1 Israel ninye bokukabikce yuk-yuk ulamik talak ara, tonoknye el si Hosea birye Israel ninye bukni, eitam mutuku ulamik ninye taleamukce sik Raja ulamuk. El li koproba ara, Ela ulamuk. Atalak ara, Hosea birye Israel ninye eitam mutuku ninye taleamuka ani, keting tamun winilye akunum ubukopura, atalak arye, deiyok koubuka Yehuda mutuku noutam, outam ulamik ninye, sik ninye deiyoknye Raja Hizkia ulamuk. El li koproba ara, Ahaz ulamuk. El lin bira, Zakaria el kilmu Abia ulamuk.

2 Yehuda mutuku tam taleamuknye Hizkia bira el delin talak ara, keting tamun 25 tahun akunum ubukba, atalak aryuk erepdeibikura, deiyok koubukce, Yehuda mutuku tam ulamik ninye sik ninye deiyoknye Raja Yehuda ulamuk. Sik mutuku koprop ara, weik asik si ara Yerusalem mutuku ulamukce atam ninye keting tamun 29 deice arye, taleamuk. Ura, Hizkia el lin koproba ara, Abija ulamuk. Abija el ni koproba, Zekaria ulamuk. 3 Ura, Hizkia bira, el apu koproba Raja Daud ulamuk touk, pia diksukumnye ulamukce, Allah el si Yahweh arye, ‘Aning telebe,’ tenelamuk ning nirya moubuka taleamukce telebuk winilamukba, Allah arye, elti, kanye deiamuk.

4 Hizkia bira teleb winilamuk ning ara ani. Yehuda mutuku tam ulamik nang arye, Allah el si erena ati, mutuku kon deice domik aik balamikce kam ning obuka Allah ati arelamik bukni, anyaik ara Allah arye, ‘Aning ara, kum wininamlume, aning ara winina meme,’ akunum nyapdeiamuk.^a Ati, anyaik-anyaik nirya ara, Hizkia birye ulubuka dakuke. Tonda, aninye arye, ‘Isa Mutuku Dongonye si erenamap’ tenen, weik keil dobuka, dokola delilamik ning nirya ara, Hizkia birye teikukura, kum daneibuk. Tonda, ‘Isa Mutuku Dongonye kil el si Asyera erenamap’ tenen, cang yo ikukabice, isa si erelamikak ara, acang yo nirya Hizkia birye, ayo weblobuk.

Ton ning ara, minop talak Israel ninye mek ap, ninye ap, kum ulamik mutuku, talye balamik talak ara, yu kwatima arye, si tobukba, ninye weik diamik bukni, Allah arye, nyapdeibukba, Musa birye kat ning, el si tembaga dobukabukce, kwatima urasin atonun ning memepdeibukce, cang yo deice deibuk. ‘Aning ara, weik mambule,’ tenelamika ati, kat ning dopropnak arye, kwatima urasin atonun^b memepdeipna arye si erelamikce aning dem morolamika ati ara, malye ning pia weik winilamik. Ati, sik Yehuda tam nang arye, kat ning dobuka abal urasin atonun ning ton memepdeipna arye, aning si ara, Nehustan nyabuka si silamikce, ‘Nun moronyap ning kekepsilirye, melinamsil’ tenen, tong teleb ning uku dongolamikce, aning si erelamikce morolamik. Winilamika deice arye, pia malye winilamika ati, Raja Hizkia birye abal urasin atonun memeldeililamik ning ara, dobuka pouklobukce, kum kipdeibuk. Ara, ‘Yehuda nang arye, tuba aning si erebikcak’ tenen, winibuk.

5 Ura, Raja Hizkia birye teleb pil dolamuk ning deiyok nirya ara, ani. Ara, Raja Hizkia bira, Allah el si Yahweh ati pia dib tenelamuka ati ara, apil dolamuk. Elce, ‘kume, Allah el si Yahweh arye, nun Israel ninye nirya pia kalikuka melilamsuk Allah ara, el tonoka,’ tenelamuka atia. Yehuda tam ulamik ninye ara, sik Raja nang weik ton aulamik bukni, sik yuk-yuk Raja nang ara, el tonun kume. Hizkia bira pia telebnye ulamuk. El min kum deiamik talak babye, el akunum deibikba, nebukce Yehuda ninye taleamuk talak bukni, aminyan talak babye, el ulamuk atonye ton kum ulamik. Pia telebnye bira el uka.

6 Hizkia bira, ‘Nun ni Allah el si Yahweh, el tonok atibuk moubuka talipnirye, el amu tamuk pia unamne. El ti batakana kumce, Yahweh arye, nyapdeiamsuk yupu moubuka talipnirye, aninguk wininamne tenelamuk. Tonda, ‘Allah el si Yahweh arye, Musa biti, ‘Aning ara wininamlume, aning ara ton kum wininamlume,’ nyapdeiamuk yupu, aninguk talipnirye dobolbanamne,’ tenelamuk.

7 Hizkia birye winilamuk ati ara, Allah arye, elti, pia melilamuk. Ara, Allah el si Yahweh arye, Hizkia biti melilamuk deice arye, elce yata yala pil do nirya, el pil dolamuk ning nirya ara nong ulamukba, pia telebuk ulamuk. Tonda, Asyur mutuku tam nang sik taleamuknye birye, ‘Yehuda tam ninye obuka sirya daknirye, anang na amu tam pia ukirye, narye, dipnye piluk talye pil donamniyake,’ tenelamuk bukni, Hizkia bira, ‘Aning pia kum wininamne,’ tenebuka ati ara, Asyur mutuku ninye deiyoknye el yupu kum kekelamukce, anye biti yaniltalamukce, Raja Asyur mutukunye el pil kum dolamuk.

8 Tonda, Hizkia birye, sik mal olan nang, Pilistin nang ara, obuka sirya dakamuk. Yata mutuku do nirya, el taleamuk mutuku noutam talye wa win dam kalikna ati cang aik domik dam do, weik asik domikce, ‘Malye nang arye, talye olyasicak’ tenen, cang keil poka antanap dongobuka domik ning dam arye, do, el taleamuk mutuku noutam nirya bukni, otam Gasa mutuku babye, amutuku dam babye, Pilistin mutuku tam nang babye, sirye obuka dakuk.

9 Ura, Hizkia bira ninye deiyoknye Raja ulamukce, Yehuda yala ninye taleamuka ani, aninye taleamuk talak ara, keting tamun dumbarye, akunum ubukopura, atalak aryuk, Israel tam ninye sik ninye deiyoknye el si Hosea bira, keting tamun tekbarye, deice arye, Israel nang akunum taleamuk. Hosea el li koproba ara, minop talak Israel ninye sik deiyoknye Ela ulamuk.

Tonda atalak uk Asyur mutuku nang, sik ninye deiyoknye el si Salmaneser ulamuk. Raja Asyur mutukunye Salmaneser ulamukce, el mapu silip nirya bulubukabikce, Raja Hosea ulamukak Samaria mutuku koulukuka biyik. Amutuku dam yayikopura, ‘Israel ninye sik asik arye, bura tam din lilbinuyak do! Tonda bai tam sakuka binuyak do?’ tenen, antanap dongobuka warikmek. Winilamikce, dapia tuba wariklamikba, Yehuda yala ninye yukak binmanto kum ulamik.

10 Winibuka daulamika ani, pia daulamik bukni, keting tamun winilye akunum ubukopura, sik Asyur mutuku yin nang arye, Samaria asik nirya obuka sirya dakice alupdobik. Ati ara, Yehuda tam taleamuknye Raja Hizkia el tam nang taleamuk keting tamun nakub barye, akunum ubukopura, atalak bukni, sik Asyur nang arye, Samaria mutuku nirya obuka sirya dakik. Aketing tamun ara, Israel tam taleamuknye Raja Hosea bira, el tam nang taleamukce keting tamun 9 tahun akunum ubuk talak ara, ani. Aketing tamun tonok bukni, Hizkia bira Raja nakub barye, tahun deice arye, ulamuk. Tonda, Hosea bira Raja 9 tahun deice arye, ulamuk.

11 Atalak ara, Asyur mutuku ninye deiyoknye nyapdeibukba, el mapu silip arye, Israel ninye tomobukabice tapu koubukabice, pia pera mutuku sik Asyur nang ulamik mutuku bobinuka deibik. Israel nang bobiyikura, bokukabikce, ton tam nang ara, mutuku si Gosan mutuku bukni, weik mek Harbor mekin dam bobinuka deibikba daulamik. Ton nang ara, asik si ara Hala mutuku bobinuka deibikba daulamik. Ton tam nang ara dokuka, bobiyikce Madai yala nang ulamik tam noutam asik yuk-yuk delilbiyikba, yuk-yuk daulamik.

12 Ura sik Asyur mutuku nang arye, Samaria mutuku obuka sirya dakikce, Israel tam nang bobiyikce pera mutuku deibik ning deiyok ara, ani. Sik Israel ninye uk Allah el si Yahweh arye, ‘Aning ara wininamlume, aning ara kum wininamlume,’ nyapdeiamuk yupu moubuka kum taleamikce, ayupu kum winilamikce, bataklamika atia. Tonda, Allah el si Yahweh arye, Musa biti ‘Wininamlyame, winipmunyopura, narye, winibuka melinamsine,’ nyabuka, nyalin yupu nyapdeiamuk yupu nirya ara, ‘Nun like’ tenelamikce yaniltalamik atia. Ayupu nirya ara kekebuka nimalye arye, kum winilamike, tonda ayupu moubuka kum dobolbalamik. Batakna uk ulamika ati, Allah arye, yu arebukba, sik Asyur mutuku nang arye, Israel ninye obuka sirya dakikce, Israel ninye weik arye, tapu koubuka pera mutuku bobinuka deibikba daulamik.

13 Ura Raja Hizkia Yehuda mutuku tam taleamuka ani, keting tamun odeikin akunum ubukopura, Asyur mutuku deiyoknye, el si ara Sanherib, elce Yehuda mutuku noutam ulamik asik mikip weik nang ara, ‘Opnun’ tenen, biyukce, anyasik-anyasik nirya obuka sirya dakukce, sik asik nirya doprobukce, anang nirya tomobik.

14 Winibikopura, Yehuda yala ninye talibuka ulamuk ninye deiyoknye Raja Hizkia birye, ninye ton wipdeibukba, yupu bobuka Asyur mutuku taleamuk ninye deiyoknye Sanherib dam Lakis mutuku nyalbiyik. Anye bira Lakis mutuku unmok talak ayupu nyalbiyik. “Raja Hizkia birye ayupu nyapdeipkile. ‘Kume nara dipkoprob malye ulamse. Se na ni koprop ance akunum obisipmasulum bukni, tuba ton nun bataksimince, bokdopsiminyopura, nara ance nyapminye touk arepnamkine. Ara ance, “Dekna weik ning, winibuka-winibuka arepnamnilame,” nyapminya touk, aninguk arepnamkine. Ikin ning nun deice deipsimince, ‘kum opnamsilame’ tenen, moropmakine.’ Ayupu ara Raja Hizkia birye nyapkile,” nyabik.

Nyabuka morobikopura, Asyur mutuku weik deiyoknye Sanherib kekebukce, aminyan talak ara nyabuk. “Ura amoropnulum ning ara, kekepsine. Ati, atalak ara, dekna weik ning el si uang perak ara, el ikin pia kum nukmanto, 5 ribu kilogram nuklamak ning ara, arepnamnulume. Tonda dekna weik ning el si uang emas ara, weik 454 kilogram yinibuka nyalamak ning ara arepnamnulume,” nyabuk. Nyabuka ati, Hizkia Yehuda yala nang sik ninye deiyoknye birye, Sanherib nyapmok touk arebuk.

15 Ati ara, Hizkia birye ‘Perak weik arye, kintinipnamne’ tenen, Allah el si Yahweh, el si eren aik pum tam deiamikba, uamuk perak nirya ap, tonda Hezikia el weiknye ulamuk aik pum tam uamuk ning ap, nirya ara, Hizkia birye dobukabukce, Asyur mutuku weik deiyoknye Sanherib biti arebuk. 16 Tonda, emas ning arena ati ara, atalak Yehuda tam taleamuknye Hizkia bira Allah el si Yahweh,^c el si eren aik bublan deice taplakeibik ning ap, tonda bublan dam dana-dana tam nirya taplak deibikce domik emas ning nirya ara dobukabukce, Asyur mutuku taleamuk ninye deiyoknye Sanherib biti arebuk. Arebuka deiyok ara, ‘Sanherib birye opsilyak’ tenen, el namin kina ati arebuk.

17 Asyur mutuku taleamuk ninye deiyoknye Sanherib birye, Lakis mutuku arye, el yin talin nang, sik weik deiyoknye ap, weik deiyok nang bitinye ap, dopdeibukba, anang winilye arye, Lahis mutuku ara batakuka, Yerusalem mutuku biyik. Elce dopdeibuk nang ara, ani. Ara, el yin talin nang, sik weik deiyoknye ap, Raja el weik aik pil dona deiyoknye ap, tonda, Raja el mek din kalikna deiyoknye ap, dopdeibuk. Anang nirya ara, Asyur mutuku yupu bobana deiyok nang ulamika ati, anang dopreibukba, sik anang arye, deiyok bikikba, Asyur mutuku yin talin nang pia weik arye, tabakuka Yerusalem mutuku biyik. Lakis mutuku arye, Yerusalem mutuku biyikopura, Raja Israel tam el si Hizkia dam biyik.

Wekelbinukabikce, sik binuka doprobik lo ara, Yerusalem asik deice tam bukni, buru tam mekwen deiamuk ara, eitam mekwen dam biyik. Asukum arye, mek balamukba, Yerusalem mutuku mek binuka wekna ati, mek sekamik dam biyik. Aning ara, baju mek ilikina deiyoknye, el pil dolamikak lyu bisik ati, ‘Padang Tukang Penatu Bisik,’ nyalamik. Yerusalem asik mek kwelbana ati, mek wakamik ning ara, abisik dam ubuk.

18 Winibikopura, ‘Raja Hizkia yanul’ tenen, ati weik arye, yukunmek. Yukunmekba, Raja Hizkia el pil don nang winilye kutuksakuka yayikba eibik. Awinilye yayik nang ara, ani. Rajanye, el aik deiyoknye, el si Hilkia, el mi Elyakim ap, Rajanye el weik ning surat sekne deiyoknye Sebna ap, tonda, Raja el yo bok ap, dekna weik ning ap, yinibuka buku noutam seklamuka deiyoknye bendahara Asaf, el mi Yona ap, yayik.

19 Atalak aryuk Asyur Mutuku yin talin nang, sik deiyoknye birye, awinilye nang ati nyabuk. Anggun deiyoknye Raja Hizkia biti anyapnusin yupu lak nyalbinulume. Ara, wini talak ara mikip weiknye, Asyur mutuku ninye deiyoknye Sanherib birye, nyapdeipmal yupu nyapnusine. Elce nyapdeipsile. “Anggunda teleb kanye bobuka, ikin kum diparyuk, ‘Asyur mutuku weiknye yanibibirye, aning winiptibye, aning ton winiptibye,’ teneluluma ara, yata deiyok ati, aning tenelulum do?

20 Raja Hizkia, ance teneminya ara, ‘Kume, nun yin talin nang weik aunyaka ati ara, mikip weik nang unyabe. Tonda, nun weik kel arye, ninye olana ati, wininamabe, wininamabe,’ tenebuka nyalyam bukni, anye yupu mikip deice aryuk dib tenebuka, ‘Ninye optibye,’ tenelyam do? Aning tenebuka nyalyam ning ara, talye yupu uka. Anggunda mikip weik nang kuma. Wini talak yatanye birye ton melipkutuba, nun Asyur mutuku nang sirya opsutum do? Yatanye meliptumce, nati yanipnutum do? Kume, aning kum winipmanto. Nara mikip weiknye atia.”

21 Anggunda, ‘Mesir mutuku nang arye, melipsikca deice arye, Asyur mutuku weiknye talisilya ara batakuka, elti, sirya bisipbuka yaniptibye,’ tenelul bukni, dipkoprob nyapsine, Mesir mutuku weiknye ap, el tam nang ap arye, melipsitinga babye, nati yanibuka sirya kum daknutume. Winipmanto ara, nyapnusine. Ninye banukce talak kama dunubuka balamikiba, akama ara seleplirye, el siring arye, atalipmalinye bira el taruk luklamleto, anggun Mesir nang babye wininamsiyake. ‘Mesir mutuku ninye arye, lyepnamsiyak’ tenen, sik tam kipdopmunce yupu sisikimunyopura, ikin weik unamsile. Ara, lai tace deice arye, olalulum touk, wininamsile, nyapne. Aning atonun, yata mutuku nang do nirya, ‘Mesir mutuku ninye deiyoknye Firaun birye, melibuka lyepsutue’ tenen, el deice uk sik kanye deibikirye, el tibuk tenebikcopura, aminyan talak ikin weik unamake.

22 “Aning atonun, yu deibukabikirye, ‘Kume, nun ni Allah el si Yahweh arye, melisilya deice arye, Asyur mutuku deiyoknye sirya bisipbuka yaniptibye. Ati Allah el deice uk nun kanye delinamabe,’ tenepmunce, aning nyapnutum toura, aning ton nyapnusine. Allah babye elce ton kum melipsutue nyapsine. Anggun tenipdelulume. Anggunce si erelulum Allah el si Yahweh ara, el si erena ati mutuku deice aik domikce, ‘Kam ning obuka, el si erena ati arenamabe’ tenen, pala keil yangapdeiamik bukni, ninye si Hizkia birye asi erena aik, talye ning nirya uluplobukce, apala keil yangapdeiamik ning nirya dalubuka, kum daneibuk.

Winibukce, anggun Yehuda tam ululum nang ap, weik asik Yerusalem noutam ululum nang ap, ati nyabuk. ‘Kume wini talak ara, yuk-yukak nirya ara, Allah el si erebuka kam ning obuka el si erena ati kum arelyanganamlulume. Yerusalem mutuku noutamakuk, pala keil taplakuka yangeibubkak, asukumuk kam ning obuka Allah ati arelyanganamlulume,’ nyapdeibuk. Ati ara, anggun se tenebuka, ‘Allah ati morobibiba, Allah arye, melinamsilca,’ tenepmunyopura, Allah ati nyana teleb do? Kume, el babye kum melipsutue, nyapsine.

Nyabuka atalak ara, Asyur mutuku ninye deiyoknye Sanherib birye, sik Yehuda yala ninye ap, Yerusalem noutam ululum ninye ap, ati nyapsile.” Asyur mutuku yin talin nang sik weik deiyoknye birye nyabuk.

23 Nyabukce, ayupu ton dukdongobuka nyabuk. “Ati ara, wini talak ara na deiyoknye Asyur mutuku ninye deiyoknye, el si deice weik arye, ayupu nyapdeipne. Anggun ap, el ap, yupu talipnamlume. Elce yupa weik, dua ribu kuda basam arepsutopura, anggun tam nang noutamak arye, dua ribu yin nang wibuka deiptumba, akuda basam deice bukuka, ninye olbiting do? Na kanye ara, anggun yin nang suktaliptuma ati, kuda basam arepsutu babye, anggunce yin nang yupa weik kum wipdeiptume.

24 Tonda anggunce ‘Yata wiripnuyap,’ teninmalum do? Anggunda Mesir mutuku yin nang arye, nun melina ati, yin nang bukni, kuda basam balye deice bukuka balamak nang ap, kuda basan arye, kirikuka tuku deice balamle ning, el si kereta kuda ap, yanuka melipsikiba, anggun Asyur mutuku nang olana ati, melipsitingopura, ‘Asyur nang obuka sirya daktibye,’ tenelulume. Bukni, Mesir nang arye, anggunti, aning nirya arepsitinga babye, nun Asyur mutuku nang ati kum obuka bisibuka sirya kum daktume. Na deiyoknye Asyur mutuku ninye deiyoknye, el amu tam pil dona deiyok nang noutamak, tonok mitang uplye ning babye, anggunce kum obuka sirya kum daktume. Anggunce nun tam nang ton, ‘Obuka kisikdopnuyap,’ tenepmasulum do? Aning ara, pia kum winiptume.”

25 “Aninguk ton kume. Tonda, anggunce nunti, ‘Kume sik Asyur mutuku nang ap, anggun weik deiyoknye ap arye, nun Yeduda tam unyap nang ap, weik asik Yerusalem noutam unyap nang ap ati, olyanganmasuluma ara, sik kanye aryuk unyake,’ tenesulum do? Aning ara, kume nyapsine. Allah el si Yahweh arye, Asyur mutuku deiyoknye biti, ‘Israel ninye olbilyame,’ kum nyapdeiptopura, elcuk mangkau arye, anggunti olyasutu do? Kume, Allah el si Yahweh arye, el bidamnye arye, nun deiyoknye ati nyabuke. ‘Yehuda tam unyak ninye ap, weik asik Yerusalem unyak ninye ap ati, olbilyame,’ nyapdeibuka deice arye, yanuka olyasiyabe. Nun kanye deice aryuk kume. Allah arye, ‘Telebe,’ kum tenelul ning unyap do? Kume. Allah arye, nun deiyoknye nyapdeibukba, anggun mutuku ninye nirya ara, obuka kum kipdeipnamapce.” Ayupu nirya ara, Asyur mutuku weik deiyoknye, el yin talin nang, sik deiyoknye birye, sik Yehuda tam nang, ninye si ton, Elyakim ap, Sebna ap, Yoah ap, ati nyabuk.

26 Nyabukopura, Hizkia el mi Elyakim ap, Sebna ap, Yoah ap, sik nirya arye, Asyur mutuku deiyoknye, el yin talin nang deiyoknye biti nyabik. “Aning ara, telebe. Danyapsilyame. Bukni, sik amu tam nang ak, nunti, Aram mutuku yupu deice arye, nyapsiminyeba, nun nirya kekeptibirye kel biktibye. Bukni, Ibrani yupu deice arye, nyapsiminyopura, nun dam unyak ninye, keil poka deice tam unmaka ara, kekepsicak ati, Ibrani yupu nyana kume,” nyabuka morobik.

27 Nyabuka morobik bukni, ayin talina deiyoknye birye tamubuka nyabuk. “Kume, na deiyoknye birye dopdeipnukba, anggun dam yanuka nyasinya, ara anggun winilye ap, anggun deiyoknye ap atibuk, dopdeipnukba, ayupu nyasunun do? Kume, Anyasinye yupu nirya ara, sik keil poka deice bulupmakce kekenmasiyak nang babye, anggun kekena babye tonok dopdeipnukba, ayupu nyapsine. Apoka deice bunmak nang ara, sik din ning aning-aning nirya kum daliba, pia din patana uk unamla ati ara, sik mining lin ap, sik mining dei ap, dibuka unamak nang babye, ‘Sik kekenamak’ tenen, nyapsine. Tonda, anggun winilye nang babye atonun wininamlume. Anggun neika ululume ati ara, nun mutuku nang arye, anggunti obuka sirya daksicopura, anggun din ning aning-aning nirya pia kum daliba, din patana uk uplyopura, anggun nirya arye, aninguk wininamlume,” nyabuk.

28 Asyur mutuku yin talin nang, sik weik deiyoknye birye, ayupu nyabukopura, ‘Awekmek nang nirya kekepnuyak’ tenen, atikukabukce Ibrani yupu deice weik arye, nyabuk.

Anggun nirya moubuka kekepnulume. Asyur mutuku ninye deiyoknye birye, nyapsuk yupu ara, kekepnululume. Yuk ninye deiyok nang mutuku-mutuku nirya talibuka daunyak bukni, el tonok ara mikip weiknye binya arye, anggun deice tam ulule. 29 Elce nyapsuk yupu ara, ani! Anggun Yehuda tam talilul ninye deiyoknye Hizkia birye, ‘Anggun lyepropsitinye,’ nyapsutua babye, el yupu kekena kume. Hizkia bira, el mikip kum ati ara, nara obuka sirya kum daknutue. Narye, ‘Aninye opnirya, sirya daknamne,’ tenepsisa ara, elce yupu kum seknutue. Elda mikip kum mitangnye ulula atia. 30 Aning atonun, Hizkia birye anggunti, ‘Kume, nun ni koprop Allah el si Yahweh arye, dipkoprob lyepnamsila ati ara, nun unyap mutuku weik asik Yerusalem ara, Allah arye, nun mutuku dobuka anye biti kum arepnamle. Ati, Asyur mutuku weik deiyoknye birye kum obisipnamsile.’ Hizkia birye, ayupu nyasilya babye, el yupu ati, ‘Dib’ tenen, kum kekenamlulume.

31 Ati ara, Hizkia el yupu uk pia kum kekenamlulume. Asyur mutuku ninye deiyoknye birye, nyapsil yupu ara ani. ‘Anye birye obuka sirya daknamsil’ tenen, ‘El amu tam teleb kibuka unamap’ tenen, ‘Yerusalem mutuku batakuka buru tam bibirye, el ap teleb nyalin yupu nyalilanamabe,’ tenenamlume. Winibuka nyapdabirye, na tam kipropnumunyopura, telebuk unamlume. Ara, narye, anggunti kum opsinyopura, aminyan talak ara, anggun wa win dam yuk-yuk arye, anggur tapu duk dakuka, mek purupmunce, anggur mek dinamlume. Aning atonun anggun wa win dam yuk-yuk tiklamle ara yo duk dakuka dipmunce, anggun mekwen yuk-yuk palyamunye noutamakuk mek kwebuka dinamlume.

32 Winilamunye bukni, na aminyan talak yanyopura, anggun bobuka yuk pera mutuku bobisiniba, sik mutuku noutam binuka deipsiniba unamlume. Ara narye, pera mutuku bobinamsin bukni, aumunye mutuku atonun binuka unamlume. Aunamlum mutuku ara, aning-aning ayala-yala nirya weik arye, ulule. Jakong wa ap, gandum wa ap, anggur tapu duk wa ap, anggur mek winiryuk ning ap, roti kwaning ap, zaitun minyak mekintinina ati, zaitun yo duk moulamle yo ap, tonda mong mek ap, nirya weik uliba, aning-aning nirya dopropmunce dibuka, telebuk unamlume.

Ati ara, ‘Nunda kam uk unamap do? Dipnamap do?’ tenepmunce wipnululume. Na tam kipdopmunyopura, kum opsinyeba, pia kam unamlume. Kumopura, narye anggunti obuka sirya daknamsine. Ati ara, Hizkia birye nyanmasil yupu kum kekenamlume. Elce talye nyasulula ati ara, elce, ‘Nun ni koprop Allah el si Yahweh arye, lyepnamsile,’ nyapsilyopura, ayupu ara kekena kume. Allah el si Yahweh arye, kum lyepnamsile.

33 Anggun ton tenipdelulume. Yata mutuku nang arye, ‘Nun si erenamap ati, melipsiminba, Asyur mutuku ninye deiyoknye birye, kum obisipsutue,’ tenelamikba, narye anggunti kum obisipsise do? Kume, amutuku-amutuku nirya unyak ninye ati akunum obisipsik. Sik si erelamik isa arye, nati yupu kum seknike.

34 Tonda aning atonun, dan mutuku do nirya, Hamat mutuku nang arye, isa si erelamik ning ara, wini talak dan tam ulul do? Tonda Arefad mutuku nang arye, si erelamik isa ara, wini talak dan tam ulul do? Tonda, sik Safarwaini nang ap, Hena mutuku nang ap, Iwa mutuku nang ap arye, si erelamik isa mer ara, wini talak dan tam unyak do? Winilamik bukni, narye, ‘Samaria mutuku obuka sirya daknirya dalubuka dopropnamne,’ tenyamse ning ara, yupu seknik do? Kume, amutuku-amutuku nirya akunum obuka sirya daksice dalubuka dopropsik. Na taruk deice anang taleamsirye Samaria tam nirya taleamse bukni, sik isa mer arye, bisipnikce sik taleamik ninye lobik do? Kume.

35 Aning atonun, dan mutuku do nirya ara, isa arye, taleamikba ulamik bukni, narye, olyasirye, bisipsirye amutuku ninye tomobuka talipsopura, sik isa mer arye, sik taleamik ninye na taruk noutam arye, lopdeipsiba bindobik do? Isa Mutuku Dongonye babye, yuk si erelamikca babye narye, opnirya taleamse mutuku, na taruk noutam arye, lyelamik do? Kume, pia kum winipmanto ulamik. Ati ara, narye dib nyapsine. Yerusalem mutuku babye, Allah el si Yahweh arye, nati bisipnilirye, kum loplobuka lyepnamsile. Asyur mutuku deiyoknye, el yin talina deiyoknye birye nyabuk.

36 Nyabuk bukni, sik Yerusalem mutuku ulamik ninye arye, yupu tonok ning babye, ton tabakuka kum nyabik. Tunimabuka kekena uk unmek. Aning ara, tilila kume. Deiyok ara, anggun ni koproba Raja Hizkia birye, “Yupu tabakana kume,” akunum nyabuk ati, anang nirya arye, talye tunim abuka bukik. 37 Aning nirya akunum winibukopura, sik kekenmek nang, Hizkia el mi Elyakim, elda ninye deiyoknye el ulamuk aik, pil dona deiyoknye ulamuknye ap, tonda Raja el mambul ning surat seklamuk deiyoknye Sebna ap, tonda Raja el yo bok ap, dekna weik ning ap, yinibuka buku noutam seklamuk deiyoknye, ninye si Asaf birye deiamuknye, bendahara Yona ap, ilil kanye bopmek. Ilil kanye bopmekce, sik nirya arye, sik baju kwiribuka kwiliklobikce, Asyur mutuku yin talin nang, sik weik deiyoknye birye nyapmok ak, kekepmek yupu ati, Yehuda tam ninye deiyoknye Raja Hizkia dam laka nyalbiyik.