknye Raja, el ulamuk aik noutam aryuk obikba dibuk. 24 Winibik bukni, Yehuda mutuku ulamik ninye nirya arye, aning bikikce, Raja Amon biti, ninye on yupu sisikinmek nang nirya, bulubukabikce, anang nirya ara, tamubuka obik. Winibikopura, Amon el mi Yosia birye, ninye deiyoknye Raja una ati, el li punubuka, Raja wipdeibikba, elce Yehuda tam nirya talibuk.

25 Ura, Raja Amon birye, ninye deiyoknye kibuka, taleamuk talak arye, yuk ning dawinilamuk ning ap, yupu nyalamuk ning ap nirya ara, Yehuda mutuku noutam ulamik ninye talibuka, ulamik Raja-Raja nang, sik si sekuka delilamik buku noutamuk, sekdeibik. Abuku si ara, ‘Sejarah Raja-Raja Yehuda,’ nyabik. 26 Amon el akunum dibukopura, Menasye weiamika dam binuka weibik. Ara, urasin teleb un ning ati, kouamikak, el si ara, Taman Istana Uza, Uza birye deibuk ning noutam ara, Amon el nong bobinuka weibik. Weibikopura, Amon el mi Yosia birye, el li punubuka, ninye deiyoknye kibukce, Yehuda yala ninye talibuka ulamuk.