3 Ahas el ulamuka ara, minop talak Israel tam ulamik ninye nirya, talibuka ulamik Raja-Raja nang arye, sik malye ning talibuka winilamik touk, el babye aninguk winilamuk. Winilamukce, Ahas el mi koproba ton obukabukce, isa si erena ati arebukce, uku dongobukba, uku arye dibuk. Winibuka deice arye, malye weik ning winibuk. Ara, minop talak ara, Israel yala ninye, Kanaan mutuku binuyik talak ara, sik Kanaan mutuku ulamik ninye arye, Allah tenina kumce, pia malye pil dolamikba, Allah arye aninye wenebukabukce, amutuku noutam arye yakdonokamuk. Ayakdonokamuk ninye, pia malye pil dolamik touk, Ahas babye, el mi obuka, isa arebuka deice arye, malye winibuk.

4 Aning kum bukni, tonda, Ahas bira, talye ning isa si erena ati, domba ato ning obuka uku dongolbana ap, isa si erebuka kina ati, siltong teleb ning, uku dongolbana ap ara, isa si erena ati, mutuku deice memepdeiamik aik dam bobalamuk. Ara, pia weik mutuku deice ap, tonda pia weik yo tikamuka deiyok amu tamuk, isa si eren aik dolamikak, aning bobinuka arelbalamukce, isauk talibuka, sik si erelamukce, pia malye weik winilamuk.

5 Atalak noutam ara, Siria mutuku Raja kibuka taleamuk weiknye, el si Rezin ap, tonda, Israel tam ulamik ninye ati, Raja kibuka taleamuknye, el si Raja Pekah ap, yarikce, weik asik domikak, kota Yerusalem mutuku ulamik ninye ati, ‘Opnamab’ tenen, wekelyanuka olanmek bukni, amutuku taleamuknye Raja Ahas bira, yanuka kum opdik. 6 Atalakuk, Edom mutuku taleamuk Raja arye, mutuku si Elat mutuku uamuk ning yanuka, obuka sirya dakukce, amutuku ulamik ninye ara, yakdonokukba, sikda amutuku batakuka, bai sakuka yukak bindobik. Winibukce, anyasik ap, amutuku tuku ap ara, tamubuka eluk doprobuk. Winibukopura, Edom mutuku ulamik ninye yayikce, amutuku yanuka talibikce, amutuku ulamik. Ayana talibuka ulamik ninye ara, wini talak babye, tuba aunyake.

7 Ura, Raja Ahas bira, Yehuda tam taleamuk talak noutam arye, Asyur mutuku ninye deiyok kibuka taleamuknye, el si Tiglat-Piliter biti, Raja Ahas bira, ninye ton wipdeibukce, ayupu nyapdeibukba nyalbiyik. Ara, “Nara, an pil dopnirye, an amu tam kipnirye, an yupu uk kekebuka unune. Ati ara, na oldan nang, Raja Israel tam ap, Raja Siria mutuku ap, sik yin talen nang arye, na dam yanuka, mal onmaniraka ati, ‘Ance na dam yatumce, yanuka milipdopnutum’ tenen, moropmakine,” nyaibukba, el melin nang arye, Raja Asyur mutuku laka nyalbiyik. 8 Ayupu nyabukopura, Raja Ahas bira, Allah Yahweh si eren aik pum deiamik dekna weik ning, emas ap, perak ap, tonda Raja el weik aik noutam deiamuk dekna weik ning ap nirya, bobukabukce, namin kina ati aren ning ara, Asyur mutuku talibuka ulamuk Raja dam dopdeibuk. Deiyok ara, ‘Anye birye, melibuka lyepnutu’ tenen, winibuk.

9 Winibukopura, Ahas bira, Asyur mutuku taleamuknye, Raja Tiglat-Piliter biti, ‘Melibuka lyepnutume,’ nyabuka, morobuk ning ara, kekebuk. Winibuka kekebukopura, aninye deiyoknye birye, yanuka obuka sirya dakukce, Siria mutuku taleamuknye, Raja Rezin malye kibukce oplobuk. Tonda, Damasyik mutuku ara, malye kibukce, Damasyik asik ap nirya, atam tuku ap, alubuka doprobuk. Winibukce, amutuku ulamik ninye ara, tomobukabukce, tapu koupdongobukce, ‘Aninye ara, na ikin pil dipniba, na pil talye donamniyak’ tenen, amutuku ninye nirya, bobinuka wenen aik bukni, Kir mutuku delilbiyuk.

10 Aning nirya akunum winibukopura, Ahas adiparyuk, Damasyik mutuku biyuk ara, ‘Asyur mutuku taleamunye, Raja Tiglat-Piliter ap epdanaman’ tenen, biyuk. Amutuku noutam ulamuk talak arye, Asyur mutuku ninye ara, sik tam isa arena ati, moupdeiamikce, domba ato ning obuka, uku dongolbalamikak, aning si mesba, aning memepdeiamik ning ati dilbiyuk. Dilbiyukce, amemepdeiamik ning nirya ara, moubuka dipdeyukce, dekuka gambar sekdobuk. Winibukopura, ‘Yerusalem mutuku noutam babye, atonunuk memepnamak’ tenen, Raja Ahas bira, ‘Agambar ap, amesba dona ara, winibuka-winibuka donamake,’ nyabuka laka nyan yupu ap sekukabukce, imam Uria dam dopdeibuk.

11 Winibukopura, imam Uria birye, akilibuka dopdeiamuk ning atonun, ubuka memebuk. Winibukce, Yerusalem mutuku noutam babye, atonun mesba unak ati memepdeibuk. Amemebuk talak ara, Raja Ahas Damasyik mutuku arye tamubuka, Yerusalem mutuku min kum yanmok talak arye, aning nirya akunum dobuka, sirya dakukce, memebuk. Winibukba, Raja Ahas bira, tamubuka yayukopura, eibuk. 12 Ara, Raja Ahas Damasyik mutuku arye tamubuka, Yerusalem mutuku yayukopura, amesba imam Uria birye, akunum memepdeipmok ning, yanuka eibukopura, aning nirya moubuka dipdeyukce, kanye deibukce, domba ato ning obukopura, amesba deice arye, uku dongobuk. 13 Yanuka akunum eibukopura, amesba deice ara, Ahas bira, domba ato ning obuka boyayukce, uku dongobuk. Tonda, roti kwaning dana deiyok ning, gandum duk boyayukce, yanuka uku dongobuk. Tonda, elcuk, ‘Allah ap, ninye ap, epdanuka neika teleb unamabe’ tenen ati, yuk kam ning ton obuka arebukce, aning el ining ton dobukabukce, amesba deice, el taruk arye, burubuka purupdonokukba, amesba deice ining dulbiyuk. Tonda, arepmok ning yala-yala nirya ara, ‘Pia teleb ubuka sirya daknaman’ tenen, anggur mek kwebuka, amesba deice dikdongobuk.

14 Raja Ahas bira, apil nirya akunum winibukopura, minop talak Allah arye, “Na si erenamnuluma ati, kat ning, el si perunggu deice arye, domba ato ning opmunce, uku dongonamlumak ati, el si mesba ton memepdeipnamlume. Aning ara, na Allah Yahweh, na si eren aik, bai tam bukni, urasin dam deipnamlume,” nyapdeiamuk. Aning dobuka, intinip deiamik ning ara, Ahas bira nyaibukba, el melin nang arye, Allah si eren aik urasin tam deibikce, kat ning el si perunggu arye, memebik mesba dobuka, yukak deibik. Ara, perunggu deice moubuka deibikce, deiamik mesba ara, anyaik urasin dam bukni, anyaik wekelbana ati, bublan dam deiamikak arye, dobuka kisikukapmunce, anyaik bublan atam, otam ara, winiryuk memebik mesba deiamikak ubukba, anoutam bukni, utam ara, aperunggu mesba dobuka deibik. Akunum delilbiyikce, winiryuk memepdeiamik ninguk, Allah Yahweh si erena ati deibik.

15 Aning akunum dobuka deibikopura, Ahas bira, imam Uria biti nyabuk, “Winiryuk memepdeipmak weik mesba deice arye, na Raja ap, amutuku unyak ninye nirya arye, Allah arena ati, beren tam talak kam ning obuka, arelyanganamap ning ap, tonda, sintam arye gandum duk bulubuka, Allah arena ati arenyab ning ap, tonda na Raja arye, kam ning opnarye, uku dongolamne ning ap, gandum duk arenun ning ap, amutuku ninye arye, uku dongona ati, kam ning obuka arenyak ning ap, gandum duk arenyak ning ap, anggur mek kwebuka arenyak mek ap, aning nirya ara, asukumuk u dongolyanganamlume.

Tonda, awiniryuk memebik mesba deiceuk, kam ning opnirye, ining ton bobinuka, amesba deice taruk duk arye dobuka donokminba, amesba deice dupnamlule. Bukni, minop talak arye, kat ning el si perunggu deice memamik mesba ara, naryuk na arenamne ning bobinuka, amesba deice delinamlame. Aning ara, yuk ninye arye arenamak ning ara, amesba deice arena kume,” Raja Ahas birye nyabuk. 16 Raja Ahas bira, nyapdeibukopura, imam Uria birye, Raja nyabuk yupu kekebukce, el nyabuk touk winibuk.

17 Allah si eren aik noutam ara, perunggu deice kereta-kereta memepdeiamikce, mek kwena ati, weik mek makau akereta deice deiamik ning ara, akereta-kereta dana-dana tam abilinga atonun ning, memepdeiamik ning nirya ara, Raja Ahas birye nyapdeibukba, el pil melin nang arye, aning dakuka uluplobik. Tonda, elce nyaibukba, sikce weik mek makau, perunggu arye moupdeiamikce, sapi basam urasin atonun ubuka, dua belas patung memebik ning, asapi basam balye deice deiamik yangalin ning, weik mek makau el si ati, “Weik Laut,” nyabik ning ara, aning dobukabice, kisikuka tuku deice bukni, keil arye yangabuka deibikak, awamuk keil deiceuk binuka deibik. 18 Winibukce, ‘Asyur mutuku ninye deiyok kibuka, taleamuk Raja tenelamuk touk upniba, el kanye deipnamnile,’ tenebukce, Raja Ahas birye, Allah Yahweh si eren aik wekelbana ati, bai tam arye bisik botobuka bublan mememikce, “Raja elda bisik bublan arye, anyaik wekelbanamlule,” nyabuka domik ning ara, uluplopbukce, tirikdongobuk. Tonda, ninye deiyoknye Raja, el aik pum pala weik pala kain lapkwecamikba, Sabat sum arye, ‘Raja birye, aning amu tam pil donamle’ tenen, memebuka deiamik ning babye, ulubuka batakuk.

19 Ura, Raja Ahas birye, ninye deiyoknye kibuka, Raja taleamuk talak arye, ulamuk ning ap, yupu nyalamuk ning ap, aning nirya ara, Yehuda mutuku ulamik ninye talibuka ulamik Raja-Raja nang, si sekuka delilamik buku noutamuk sekdeibik. Abuku si ara, ‘Sejarah Raja-Raja Yehuda,’ nyalamik. 20 Ahas daulamuka ani, el akunum dibukopura, minop talak Yerusalem mutuku noutam taleamuk Raja Daud, el mutuku uk bukni, sik Raja-Raja nang dipnaba, weilamik mutuku uk binuka weibik. Winibikopura, Ahas el mi Hizkia, elce el li punubukce, Yehuda tam ulamik ninye, sik deiyoknye kibuka talibukce, Raja ulamuk