3 Akunum biyikopura, Yesaya biti nyabik. “Aning ara, ninye deiyoknye Raja Hizkia birye nyapmale,” nyabuka Yesaya biti lak nyabik.

Arup ara, nun ikin kanye bobuka unmabe. Aning ara, tilila ati kume. Deiyok ara, sik Asyur mutuku nang arye, nun opnamasiyaka ati, akunum kintinipmaka dam upmala ati, nyapne. Aning ati, winipmanto ara, kilapu arye, mi delilamaka atonun uple bukni, sik mikip akunum kum daliba, mi kum deipmanto ulamak talak ara, alye weik ulamle atonun upsila ati nyapne. Ati ara, ninye arye, yuk nang ati, weik arye, wenebikiba, alye weik ulamle touk upmasila ati, arup ara, nun mikip kum nang unyaba ati, nun alye weik upsile. Tonda, pia ikin kanye bopmabe.

4 Tonda Asyur mutuku ninye deiyoknye birye, yin talina deiyoknye biti nyalinmoba, nyapdeipmasil yupu nirya ara, Allah el si Yahweh arye, kekenmal do, kum do? Allah ara kam pia ulamlanye ulul bukni, Asyur mutuku weik deiyoknye birye, Allah elti, pia malye yupu nyabuka nalinmoke. Aning ara, Allah akunum kekepmalce bikmal do? Na kanye ara, ance el si erebuka el piluk dolyam Allah arye, amalye yupu kekeptopura, ‘Dipkoprop Asyur mutuku talibuka deiyoknye biti wenepnamlarya,’ tenepne. Na walwal bukni, Allah elda kele.

Ati ara, ‘Allah el si Yahweh arye, wenen ning el nong deice deipnamimile. Tonda anye birye, bisibuka opsilyopura, Allah ati moronamsulum’ tenen, nyapkine. Tonda, opsiliba, mitik anun tuba kam unamak nang ati, ‘Allah arye, anang meliptue’ tenen, Nun ni Allah ati moropnamsulume. “Nun ni koproba Hizkia birye ayupu nyapdeipmalba, nunce nyapkiyabe,” nyabik.

5 Raja Hizkia birye, dopdeibuk nang, nabi Yesaya dam binuka ayupu nirya akunum lak nyabikura, nabi Yesaya kekebuk. 6 Akunum kekebukopura, Yesaya birye anang ati tamubuka nyabuk. “Anggunce anggun deiyoknye biti, ‘Allah el si Yahweh arye, nyapmale,’ nyabuka lak nyalbilulume. ‘Allah el si Yahweh arye, nyaple. Asyur mutuku ninye deiyoknye birye nyabukba, el amu tam pil melinanye birye nyapmal ning ati, ilil una pia meme. Anye birye, na Allah ati, pia malye yupu nyabuka na deice yu yupu nyapdeipmanil bukni, ayupu ati ilil una meme.

7 Tonda na nyapnusin yupu ara, moubuka kekeplulume. Na Allah arye, Asyur mutuku deiyoknye, el talima noutam ara, el kanye tamupdeipnirye pil dopnyopura, aminyan talak yupu lak nyabikiba, kekeplyopura, el mutuku tamubuka binamle. Akunum tamubuka bilyopura, el mutuku noutam ara, narye arepneba, yuk nang arye, parang ya bobikirye, anye oplopnamake. Allah arye, nyapmakile,’ nyabuka lak nyalbilulume,” nabi Yesaya birye nyabuk.

8 Aminyan talak, yuk nang arye, Asyur mutuku yin talina ati weik deiyoknye biti nyabik.

Kume, an ni koprop, Asyur mutuku weik deiyoknye birye, ‘Lakis mutuku akunum bindopmale,’ nyabuka lak nyabikopura, ayin talina deiyoknye birye, Raja Hizkia mutuku dam batakuka bindobuk. Binmoka ani, yuk mutuku binuka dipdeyukura, Asyur mutuku ninye deiyoknye birye, yuk mutuku nang, Libna mutuku nang ati, ‘Sirya opnaman’ tenen, mal oldanmekak, binuka eibuk.

9 Atalak ara, Asyur mutuku ninye deiyoknye, el si Sanherib birye kekenmok buk, yuk nang arye, lak nyabik. “Kume na ni, Etiopia mutukunye bukni, elda Mesir mutuku talibuka ninye deiyok ululnye, el si Tirhaka, elce an olyanamakile,” nyabik. Nyabikba, ayupu kekebuka ati, tuba tonap, ninye dopdeibukba, Raja Hizkia dam binuka yupu lak nyalbiyik. 10 Elce nyapdeibuk yupu ara, ani.

Anggunda Yehuda tam ninye deiyoknye, Raja Hizkia dam bimunce nyaplulume. Anda tenipdelyame. Ance si erelyam Allah arye, nyapkilye yupu ara, diba kum tenenamlyame. Allah arye, ‘Yerusalem mutuku ap, amutuku unyak ninye ap ara, Raja Asyur tamnye birye, opsilirye kum talipnamsile. Minop bisibuka opnamsile,’ nyabuka, nyapsutua babye, aning ara, dib kum tenenamlulume. Aning ara, tilila yupu uk nyapkilya ati, aning ara kekena meme.

11 Aning nyapmakina ara, tilila ati kume. Minop talak arye, diprongobuka wini talak babye, na apu yapu, yuk Asyur mutuku deiyok nang arye, yuk mutuku nang weik obuka sirya dakikce kum daneiamik ning ara, dipkoprob an akunum kekelalum do, kum do? Akunum kekelalume tenepkine. Danto mikipnye birye, lyepkutuba, an ap, an tam nang ap, ton obuka sirya daktibye do? Kum tenepne.

12 Aning atonun tenipdelulume. Minop talak arye, diprongobuka wini talak babye, ninye mutuku-mutuku nirya arye, si erelamik isa ara awinilamik bukni, na apu yapu arye, aninye nirya obuka sirya daneibik. Sik si erelamik ning nirya ara, tonok ning babye, aninye kum lyepdobuk. Winipmanto ning ara, nyapnukine. Sik Gazon mutuku nang ap, Haran mutuku nang ap, Resep mutuku nang ap, tonda Eden mutuku nang Tel-Assar mutuku ulamik nang ap, sik ayala-ayala nang nirya batakupu do? Kume, sik nirya arye, isa si erelamikce, ‘Se melipsilyame,’ nyalamik bukni, aisa arye, anang ara kum lyebikba, nunce amutuku-amutuku nang nirya obuka sirya dakupue.

13 Aning atonun, Hamat mutuku weik deiyoknye ap, Arpad mutuku weik deiyoknye ap, tonda weik asik si Sefarwaim mutuku weik deiyoknye ap, Hena mutuku weik deiyoknye ap, Iwa mutuku weik deiyoknye ap, sik nirya ara dan do? Raja-Raja nang nirya ara, nunce akunum oplobupu. Ati, an ton talye bataknamap do? Kume aning kum winipmanto.

Asyur ninye deiyoknye birye, Raja Hizkia biti ayupu nyabuka surat sekeibukce, ninye dopdeibukba, lak nyalbiyik.

14 Asyur mutuku weik deiyoknye birye, ayupu nyabukce surat sekdeibukba, elce nyapdeibuk yupu nyapdeibikura, yuk nang arye, Raja Hizkia dam bobiyik. Surat bobanmek nang arye, asurat taruk deice bopmekce, Raja Hizkia dam binuka erebikba, Hizkia birye dobukabukce yinibukopura, adiparyuk asurat bobukabukce Allah el si Yahweh, el si eren aik dam bowekelbiyuk. Bowekelbiyukce, Allah el dam asurat dobuka tukwak binuka deibukce, Allah ati morobuk. 15 Asurat tukwak binuka deibukce, Hizkia birye Allah el si Yahweh ati morobukce nyabuk.

Na ni Allah an si Yahweh, anda Israel nang pia melibuka kalikisilyame. An dirina ara, an si eren aik pum tam ulule. Minop arye, memepdeibik ning, malaikat urasin atonun deibik ning dana-dana tam tikrikce, sik pol anoutam ara, an aulyame. Anda aning-aning deice tam umince aning nirya talilyame. Ninye tukwak nang arye, amutuku-amutuku weik talinyakce, weik deiyok unyak bukni, dipkoprob ara, ancuk amutuku nirya ap, adeiyok nang nirya ap, deice tam umince talilyame. Weik mikip weiknye bira an tonoka. Na ni Allah ancuk im ap, im deice ap, tukwak ap, kwepdeiplumce, weik deiyoknye ulyame.

16 Ati ara, na ni Allah, anda Yahweh, an amul arye, moubuka kekenulyame. Tonda, an asing arye, moubuka dinulyame. ‘Narye, nyapnukin yupu kekepnunilam’ tenen, moropkine na ni. Asyur mutuku weik deiyoknye, el si Sanherib birye, ‘Allah el si yanipnamne’ tenen, pia malye yupu nyabuka, an deice akunum deipkile. Anda kam pia una deiyoknye ulyam bukni, anye birye aning dib tenena kumce, anti malye yupu weik nyakinyak ning ara, pia moubuka kekepnulame.

17 Dib na ni Allah an akunum kel bikamlume. Sik Asyur mutuku ninye deiyok nang nirya ara, yuk-yuk mutuku nang nirya obuka kum kipdeiamikce, tuba osinyake. Asyur nang arye, yuk nang sik mutuku-mutuku nirya talye dalubuka, ubula dolonyake, tonda yuk mutuku nang arye, domik ning ap, kouamik ning ap, aik domik ning ap nirya ara, malye kibukabikirye, kum danalinyake.

18 Tonda, sik Asyur nang arye, yuk mutuku nang sirya obuka dakikirye, anang arye, si erenyak isa mer urasin atonun kibuka memepdeibik ning nirya dobuka, uku dongolamikba uku dibuk. Nun kele, yuk mutuku nang arye, si erenyak ning ara, dipkoprob Allah kume. Aning nirya ara, talye yo ap, keil ap, doprobikirye memebuka delinyake. Ninye taruk deice aryuk memenyake. Aning nirya ara, Allah atonun kume. 19 Ati ara, na ni Allah, an si Yahweh ati moropkine. ‘Ance, nun Yehuda tam unyap nang ati lyepsutum’ tenen, moropkine. Asyur mutuku ninye deiyoknye birye, nun ona ati akunum kintinip deipmala ati, ance lyepsilyame na ni. An mikip deice arye, lopdeipsiminba, tukwak mutuku nang mutuku-mutuku nirya arye, eibikirye moubuka kel biknamake. Ara, ‘Se dipkoprob Allah el si Yahweh ara, elda Allah tonoka. Yuk ton pia kum ulule,’ tenebikirye kel biknamake. Hizkia birye Allah ati moronmokce nyabuk.

20 Amos el mi nabi Yesaya birye, ninye dopdeibukba, Yehuda tam ninye deiyoknye Raja Hizkia biti lak nyalbiyik.

Israel ninye nirya, pia kalikuka melilul Allah, el si Yahweh arye, nyapmakile. “Ance, ‘Asyur mutuku ninye deiyoknye Sanherib birye, olyasilyak’ tenen, anye biti teneplumce Allah moropmom ning ara, na Allah arye, akunum kekepkine.” Allah arye, nyapmakile, Yesaya birye Hizkia biti nyabuk. 21 Nyabukopura, ayupu ton nyabuk. “Tonda, Allah el si Yahweh arye, ‘Asyur mutuku deiyoknye Sanherib birye, malye kibuka kum obisipnamkile. Na Yahweh arye, yupu akunum sekmane.’ Allah arye, nyapkile. Ara, el Sanherib biti ayupu ton nyapmanue,” Yesaya birye nyabuk.

Allah arye, nyabuk. Yerusalem^a mutuku noutam unyak ninye arye, an Sanherib biti, akutubuka malye nyakinyake. Anti ara, ‘Anye nun like,’ tenenyake. Aning atonun, aminyan talak ilil upkiliba, ance bikbik abuka bindopnalam talak ara, Yerusalem mutuku noutam unyak kilapu nirya ara, anti, ‘Elda talinye, dauplye,’ tenepnamkiyake.

22 Na Allah arye, nyapkine. Anda moubuka tenepmince, kel biknamanilam do? Ance pia minin yupu ap, nalipnulum yupu ap, malye yupu nyabuka na si deice nalipnulum yupu ap ara, ayupu nyaplum talak ara, yatanye deice arye, ayupu nyapdeiamlum do? Tonda, an talima erepdalumce, kwaliminya deice arye, weik yupu deice malye yupu nyaplum talak ara, yatanye deice arye, ayupu nyapdeiamlum do? Amalye yupu nirya nyamlumce, weik yupu deice nyamlum ning ap, an talima erebuka kwalina ap umince, malye yupu nyalyam talak ara, yatanye biti nyalyam do? Ara, nara Allah, pia telebuk, unune. Nara diksukumuk unirye, Israel nang melinune. Na deiceak, amalye yupu nyanilyame. Nara Allah, na tonok ununa ati, ance malye yupu nyalamnulum talak ara, nati nyanilyame. Aning moubuka kel kum bikamlum do?

23 Ati ara, ance Raja Hizkia biti, malye yupu nyapdeiplum ning ap, surat sekuka dopdeiplum deice arye, dipkoprob na Allah ati, malye yupu nyapdeipnulume. Tonda ance talima erebuka kwalina deice arye, ayupu ton nyapnulume. Nara, na kuda arye, kirikuka tuku deice ban ning deice buksirye, weik mutuku deice welepse. Libanon mutuku noutam babye, weik mutuku dup welepse. Libanon mutuku noutam ara, weik cang yo, kepyal yo wepse. Tonda, sik pia urasin teleb ubuk ning, sanobar yo wepse. Aninguk kum bukni, ‘Yuk mutuku nang arye, nun mutuku noutam, pia pera mutuku, kum binmanto mutuku,’ tenebik mutuku babye, na akunum binuka wekse. Tonda, Libanon mutuku pia teleb yo noutamak nirya ara, na akunum eibuka wekse.

24 Tonda, yuk ninye arye, taleamikce ulamik mutuku amutuku weik, bisipsirye narye, ‘Mekwen deipnamle’ tenen, tuku palipsiba, mek mekwen deibukopura, mek kwebuka dipse. Tonda, narye, Mesir mutuku bisirye, sik mek sekne bisik tuku palibikba, mek balamuk mek lilun ara na ap na yin nang weik ap, yanilamupuba, tuku sakukce amek nirya malye kibuk, tonda cepdobuke. Anda Asyur mutuku talinanye birye, nyamlum ning ara, na Allah arye, nyapkine.

25 Nyabukce ayupu ton dukdongobuka Allah arye, nyabuk. Malye kilalumce ayupu nirya ara, kwalina deice arye, nyalamnulum bukni, nara Allah arye, nyapkine. An kekebuka kel kum bikamlum do? Minop talak arye, deiyok koubuka, ‘Aning nirya winipnamle,’ tenyamsirye, akunum kintinipse. Na Allah aryuk, ‘Asyur mutuku deiyoknye deice arye, mambul pil weik donamle,’ tenyamkisa ati, narye areamkisiba apil dolamlume. Minop talak arye, ‘Winibuka-winibuka, winipnamne,’ tenyamse ning nirya ara, wini talak ara akunum winipmane.

Ara, narye, deiyok ning areamkisiba, amambul pil dolamlume. Ancuk kume. Ati narye, arepkisiba, weik asik akunum yanuka obuka sirye dakike. Amutuku-amutuku nirya ara, ‘Malye nang wekuka opsicak’ tenen, sik asik dana-dana tam cang keil poka yangabuka wiamik bukni, akeil poka ap, anyasik-anyasik nirya ap ara, ance uluploplumba, wini talak ara mitik keil uk tuba upmale.

26 Na Allah arye, mikip areamkisiba, amutuku-amutuku nang nirya obuka sirya dakamlumba, sikda, pia alye weik unyake. Sik mikip kum mitang ubukba, ‘Se yata wiriptibye do?’ tenen, imun kanye bonyake. Ati ara, sik amutuku-amutuku unyak nang nirya ara, ilil ubukba, talye palamle ning atonun, wa win dam winiryuk palamle ning atonun unyake. Sik mikip kum anya arye, ninye weklamak aik dumu deice falamle ning nirya, keting panaplirye, buppu weik deiplyopura, minopce koululamle. Mikip arye, kum papmanto unyake. Anang babye atonun unyake.

27 Bukni, an winiminye ning nirya ara, na kele. Ara, ance, ‘Amutuku unamne,’ teneminye mutuku, na kele. Ance, ‘Amutuku batakuka amutuku binamne,’ teneminye mutuku ap, tonda, ‘Amutuku batakuka, yuk mutuku binamne. Amutuku yanamne,’ teneminyak nirya ara, na akunum kel bikinune. Aning atonun, ance nati, ‘Allah ara na like’ tenen, yu upkiliba, weik arye, kwalibuka malye yupu weik nati nyaniminye yupu babye, na akunum kel bikinune.

28 Ati ara, na nyapnukin yupu kekepnilyame. Ance nati tenibuka, derenimince, weik arye, malye yupu weik nyanilyam ning ara, na akunum kel bikisa ati, weik arye, wenepnamkine. Tonda, ance tenebuka kwalina arye, malye yupu nyaniminye ning nirya ara, na dam yangaliba, na amul arye, akunum kekepkise ati, weik arye, wenepnamkine. Ati, winipnamkine. Sapi basam kirikuka bobana ati, kat ning sik u pum bisik dongobikirye, tapu kirikuka bobalamak atonun, narye, an wenena ati winipnamkine. Tonda, kuda basam wein nang arye, ‘Akuda na tenepman bisikuk banamal’ tenen, kat ning sik si bama pum tam dongobikirye, tapu kirikuka bobalamak atonun, narye, an wenena ati, winipnamkine. Aning atonun, an kum tenepmalam ning bukni, narye, nyapdeipniba, ikin ning weik an nong deice upnamkile. Tonda, an banalam bisik nirya ara, naryuk bobanamkine. Winipkiniba, an yalum bisikuk tamubuka bobanamkine. Allah arye, Asyur mutuku taleamuka deiyoknye biti nyabuk.

29 Nabi Yesaya birye ayupu lak nyabukopura, ayupu ton dukdongobuka Raja Hizkia biti nyabuk.

Raja Hizkia, anda, ‘Allah arye, wininamle ning dib tenepnalam’ tenen, lak kilin ning winipnamkila ara, ani. Aminyan winipnamne ning deiyok ara, ance, ‘Aning nirya ara, dipkoprob winipnamle’ tenen, ‘Dib tenebuka kel biknalam’ tenen ati ara, narye, lak kilin ning arepnamkine.

Allah arye, nyapkile. “Anyapdeipnukin yupu ara, an deice winipnamkila ati, lak kilin ning ara, ani. Ara, aketing tamun ara, anggun Yehuda tam ninye arye, koulamlum ning kum bukni, elbiyuk arye, talye buru tam palamle ninguk dinamlume. Oketeng tamun bitinye ning ara, aning atonun bukni, talye palamle ning dinamlume, keting tamun tonok ning el yala ning ton sakuka paplirye moulyopura, aninguk dinamlume. Wininamlum bukni, keting tamun winilinye ning deice ara, wa wilamunye ning, moulyopura, libuka dinamlume. Tonda, anggur tapu duk dokamunya ani, duk mouplyopura, weik arye, dakuka dinamlume.”

30 “Tonda domon yupu ton nyapnukine. Ara, ninye arye, koulamak ning, koubikiba, aning el yating tuku pum tam weklirye, nong telebuk nebuka weleplirye, aminyan talak duk teleb ubuka moulamle atonun, Yehuda yala nang babye, weik opnamak bukni, mitik anun uk tuba kam ulamiki bukni, aminyan talak tuba tonap, weik upnin banamake.

31 Aning ara, talye ati kum nyapkine. Deiyok ara, aning atonun Yerusalem mutuku noutam ara, ninye weik opnamak bukni, mitik anun ton batakikiba, kam unamake. Ara, Sion mutuku kon noutam arye, kum oplobiceba, tuba kam unamak nang ton, yanganamake. Aning nirya ara, Allah na si Yahweh arye, aning nirya akunum tenyamsa ati ara, na mikip deice arye, aning nirya ara dipkoprob kipnamlarya. Nara Yahweh, aning-aning deice tam unirya, na mikip deice arye, aning-aning nirya dipkoprob wininamnarya.”

Allah arye, anda Raja Hizkia biti, nyapkile. Nabi Yesaya birye nyabuk. 32 Atalak aryuk, nabi Yesaya birye, Hizkia biti nyabuk.

Allah el si Yahweh arye, Asyur mutuku ninye deiyoknye biti, ayupu nyapkile.

Allah arye, nyabuk. “Dipkoprop nyapkine. Asyur mutuku talinanye birye, amutuku Yerusalem pia kum yanuka weknamle. Tonda el mal arye, ton amutuku ati, tonok ning babye kum dopdenamle. Tonda ninye on ning yuk ning ton amutuku dam kum boyanamle. Tonda, amutuku dana-dana cang keil poka welepna arye, amutuku noutam wekna ati, tuku palibuka keil poka dam pia kum deipdongoplirye, welebuka yanuka kum weknamle. 33 Asyur mutuku ninye deiyoknye, el yanmalye bisikuk tuba tamubuka abisikuk bindopnamle. Nara Allah, na si Yahweh arye, dipkoprob nyapkine. Amutuku Yerusalem ara, pia kum weknamle.”

34 “Tonda na Yahweh arye, nyapkine. Yerusalem mutuku ara, na aunmana deice arye, anggun ap, Yerusalem mutuku ap ati, kaliknirya lilibuka lyepropnamsine. Lyepsiniba, anyasik nirya auplibuk, aunamlume. Tonda, narye, apil donamna deiyok ara, ‘Anyaik kum lyepnyopura, yuk nang arye, na si malye kipnicak’ tenen, sik lyepnamne. Tonda, na amu tam pil dolamnuknye Daud ap ati, nyalin yupu nyapdeipsa ati, sik lyepnamne. Ati ara, na si ap, Raja Daud ap ati, ayupu nyapdeipsine. Allah narye, ‘Yerusalem mutuku kaliknirya lyepnamnarya,’ nyapse touk dipkoprob winipnamle. Allah el si Yahweh arye, nyapkile.” Yesaya birye, Raja Hizkia biti nyabuk.

Ura, ayupu nirya ara, Allah el yupu nyapdeibukba, el yupu lak nyana deiyoknye, nabi Yesaya birye kekebukce, surat sekuka Israel ninye deiyoknye Hizkia biti dopdeibukba, yinibuka kel bikuk.

35 Yesaya birye, asurat sekuka Hizkia dam dopdeibukba, ayupu nirya eibuka kel bikuk talak aryuk, asum lukunyan noutam ara, Allah el si Yahweh arye, dopdeibukba, el im deice pil donanye malaikat yayuk. Yayukce, Asyur mutuku yin talin nang, sik cang kain tenda aik pum tam mapmeka ak, amalaikat arye, ninye yupa pia weik, seratus delapan puluh lima ribu (185.000) nang nirya oplobuk. Oplobukba, yuk nang ton mapmeka berekukopura, beren tam talak ara, anang yupa pia weik dipmeka ati, sik nong ara laka upmokba, amutuku nang arye, eibik.

36 Aning winibukba, Asyur mutuku ninye deiyoknye Sanherib eibukce, ilil ubuka ati, el ap, el mapu yin talin nang nirya ap arye, anyaka batakukce, el mutuku uk Niniwe mutuku tamubuka biyukce asukumuk ulamuk. (Winibuka ati, Allah arye, ‘Wininamle,’ nyapdeibuk touk winibuk).

37 Amutuku uk, dapia ulamuk bukni, tonok sum ton, el si erelamuk isa, el si Nisrok nyalamik ning ara, aisa si eren aik pum tam, biyukce si erenmok. Wininmok ani, el mapu Adramelek ap, Sarezer ap arye, ninye on ya dobuka sik ni koproba oprik. Winiprikce, ‘Yuk nang arye, wenebuka opsicak’ tenen, ilil unmokba, sik adiparyuk buru sakuka, Ararat mutuku birik. Anang bitinye akunum birikopura, Asyur mutuku taleamuka deiyoknye, el pununa ati, el mi koprop el si Esar-Hadon punubukce, amutuku taleamuk.