3 Raja Hizkia engen dol-dol deice arye nyabukce, Allah ati morobuk, “Na ni Allah Yahweh, ance nati tenepnulume. Na nimalyap arye, kanye amu tam kibuka unirye, antibuk tuba talikunune. Yuk talye ning ati, si pia kum erelamse. Tonda, ance nyapdeipsulum yupu uk, moubuka talipsirye, an piluk akunum donune. Tonda, na ni Allah, yuk ning tenina kumce, an teneminye piluk, pia pi deibuka donune,” nyabuka morobukce, engenmok.

4 Atalak ara, Yesaya bira, Raja Hizkia dam arye batakuka, ninye deiyoknye, el weik aik dam bisik noutam bayukbuk, Allah Yahweh arye tamubukce, yanuka el Yesaya biti, ayupu ton nyabuk.

5 “An adiparyuk tamubuka, na mapu Israel ninye, sik deiyoknye Raja Hizkia dam bimince, anyapmakin yupu ara, binuka laka nyapnulyame. Ara, “Nara, Allah Yahweh, an apu Raja Daud birye, si erelamnuknye ununa anya arye, an tenipmalamce, asing maka deice arye, nati moropmanilam ning ara, akunum kekepmakine. Ati, narye anuk dikulul ning ara, akunum kwetepdeipmakine. Ati, mapmaminya berekliba, daunmaminya ani, like winilye sum ton akunum uplyopura, narye kwetepnamkine. Kweteipkinyopura, anda na Allah Yahweh si eren aik dam binulyame.

6 Tonda, narye, an unamlam keting tamun ara, lo tonap tabakuka arepkiniba, kam pia unamlame. Ara, lima belas (15) tahun tonap mapnamlame. An ap, Yerusalem mutuku ninye ap ara, Raja Asyur tam, el Salmanezar birye, anggun nirya talipsik ning ara, lyebuka dopnirye, kum kipdeipnamne. Winipnirye, amutuku noutam ara, na weik si erenanye, na si weik tonun ati, amutuku unyak ninye arye, ‘Se, nun ni koproba Allah ara, dipkoprob mambul weik, pia mikipnye ulule,’ nyabuka, na siuk erebikirye, unamake. Tonda, na amu tam ulamukce, na piluk dolamuknye, Raja Daud biti, nyalin yupu deice arye, ‘Wininamkine,’ nyapdeiamse ati, narye anggun nirya lyepnirye, kalikinamsine,” nyalin deice arye nyabuk.

7 Yesaya birye, ayupu akunum laka nyabukopura, elce Hizkia, el melin nang ati, “Kwarang yo duk mek purubuka, ninye deiyoknye Raja Hizkia, el nong deice torok mouamuka deice, likdongobukba, daunmalya ani, kwetepdeipniba, aning kum danamle,” nyabuk. Nyabuka ati, Hizkia, el pil melin nang arye, Yesaya nyapdeipmok touk winibikce, asuse liklamak ning dobuka, atorok mouamuka deice likdeibikopura, Hizkia tamubuka teleb ubuk.

8 Nabi Yesaya arye, anyapdeipmok touk, min kum winipmik talak ara, Raja Hizkia birye, Yesaya biti asipdeyuk. “Mapmanya ani, like winilye sum, Allah arye nauk dinilye ning ati, kwetelina ap, tonda Allah Yahweh si eren aik noutam binuka, el si erenamne sukum ap ning ara, yate ning bikilina ati, lake kiptua deice arye, ‘E, kwetepmanilba, Allah Yahweh el si eren aik wekuka, el si erepnamne’ tenen, biktinye do?” nyabuka, asipdeyuk. 9 Nyabuka asipdeyukura, nabi Yesaya birye, tamubuka nyabuk. Ninye deiyoknye Raja, an bikna ati, Allah arye laka kipdeipnamakile. Ara, ‘Allah arye, Raja biknamle’ tenen, peten kilin ning arepnamakile. Ara, Allah arye, el nyalin yupu deice anti nyapkuk ning ara, ‘Dipkoprob winipnamle’ tenen, an biknalam ati, winipnamkile. Ati wini talak ara, ninye deiyoknye, Raja ance, ‘Yata ning ton laka kipnutuba, biktinye,’ tenepmalam do?

Tonda, Raja Ahas birye, Allah el si eren aik, domuk aik urasin tam anyaik wekelbana ati, yo morobuka, tangga memamuk sukum keting kukia dina ati, laka kipdeipnukil ning, keting dirina yalyopura, takubarye (10) baris deice, outam arye welebinamle do? Memepdeibuk ning ara, keting dirina aning deice yalyopura, takubarye deice arye kirikuka, outam arye eitam welebinamle do? Akumuopura, laka kilin ning takubarye deice arye, outam kouluka yanamal do? Ance, ‘Winiptue’ tenen, wibuka nyapminba, anyapnuminye touk, Allah arye winipnamkile. Winiplya deice arye biknamalame,” nabi Yesaya birye nyabuk.

10 Yesaya birye nyabukba, Raja Hizkia birye, ayupu nyabuk. “Kume, na kanya ara ani. Allah arye, keting kanye ara ani. Keting dirina deiplirye, keting kanye utam deiplirye, tonap tamubuka itam weleyatuba, aning deice arye na biknamne. Ara, yuk ati kum bukni, keting dirina deiplirye, keting kanye balamle ning, itam arye utam bana ara, pia winilula ati, aning ara, ikin kume. Kanam uka. Bukni, keting kanye utam arye tamubuka itam welebana ara, ton kum winilula ati, keting deiplirye, kanye utam arye na bikilina ati, anyaik tangga takubarye baris deice, utam arye welepbuka, itam yaliba aning ara, kum winipmanto ati, adeice arye, ‘E, Allah arye nyapdeipnuk ning ara, dipkoprob nong upnamle’ tenen, biktinye. Ati ara, aninguk winiptue,’ nyabuka, Raja Hizkia birye morobuk.

11 Nyabuka morobukba, nabi Yesaya kekebukce, Allah Yahweh ati, laka nyabuka morobukura, “Aketing kanya upmatu sukum arye, outam tamulin ning ati, keting kanya yakna takubarye (10) ara, outam arye, tuba tamubuka eitam bitopura, narye aning eipnya deice arye, ‘E, dipkoprob Allah Yahweh arye, nati, nyapdeipnuk yupu ara, nong upnamanilca,’ tenepnamne,” nyabuk. “Alaka kin ninguk kipdeipnutue,” nyabuka morobuk. Moropbukba, Allah arye, Raja Hiskia moropmok touk, keting kanya dilan ning ara, laka kipdeibukba, anye alat akunum welebanmokak keting kanya taku barye (10) baris, outam arye tamubuka, eitam baris welebukba, asukumuk tikukak, eprik.

12 Atalak ara, Babel mutuku noutam taleamuknye, el si Raja Baladan, el mi Merodak-Baladan bira kekenmokbuk, yuk nang arye, “Raja Hizkia bira, uk dilya ani, wini talak uk lopmalba, winira teleb unamle,” nyabikba kekebuk. Kekebukopura, Hizkia biti, surat ton sekdeibukce, ninye wipdeibukba, asurat boyangayik talak ara, Hizkia el arena ati, teleb bona ton dopdeibukba, boyayik.

13 Babel mutuku deiyoknye birye, bona dopdeipmokbuk, boyanganmek nang nirya ara, Hizkia birye bobinuka, el aik bobiyuk. Winibukopura, el talibuka delilamuk dekna weik bona yala-yala nirya ara, sik Babel mutuku arye yanganmek nang ati, laka kipdeibuk. Aning ara ani. Ara, dekna weik ning emas ap, perak ap, siltong teleb minyak mek ap, tonda kenkena deice daknaba, din ning toh nyana ati, kintinilinyak ning, el si bumbu ap, tonda yin talen nang arye bon ning, deiamuk ning nirya ara, sik Babel mutuku arye yanganmek nang ati, aning nirya ara, peterebukba, eibuka bikik. Sik anang ati, tonok ning babye, ton kum duknubuk bukni, Hizkia el taleamuk aik noutam deiamukba, awamuk ning nirya ara, peterebukba ebuka bikikce, sik mutuku tamubuka bindobik.

14 Winibukopura, nabi Yesaya birye, Raja Hizkia dam yayukce, “Sik anang ara, dan mutuku nang do? Tonda, sik anang ara, yate ning patalula ati yanmekce, anti yata nyapmakiyak do?” nyabuka asibuk. Asipdeyuk ati, Raja Hizkia birye tamubuka nyabuk, “Kume, sikda Babel mutuku, pia pera weik mutuku nang yanmangua,” nyabuk. 15 Nyabukopura, Yesaya birye, ayupu tonap dukdongobuka nyabuk. “Sik anang ara, an talibuka ulyam asik noutam ara, yata-yata ning dilyanmangurye, eibuka bikmak do?” nyabuka asibuk. Nyabuka asibuk ati, Hizkia birye tamubuka nyabuk. “Kume, narye deipse ning, yala-yala nirya ara, eipmakce bikmake. Tonda na talinun asik noutam deibik ning, yala-yala nirya ara, tonok babye, ton kum duknupmane. Aning nirya ara, lake nyapmanbuk, sik anang arye ebuka bikmake,” nyabuk.

16 Nyabukura, nabi Yesaya birye, tamubuka Raja Hizkia biti nyabuk, “Allah Yahweh arye, anti nyapnamkile,” nyabuk. 17 ‘Doyanamle talak noutam ara, an apu yapu, sik Raja-Raja nang nirya arye boyanuka arelyangalamikba, delilamik dekna weik bona yala-yala nirya ara, winira anggun atalak ululum ninye arye, boyanuka arelyangakiba, delimunye bona yala-yala nirya ara, pera weik mutuku unyak nang, sik Babel mutuku nang arye, dobuka bobinamsiyake. Tonok babye, ton kum bataknamsiyake. 18 Tonda aninguk kum bukni, an deiplum mapu kan-kan arye, sik tomobuka bobikiba, Babel mutuku ninye deiyok kibuka Raja talibuknye birye, el pil dona ati bobikiba, el pil melina ati, el weik aik damuk pil donamake,’ nyabuka, laka nyapdeipmakile.” Yesaya birye nyabuk.

19 Nyabukura, Raja Hizkia birye tamubuka nyabuk. “Allah Yahweh elce nyapdeipmakilba, anda na dam yanuka, nyapnilam ning ati, telebe nyapkine. Ayupu nyabukopura, Hizkia elce tenebuk ning ara, ‘E, narye ninye deiyok kibuka, talipnamne talak arye, yuk mutuku nang ati, olana kumak arye, talye kanye bobuka unamne. Allah arye nyapdeipmal ning winipnamle babye, nara, pia teleb ubuka, kam unamne,’ tenebukce nyabuk.

20 Hizkia birye, ninye deiyok kibuka, taleamuk talak arye, yuk yala pil ton dolamuk ning ap, el mikip deice arye, pi dobuka, pil dolamuk ning ap, yupu nyalamuk ning ap, tonda el taleamuk mutuku noutam, weik mekwen lokamukce, el asik noutam yangana ati, mek ban bisik memebuka deiamuk ning ara, Yehuda tam ulamik ninye, deiyok kibuka talilamik nang, sik si sekelilamik buku noutamuk sekuka deiamik. Abuku si ara, ‘Sejarah Raja-Raja Yehuda,’ nyabuka sekeiamik. 21 Raja Hizkia akunum dibukba, el mi Manasye, elce el li biti punubuka tikukce, Yehuda mutuku noutam ulamik ninye, sik deiyoknye kibuka tikukce, aninye taleamuk.