3 Ura, Raja Hosea bira, Israel tam taleamuk talak arye, Asyur mutuku ninye deiyok kibuka taleamuknye, el si Salmaneser, elce Israel tam yanuka obukabukce, Hosea taleamuk mutuku ara, Salmaneser birye, ‘Amutuku alubuka dopropnamne,’ tenebuk. Utenebuka ati, aketing tamun, aketing tamun nirya ara, Raja Hosea birye, el talilamuk bona kan-kan arye, dekna teleb ning, weik tonun dobuka, Asyur mutuku deiyoknye bitibuk arelamuk.

4 Bukni, aminyan talak ton, Hosea birye, Raja Mesir, el si ara So biti, “Ance na melipnutumba, Asyur mutuku ninye deiyoknye, el amu tam unmana ara, bataktinirye, elti, malye kiptinimnye,” nyabuka morobukce, sekin ning arye, surat sekuka deibukce, el mapu wipdeibukba, bobiyik. Tonda, Raja Asyur, el si Salmaneser biti, dekna weik ning bobinuka, keting tamun yupa pia weik deice, arelamuk ning ara, batakuka tonap kum arebuk. Asurat sekuka deibukba, yuk nang bikikce, Asyur ninye deiyoknye, laka nyabikba bikukopura, el Raja Asyur mutuku Salmaneser birye, Hosea tomobuka, wenen aik noutam binuka dongobuk.

5 Asyur mutuku taleamuknye, Raja Salmaneser birye, Hosea tomobuka, wenen aik pum dongobukopura, anoutam ulamuk talak nirya ara, Asyur mutuku taleamuknye Raja Salmaneser birye, Israel tam ninye ulamik mutuku-mutuku nirya, binuka warekuka obuk. Winibukce, amutuku noutam ara, weik asik kota si Samaria ton, ‘Akota unyak nang ara, asukum batakuka, yukak kum binamake. Tonda, yuk mutuku nang arye, anyasik kum wekelyanganamake,’ tenelamukce, keting tamun winilye deice arye, akota dam warekuka antanap dongamukce, kalikuka ulamuk.

6 Aninguk apia winilamuka ani, aminyan talak yayuk keting tamun ara, Samaria mutuku ulamik ninye ati, obuka malye kibuk. Ara, Raja Hosea birye, ninye deiyoknye kibuka, Israel tam taleamukce, mapnin balamuka ani, keting tamun toupne barye (9) kibukura, Asyur mutuku Raja arye, amutuku noutam binuka, alubuka doprobukce, el ap, el yin talin nang ap arye, amutuku ulamik ninye nirya tomobik. Anyasik nirya doprobikce, Israel tam ulamik ninye nirya tomobuka, tapu koubuka, sik bidaman mutuku Asyur mutuku bobiyik. Raja Salmaneser birye nyapdeibukba, el yin talin nang arye, Asyur mutuku noutam bukni, Israel ninye bokukabikce, ton tam ninye ara, bokuka Hala mutuku noutam delilbiyik. Ton tam ninye ara, Gozan mutuku noutam bukni, balamuk mek si, Habor mek lilun dam delilbiyik. Ton tam ninye ara, bokukabikce, Madai mutuku asik dobuka, ulamik mutuku dam delilbiyik.

7 Ara, weik imun kanye bon ning, Israel tam ulamik ninye deice yayuka deiyok ara, ani. Ara, Asyur mutuku yin talin nang arye, Samaria mutuku ulamik ninye yanuka obikce, amutuku alubikce, sik mutuku Asyur tamubuka bobinamika deiyok ara, talye ati kume. Ara, Israel tam ulamik ninye arye, yuk talye ning, isa mer ati, “Nun ni ani,” nyabuka, isa si erelamik atia. Tonda, min talak ara, Mesir mutuku ninye deiyoknye, Firaun bira, Israel ninye ati taleamukce, ikin weik ning, sik nong deice delilamukba, sik ni Allah Yahweh ulamuka arye, elce sikti, lyepdomukce, Mesir mutuku noutam bobinuka, telebak Kanaan mutuku boyanamuk. Bukni, Israel ninye arye, Allah Yahweh dam, malye winilamikce, amalye winilamik ning ara, Allah si kum erelamikce, talye-talye ning ati, “Nun ni ani,” nyabuka, isa mer siuk erelamik deice ati, Allah arye akanye imun ning, sik nong deice deiamuk.

8 Tonda, Allah arye, ‘Pia teleb mutuku, Kanaan mutuku nirya dobuka, ‘Na’ tenen ninye arepnamne’ tenen, minop talak Kanaan mutuku noutam ulamik ninye, Allah ati, diba kum tenelamika anya arye, amutuku noutam ulamik bukni, Allah elce, amutuku ulamik ninye yakdonokamukce, el ‘Na’ tenen, ninye, Israel ninye ati arebuk. Winibuka, Israel ninye ati, pia teleb kipdeibuk bukni, sikce aning tenena kumce, Kanaan mutuku noutam ulamik ninye arye, talye ning talibuka, si erelamik ninguk, Israel ninye babye, aninguk talibuka, si erelamik. Tonda, Israel ninye, sik deiyok kibuka, talepnin yangalamik Raja-Raja nang arye, malye winin ning weik talibuka, malye winilamikba, Israel ninye babye, eibikce, aninguk talibuka upra balamike. Aning-aning malye winin ning weik, aubuka anya arye, Allah arye sikti, wenebukce, Asyur mutuku nang ati, lo arebukba, anang arye, Israel tam ninye obikce, Asyur mutuku bobinuka deibikba, imun kanye bobuka ulamik.

9 Aninguk kum bukni, Israel tam ulamik ninye arye, sik ni Allah Yahweh arye, ‘Aning ara, telebe,’ kum tenyamuk, pia malye ninguk talibuka, duknubuka winilamika ati, Allah arye sikti, kanye kum delilamuk. Amalye winilamik ning ara, ani. Ara, Israel ninye, sik ulamik mutuku noutam nirya ara, talye isa mer si erena ap, arena ap ati, “Nun deiyoknye ani,” nyabuka, isa si erena ak memebuka deiamikce, asukumuk domba ato ning opnarye, bobinuka arelbalamikce, isa si erelamik. Aisa si erelamika ara, weik asik dobuka, ulamikak babye, mitik asik dobuka ulamikak babye, amutuku-amutuku noutam nirya ara, isa si erena ati, Israel tam ninye ara, yuk-yuk memebuka deiamikce, isa mer siuk erelamik. 10 Tonda, amutuku noutam nirya ap, weik mutuku kon nirya ap, weik yo tikamuka, deiyok dam nirya ap ara, isa si erena ati, weik cang ayukumna yo atonun ubuka ikikce, dobuka kintinip deiamik. Tonda, isa si, Asyera isa kil, kat ning dobuka, aisa atonun kibuka, puturubuka memepdeiamikce, asiuk erelamik.

11 Minop talak, Kanaan noutam ulamik ninye arye, talye ning ara, isa mer talibuka, sik si erelamikba, Allah arye amutuku ulamik ninye yakdonokamuk. Ayakdonokamuk ninye, sikce talye isa si erena ap, arena ati, kam ning opnarye, uku dongolamik touk, Israel ninye babye, talye isa si erena ap, arena ap ati, kam ning opnarye, uku dongolamik. Winilamika ati ara, Allah Yahweh arye, Israel ninye ati, pia yu ulamuk. 12 Dipkoprop Allah Yahweh arye, Israel ninye ati, “Isa si erena ati, ‘Nun ni bira ani,’ nyabuka, sik si kum erenamlume,” nyapdeiamuk. “Aning ara, pia meme,” nyapdeiamuk ning ara, like tonok sum aryuk, kum nyapdeiamuk bukni, ton sum, ton sum ton, tuba-tuba, “Aning ara, winina meme,” nyalilamukba, Israel ninye arye, el nyalilamuk yupu kekena kumce, talye ning ati, si erelamik deice arye, Allah arye sikti, pia yu ulamuk.

13 Tonda, Allah Yahweh arye, wibuka delilamuk nang, sik aminyan talak winipnamuk ning elilamik nang ap, tonda elce nyapdeipnaba, el yupu kekebuka, laka nyalamak nang, nabi-nabi nang, kipna tonok-tonok arye, Israel ninye, sik dam dopdeiamuk. Aning atonun, Yudea tam ulamik ninye ati, sik dam ton, anang dolilamukba, Israel nang ap, Yehuda nang ap ati, “Anggunce malye winipmalum deice arye, Allah ara anggunti, yu upmala ati, anggunce malye winipmalum ning nirya ara, minopce bataklulume! Amalye ning nirya batakmunce, Allah arye, ‘Aning ara, wininamlume. Aning ara, pia kum wininamlume,’ nyapdeiamuk yupu uk, kekepmunce, talibuka dobolbanamlume. Anggun apu yapu ati, ayupu uk nyalamse touk, anggun wini talak ululum ninye babye, aninguk talibuka, telebuk wininamlume. Narye wipdeiamse melin nang ap, na yupu nyapdeipniba, kekebuka laka nyalbalamak, nabi-nabi nang ap arye, ayupu dobuka, anggun dam laka nyalyangalamikba, kum kekelamlume,” nyabuka, laka nyalamik.

14 Allah Yahweh arye, ayupu nyapdeibukba, el pil don nang arye binuka, laka nyalamik bukni, Israel yala nang ap, Yehuda yala nang ap arye, ayupu kekena kumce, yaniltalamik. Ara, min talak Israel ninye, sik apu yapu arye, Allah Yahweh elce nyapdeiamuk yupu ati, kekena kumce, dip kum tenelamik touk, anoutam talak ulamik ninye babye, kekena kumce, dip kum tenelamik.

15 Ara, Israel tam ulamik ninye ap, Yehuda tam ulamik ninye ap, sik nirya ara, Allah arye nyapdeiamuk yupu ara, moubuka kum taleamik. Tonda, sik apu yapu ati, Allah arye, “Aning-aning nirya ara, talibuka unamlum bukni, aning ara, pia kum wininamlume. Na nyapman touk winipmunyopura, nara pia melibuka kalikinamsine. Anggunda, na mapu koproba unamlume,” nyalin yupu deice arye, nyapdeiamuk ning babye, tonda, “Malye ning talibuka winilamunyeba, aminyan talak ikin ning, anggun nong deice deipnamsine,” nyabuka, wenen yupu deice arye, nyapdeiamuk ning babye, sikce anyapdeiamuk ning ara, pia kekena kumce, yaniltanauk winilamik. Winilamikce, sik aninye ara, tamubuka pi dobuka, deiyok ton kum ning, talye isa ning ati, “Nun deiyoknye ani,” nyabuka, isa si atibuk erelamik.

Adeice arye, Israel ninye babye, deiyok ton kum ning, talye ninguk, malye winilamik. Tonda, Allah Yahweh arye, “Kanaan mutuku noutam ara, sik dana-dana tam unyak ninye ara, malye ning weik talibuka, malyeuk winilamak touk, Israel yala ninye ap, Yehuda yala ninye ap ara, aning talibuka, pia kum wininamlume,” nyapdeiamuk bukni, aning babye kekena kumce, sik dana-dana tam malye ulamik ninye arye malyeuk winilamik touk, sik babye, aninguk talibuka, malye upra balamike.

16 Tonda, sik nirya arye, sik ni Allah Yahweh arye, “Aning ara, wininamlume, aning ara, pia kum wininamlume,” nyalilamuk yupu nirya ara, yanilamikce, kirikuka sik kanye aryuk, kat ning el si ara, perunggu arye dobuka, aning si erena ati, sapi basam mi urasin atonun memebuka, bitinye puturubuka deiamikce, aning si erelamik. Tonda, isa si Asyera, aisa kil, el si erebuka kina ati, cang weik yo ton ikukabikce, aisa si erelamik. Atonun tonda, isa si Bahal ton erelamik. Tonda, im deice noutam arye, mikip weik ulye ning nirya ara, ‘Aning ara, ilil weike,’ tenelamikce, aning si ton erelamik.

17 Aning ara, malye weik winilamik bukni, aninguk kume. Winilamikce, Israel tam ninye ap, Yehuda tam ninye ap, sik mining mapu ton obuka, talye isa si erena ati, bobinukapnarye, uku dongolamik. Tonda sik anang arye, ‘Asing keten nang nyalamik yupu ap, aminyan winipnamuk ning ani,’ nyabuka, talye nyan nang, nyalamik yupu ap, isa si erena ati, nukna nuklamik yupu ara, weik tonun biklamikce, yupu nyalamik nang ap arye, nyalamik yupu kekelamik. Tonda, asing keten nang arye deiamne ninye, sik kanye sirika arye, yupu sisikin nang nyalamik yupu ton, kekelamikce, winilamik. Tonda, ‘Ninye dipnamak’ tenen, kir dopnarye, ninye olamak. Sikce malye weik ning, mikip weik arye talibuka, tupa-tupa malye winilamika anya arye, sik ni Allah Yahweh arye sikti, kanye kum delilamukce, el yu weik ulamuk.

18 Sikce malye ning weik tonun, tuba winilamika ati ara, Allah Yahweh arye, sikti, yu weik tonun ulamukba, elce sikti, moubuka kum kaliklamukce, bataknauk uamuk. Elda sik dam ton kum yangalamuk. Lik ubukba batakamuk. Adeice arye, Israel tam ulamik ninye nirya ara, ‘Sikda teleb mutuku unamak’ tenen, areamuk mutuku noutam arye, dobuka donokuk. Adeice arye, sik Asyur mutuku nang arye, Israel tam ulamik ninye nirya ati, malye kibikce, tapu koubuka, sik bidaman mutuku tamubuka bobinamik. Bukni, Kanaan mutuku noutam tuba daulamik Israel yala ninye ara, Yehuda tam ulamik ninye dem tamubuka, sikda asukum tuba ulamik. 19 Winilamuk bukni, aminyan talak ara, Yehuda tam ulamik ninye babye, sik ni Allah Yahweh arye, “Aning ara, wininamlume, aning ara, pia kum wininamlume,” nyapdeiamuk yupu ara, moubuka kum talibuka ulamik. Sik babye, ayupu ton moubuka kum kekelamik. Kum kekelamikce, sik kayapu yuk Israel ninye arye, malye ning talibuka winilamik ninguk, sik Yehuda tam ulamik ninye babye, amalye ning atibuk talibuka, isa si erelamikce, dobolbalamik.

20 Israel yala ninye arye, malye weik winilamika deice arye, Allah Yahweh arye, Israel yala ninye nirya ati, ‘Sikda, na mapu koproba unamake,’ tenelamuk ning nirya ara, batakukce, aning ton tuba kum tenelamuk. Utenelamukce, sik Israel ninye nirya wenena ati, Allah arye dobuka, sik mal olan nang ara, yu weik nang, sik deice deibuk. Winibukce, Israel ninye ati Allah arye, ton tamubuka kum dilbiyuk. Winibukce, Israel ninye ati, ‘Abinuka unamak’ tenen, areamuk mutuku noutam arye, tamubuka doprobukce, yuk mutuku donokamukba, sikda el dam ton kum ulamik.

21 Ura, Israel yala ninye arye, deiyok koubuka, malye weik winilamik nang ara, ani. Ara, Allah arye, el mapu koproba, Israel ninye yala-yala nirya, neika ulamik bukni, malye weik winilamika deice arye, elce sik dobuka bokukabukce, wibuka yuk-yuk deiamuk. Winibukopura, Yehuda yala ninye ara, sik yukak deibuk. Tonda, Israel yala ninye kan-kan arye wibuka, dobukabukce, Israel yala ninye ton yukak deiamuk. Winibukba, Israel yala ninye arye, ‘Nun ninye deiyoknye kibuka, Raja tiklirye, nun nirya talipnamsil’ tenen, wipdeibiknye bira, ninye si Nebat, el deiamuk mi Yerobeam wipdeibikba, elce Israel mutuku noutam ulamik ninye nirya taleamuk. Winibikura, Raja Yerobeam birye, malye un ning ara, pia weik tonun, Israel ninye deice benebukba, sik nirya ara, Allah si erelamik ning batakikce, talye ninguk, isa siuk erelamika deice arye, pia malye weik winilamik. 22 Sik anirya ara, Raja Yerobeam, elce malye ubuka winilamuk ninguk eibikce, aninguk melibuka pil dopnin balamikce, ulamik. Winilamikce, Yorebeam el malye winilamuk ninguk, sik babye talibuka ulamikce, malye ninguk upra balamike. Amalye ning nirya ara, pia kum bataklamik.

23 Ati ara, Allah Yahweh arye, sik ulamikak ara, pia moubuka kum kaliklamukce, ‘Sikda na dam ton kum unamake. Bataknyopura, sik yukakuk unamake,’ tenelamukce, lo ton kum areamukba, sik Asyur tam nang arye, yanuka obuka sirya dakik. Winibika deice arye, ‘Sik aninye teleb mutuku unamak’ tenen, areamuk mutuku noutam ara, bobukabukce, donokuk.

Ara, min talak, Allah el yupu nyapdeiamuba, kekebikce, el yupu laka nyalamik nang, sik nabi-nabi nang ara, sik deice wenen yupu nyapdeiamukba, sikce Israel ninye dam yanuka, laka nyalamik bukni, aning kum kekelamikba, ayupu nyapdeiamuk touk ubuk. Ara, “Israel ninye anggunce, na nyapdeiamsise yupu moubuka kum talipmunyopura, anggun dengna ati ara, anggun nong deice ikin ning yaliba, dopropnamlume,” nyaibukba, nabi nang arye, laka nyalamik touk winibuk. Ati ara, Israel mutuku ulamik ninye ara, Asyur mutuku yu weik nang arye, tomobuka tapu koubukabikce, sik mutuku tamubuka, wenen aik dongona ati, Asyur mutuku bobinuka delilbiyik. Abobinuka delilbinamikak ara, aulamik touk, abuku sekmap talak babye, tuba aunamake.

24 Israel ninye ara, Raja Asyur birye malye kibukce, tomobuka el mutuku tamubuka, wenen aik bobinuka deibukce, Israel yala ninye, Samaria mutuku noutam ulamikak uk, lo ubuka ati, sik punubuka una ati ara, el tam ninye dobuka, Kanaan tam mutuku nirya dopdeibuk. Ara, Asyur tam ara, Babel mutuku ap, Kuta mutuku ap, Awa mutuku ap, Hamat mutuku ap, tonda Sefarwaim mutuku ap, ulamik ninye nirya ati, “Sikda Israel yala ninye ulamik mutuku noutam lo weik upmalak ara, binamlume,” nyabukba, Samaria mutuku dolamik asik nirya ara, biyikce, asukum ulamik. 25 Bukni, Samaria mutuku wekelyangalamik Asyur tam ninye ara, Allah el mapu koproba kum, yuk mutuku yala ninye daulamika anya arye, Samaria mutuku yayik talak ara, sikce Allah Yahweh ati, kum bikamika ati, el si kum erelamik. Winilamika anya arye, Allah Yahweh elce, talye bai ulamle kus atonun ning ara, yu ning el si ara, singa kus dopdeibukba, Samaria mutuku binuka ulamik ninye bukni, ton nang weik tonun yanuka olamuk.

26 Winilamik ning ati, Asyur mutuku taleamuka deiyoknye, el dam binuka laka nyabik. “Ance, Samaria mutuku ulamik ninye, tomobuka wenen aik delilbilumce, an bidaman tam noutamak arye, yuk karin mutuku aryuk ulamik ninye dobuka, Samaria mutuku delilyalumba, aunyak ninye nirya ara, min arye Samaria mutuku ulamik ninye ati, sik deiyoknye Allah arye, “Na si ara, winibuka-winibuka erenamnulume,” nyapdeiamukba, si erelamikce, pil dolamik ning ara, an tam ninye arye, min kum bikamik. Ara, yuk-yuk mutuku arye, Samaria mutuku biyik ninye ara, atonun teleb ubuka kum ukiba, Israel ninye sik ni Allah birye, yu weik ning el si singa kus weik dopdeibukba, yanarye, Samaria mutuku noutam binuka, amutuku unyak ninye weik tonun, yanuka onyake,” nyabuka, Asyur tam ninye deiyok Raja ati, laka nyabik.

27 Nyabikopura, Asyur mutuku deiyok kibuka, taleamuk Raja birye, ayupu nyapdeibuk. “Ura, ayupu nyapmanuluma ati ara, Israel ninye Samaria mutuku ulamikba tomobuka, Asyur mutuku delilyanamupu ninye kan-kan arye, bin tonok imam pil donanye bira, adiparyuk tamubuka, Samaria mutuku dopdeipnulyame. Anggunce, el anye dam bimunce, elti, “Anda tamubuka, Samaria mutuku bimince, wini talak ara, sik amutuku unyak Asyur tam ninye nirya ati, anggun si erelamlum Allah, elce anggunti, ‘Aning nirya ara, talibuka unamlume. Winibuka na si erenamnulume,’ nyapdeiamsuk yupu nirya ara, ance sik amutuku unamak ninye ati, binuka peterenamlyame,” nyabuka, Raja Asyur birye nyabuk.

28 Nyapdeibukba, Israel yala ninye, min arye Samaria mutuku ulamik bukni, Asyur mutuku noutam tomobuka bobinamikce, wenen aik delilbiyik ninye kan-kan arye, imam pil dolamuknye tonok dobuka, tuba Samaria mutuku uk yayukce, Betel mutuku yanuka ulamuk. Amutuku noutam yanuka ulamukce, Samaria mutuku noutam ulamik ninye asik nang ati, “Nun Israel ninye si erenyap Allah, Allah si erena ara, winibuka-winibuka erenamlume,” nyabuka peterelamuk.

29 Imamnye birye, aning nirya peterelamukba, sik Asyur tam arye, yangalamik nang arye, aning biklamik bukni, sikda Samaria mutuku yanuka, ulamik ninye ara, min talak sik mutuku ulamikak arye, talibuka si erelamik isa ninguk, yanuka dobuka delilamikce, atalye ning ati, tuba si erelamik. Tonda, sik isa mer si erena ati, patung ning puturubuka deiamik ning ton, boyanuka Samaria mutuku yanuka ulamik talak ara, aisa urasin atonun patung ara, isa si eren aik domikce, anyaik-anyaik noutamuk, dobuka delilbalamik. Ati, Samaria mutuku noutam, asik yuk-yuk ulamik bukni, sikda Asyur tam ninye nirya ara, isa si eren ning babye, sik yuk-yuk dobuka delilbalimikce, aning atibuk si erelamik.

30 Aning nirya ara, winibuka daulamika ati ara, sik Babel mutuku ulamikba bobinamik. Samaria mutuku noutam binuka ulamik ninye ara, sik isa si Sukot-Benot, el urasin atonun ubuka, patung memepdeiamikce, aisa si erelamik. Aning atonun, Kuta mutuku ulamika ani, amutuku delilbinamuk ninye ara, sik isa si Nergal, el urasin atonun ubuka, patung memepdeiamikce, aisa si erelamik. Atonun tonda, Hamat mutuku ulamika ani, Samaria mutuku binamik ninye ara, sik isa si Asima, aisa el urasin atonun ubuka, patung memepdeiamikce, si erelamik. 31 Tonda, Awa mutuku ulamika ani, boyanamuk ninye ara, sik isa mer si Nibhas ap, Tartak ap, sik siuk erelamik. Tonda, Sefarwaim mutuku ulamik ninye ara, sik isa mer si Adramelek ap, Anamelek ap, sik si erena ati, mapu obuka boyanarye, yanuka uku dongolamik.

32 Sik aninye nirya arye, aisa mer sik si erelamika ara, Israel ninye arye, dipkoprob kam ulul Allah ati, el si babye erelamik. Winilamikce, sik Samaria noutam yanuka ulamik ninye, sikda Asyur tam bukni, yuk-yuk mutuku arye yanuka ulamik nang babye, wibuka delilamikba, talye ning isa si eren aik dolamikak noutam ton, isa si eren pil dolamik. Tonda, yuk mem pil ton talibuka dolamik. 33 Aninye nirya ara, dipkoprob Israel yala ninye koprop kume. Sikda ninye asik nang, yuk-yuk mutuku arye yanuka, Samaria mutuku noutam yanuka ulamika anya arye, sik amutuku ulamik talak ara, Allah Yahweh ati, si erelamne ning, bataknopura, sik min arye, mem nyabuka, talye ning isa mer ati, si erelamikce, sik mutuku koproba arye, talibuka ulamik isa si erelamik. Ati, dipkoprob Allah ap, talye-talye isa si ap, tabakuka si erelamik.

34 Sik Asyur tam arye, Samaria mutuku noutam yanuka ulamik ninye asik nang ara, min arye talibuka, si erepnin yangalamik isa ning ara, abuku sekmap talak babye, tuba talibuka, isa si erenyake. Adeice arye, sikda Allah Yahweh ati, el si teleb ubuka kum erenyake. Aninguk kum bukni, sik min arye, isa si erelamik ning, tuba talibuka si erenyake. Tonda, Allah Yahweh arye, Yakub si ati, “An si ara, Yakub nyalamkik bukni, narye, an winiryuk si Israel nyapkine,” nyabuka nyapdeiamuknye, el Yakub birye deibukba, dadeipdanin yangalamik ninye ati, Allah arye, “Anggunda, aning wininamlume, aning ara, pia kum wininamlume,” nyapdeiamuk yupu ap, “Na si erebuka kina ati, pil donamlum ning ara, aninguk winibuka-winibuka, apil donamlume,” nyapdeiamuk yupu ap nirya ara, sik Asyur tam arye yanuka, Samaria mutuku noutam yanuka ulamik ninye arye, aning nirya kum talibuka unyake.

35 Ura, Yakub birye deibukba, dadeipdanin yangalamik ninye nirya ara, Allah arye nyapdeiamuk. “Anggunda, ‘Na’ tenen ninye, Israel yala ninye ululuma ati, na ap, anggun ap, neika teleb ubuka una ati ara, winibuka-winibuka wininamlume,” nyabuka, nyalin yupu deice arye, akunum nyapdeiamuk. Ayupu nyabuka deice arye, tapu koulamaka atonun, yupu nyapdeibukce, koupdongamuka ati, aning ara, min kum winipmanto. Anyalin yupu noutam ara, nyabuke.

“Anggun Israel yala ninye ara, yuk talye-talye ning, isa si ton pia kum erenamlume. Tonda, anggunce talye isa si erena ati, kutam tuku dikdongobuka, si kum erenamlume. Atonun tonda, anggunce talye isa si erena ati, isa arye, ‘Winipnulyame,’ nyanyak yupu ara, kekebuka pia kum wininamlume. Isa si erena ati, mem pil yala-yala nirya, pia kum donamlume. Tonda, talye isa sik si erena ati, kam ning opmunce bobuka, arelyamunce, uku kum danamlulume. 36 Aning-aning nirya, pia kum bukni, Israel yala ninye nirya ara, natibuk, Allah Yahweh, na siuk erenamnulume. Min talak anggunda, Mesir mutuku noutam ulamlum bukni, amutuku weiknye birye, ikin pil anggun nong deice delilamsukba, imun kanye bobuka ulamlum bukni, na taruk mikip weik deice arye, boyanuka, ateleb mutuku boyanamsise. Ati ara, na siuk, anggunce eremunce, na dam kutam tuku dikdongobuka, na siuk erenamnulume. Tonda, na si erebuka kina ati, kam ning opmunce, boyanuka arelyangalamnumunce, uku danamlulume.

37 Tonda, na Allah Yahweh arye anggunti, “Aning ara, wininamlume, aning ara, pia kum wininamlume,” nyapdeiamsise. Keil pala deice arye, sekuka deiamse yupu ap, tonda, narye, “Na ap, anggun ap, neika teleb ubuka una ati ara, winibuka-winibuka unamlume,” nyalin yupu deice arye, nyapsise yupu ap, tonda, “Na si erena ati, pil donamlum ning ara, winibuka-winibuka apil donamlume,” nyapdeamsise yupu ap nirya ara, anggunce moubuka talepmunce, aninguk dukdongobuka wininamlume. Ayupu nirya ara, batakna meme. Yuk isa si ton, pia kum erenamlume.

38 Tonda, na Allah Yahweh arye, Israel ninye ati, ‘Anggunda, na kanye delin ninye, na mapu koproba unamluma ati, na ap, anggun ap, neika teleb un ning ara, winibuka-winibuka wininamlume,’ nyabuka, nyalin yupu deice arye nyapsirye, nyapdanamupu yupu ara, pia kum luba kinamlulume. Moubuka aninguk talibuka unamlume. Tonda, yuk isa si ton, yuk mutuku nang arye, ‘Nun ni koproba ani,’ nyabuka, si erenyak ning ati, si pia kum erenamlume. 39 Nara, anggun ni koproba, Allah Yahweh ununa ati, anggunce natibuk, moubuka talipnumunce, na siuk erenamnulume. Nauk talibuka upmunyopura, anggun mal olan ninye nirya, anggun dam arye, lyebuka dopropnamsine. Teleb ubuka kaliksinirye, pia telebuk kipdeipnamsine.”

Allah Yahweh arye, Israel yala ninye ati, ayupu nirya nyapdeibuk.

40 Allah Yahweh arye, Israel yala ninye ati, ayupu nirya nyapdeiamuk bukni, sikce el nyapdeiamuk yupu moubuka kekena kumce, yaniltanauk ulamikce, malye weik winilamik. Sik minop talak arye, amutuku ulamikce, talye-talye ning talibuka, si erelamik ninguk, tuba talilamikce, si erelamik touk, malye pil tuba dolamik. 41 Tonda, Asyur tam arye, Israel ninye ulamik mutuku noutam, yanuka ulamik ninye ara, sikce ton talak ara, Allah el si erenmana ani, bataknarye, ton talak ara, talye-talye isa, sik min arye si erelamik ninguk, pia si erelamik. Winilamik touk, sikce mapu deiamikba, dadeipdanin yanganyak ninye babye, atalak babye tuba malye ninguk talibuka, si erelamik touk, wini talak babye, tuba talibuka aninguk wininamake.