Uzia birye, Yehuda tam ninye, sik deiyoknye kibuka, taleamuk yupu
15
Yerobeam Kedua, elce Israel mutuku ulamik ninye ati, Raja kibuka taleamuk keting tamun, dua puluh tujuh (27) tahun akunum ubuk talak ara, aketing tamunuk, Yehuda tam ulamik ninye talena ati ara, Raja Amazia elce deiamuk mi Uzia, elce deiyok kibuka, Yehuda tam ulamik ninye ati, taleamukce el yupu nyalamukba, sikce kekelamik. 2 Uzia el keting tamun enam belas (16) tahun akunum kibukopura, Israel tam ulamik ninye deiyoknye kibuka taleamukce, mutuku si kota Yerusalem, weik asik noutam ulamukce, atam deiyok kibuka taleamuk keting tamun nirya ara, lima puluh dua (52) tahun deice arye, talibuka ulamuk. Tonda, Uzia el lin koprop ara, Yekholya ulamuk. Elda Yerusalem mutuku nang arye, deiamik kil ulamuk. 3 Uzia bira, el li Raja Amazia bira, teleb winilamuk touk, el babye telebuk winilamuk. Ara, Allah Yahweh arye, el kanye ara, ‘Aning ara, teleb ning anya atia,’ tenelamuk ninguk talibuka, pil dolamuk. El li Amazia bira, teleb winilamuk touk, el mi babye, aninguk talibuka pil dolamuk.4 Bukni, Uzia elce, Yehuda tam ulamik ninye, isa si erena ati, memepdeiamikce, isa si erelamik aik nirya ara, ulubuka kum batakuka anya arye, Yehuda tam ulamik ninye, sik nirya arye, aisa si erena ati, domba ato ning, kam ning obuka arelbana ap, siltong teleb ning dobuka, uku dongona ap, tuba winilamik. Ara, talye isa si eren aik, dobuka deiamik arye, aninguk arelamikce, isa si erelamik.
5 Ati ara, Allah Yahweh arye Raja Uzia, el nong bol deice ikin weik ning ara, kanye imun suse, uk dina deiyok ning arelamukba, weik suse dilamuk. Winilamukba, ikin kanye bobuka ulamuk. Auk dilamuk ning ara, pia kum kwetepmanto uamuka anya arye, amutuku nang nirya ara, ‘Se, auk ara, nun nong deice ton, sakukaplirye, dipsilyak’ tenen, el ninye deiyoknye kibuka, pil dolamuk aik noutam arye batakuka, yuk aik binuka deiamikba, asukumuk ulamuk. El ap, yuk nang ap, neika kum ulamik. Winibuka daulamuka ani, auk dilamuka deice arye dibuk. Uzia el kanye imun suse, uk dilamuka dibuk talak ara, el pil dolamuk ning ati punubuka, amutuku ulamik ninye ati, talibuka pil dolamuknye bira, el mi Yotam birye, Yehuda tam ulamik ninye talibuka, pil dolamuk.
6 Ura, Raja Uzia bira, ninye deiyoknye kibuka, taleamuk talak arye winilamuk ning ap, pil dolamuk ning ap, yupu nyalamuk ning ap nirya ara, Yehuda mutuku ulamik ninye, talibuka ulamik Raja-Raja ati, si sekuka delilamik buku noutamuk sekdeibik. Abuku si ara, ‘Sejarah Raja-Raja Yehuda,’ nyalamik. 7 Raja Uzia akunum dibukopura, amutuku ulamik nang arye, sik Raja-Raja nang dipnaba, weilamik mutuku uk binuka weibik. Ara, el apu Raja Daud, el mutuku noutamuk weibik. Tonda, Raja Uzia akunum dibukba, weibikopura, Uzia el mi koproba Yotam birye, el li punubukce, Yehuda mutuku ulamik ninye, sik deiyoknye kibuka taleamuk.
Zakaria bira, Israel mutuku ulamik ninye deiyok kibuka, ulamuk yupu
8 Uzia bira, Yehuda tam ulamik ninye talibuka ulamuka ani, keting tamun tiga puluh delapan (38) tahun akunum kibukopura, aketing tamun deice arye, Yerobeam Bitinyanye (Kedua), el mi Zakaria bira, Israel tam ulamik ninye ati talibukce, Samaria mutuku noutam ulamuk. Zakaria bira, Israel ninye ati, ninye deiyok Raja kibuka, taleamukce, ulamuka ara, ouku weik kume. Elda wala nakub barye (6) deice dem, Raja kina ati, talibuka unmok. 9 Atalibuka unmok talak ara, min talak Israel ninye deiyok kibuka, talipnin yangalamik Raja-Raja nang arye, malye ninguk talibuka upnin yangalamik touk, Zakaria babye, malye ninguk talibuka ulamuk.
Ara, Allah Yahweh arye, ‘Aning ara, pia malye winin ning,’ tenelamuk ning, Zakaria bira, talibuka winilamuk. Ninye si Nebat, elce deiamuk mi, Raja Yerobeam Satu, elce Israel tam talibuka ulamuk talak, malye un ning winibuka benebukba, Israel ninye nirya eililamikce, sik babye malye winilamik touk, Raja Zakaria babye, aning batakna kumce, aninguk talibuka wininmok. 10 Ati, ninye si Yabesh, elce deiamuk mi, el si Sulam birye, ‘Zakaria bira obuka malye kipdeipnaman’ tenen, yupu sisikinmok. Nyabuka sisikinmoka anya arye, Yibleam mutuku binuka, awekmek ninye, adiparyuk dinmekbuk, binuka obuk. Obukopura, Zakaria birye, Raja kiamuk ning pununa ati ara, anye Sulam birye, ninye deiyoknye Raja kibuka tikukce, yupu nyabuka, Israel tam taleamuk.
11 Ura, Raja Zakaria ninye deiyoknye kibuka, taleamuk talak arye, winilamuk ning ap, pil dolamuk ning ap, yupu nyalamuk ning ap nirya ara, Israel mutuku ulamik ninye talibuka ulamik Raja-Raja ati, si sekuka delilamik buku noutamuk sekdeibik. Abuku si ara, ‘Sejarah Raja-Raja,’ nyalamik. 12 Awinibuk ning nirya ara, talye ati kum winibuk. Deiyok ara, minop talak ara, Allah Yahweh arye, Raja Yehu biti, nyalin yupu deice arye akunum nyapdeiamuk. Ara, “Ance deipminba, dadeipdanin balamikca ani, generasi dumbarye nang arye, binuka deipnamak mapu, an yala nang arye, ninye deiyok kibuka, Israel nang talipnamake. Sikce talipnamak talak ara, narye aning winipnamle,” nyapdeiamuk touk winibuk.
Sulam birye, Israel mutuku ulamik ninye ati, deiyok kibuka ulamuk yupu
13 Raja Uzia bira, Yehuda tam ulamik ninye talibuka ulamuka ani, keting tamun tiga puluh sembilan (39) tahun, akunum kibuk talak ara, ninye si Yabesh, elce deiamuk mi Salum birye, Israel tam ulamik ninye deiyok kibuka, Raja kibukce, Samaria mutuku ulamuk. Bukni, Salum birye Israel ninye ati, talibuka ulamuka ara, ouku weik kume. Elda wala tonok atam ninye talibuka unmok. 14 Unmoka ani, ninye si Gadi, elce deiamuk mi Menahem bira, Tirsa mutuku arye, Samaria mutuku biyukce, adiparyuk Salum bak binuka obuk. Obukopura, Salum el punubuka, Raja una ati ara, Menahem birye, ninye deiyoknye Raja tikuk. 15 Salum birye, ninye deiyok kibuka, Israel mutuku talibuk talak winibuk ning, yuk ning ap nirya, elce, ‘Israel tam talinanye Raja bira, opnirye, na dem tiknamne,’ tenelamukce, yupu sisiklamuk ning ap ara, Israel mutuku ulamik ninye, talibuka ulamik Raja-Raja nang, sik si sekuka delilamik buku noutamuk sekdeibik. Abuku si ara, ‘Sejarah Raja-Raja Israel,’ nyabik.
Menahem bira, Israel tam ninye deiyok kibukabukce, malye ulamuk ning ati, sekik yupu
16 Menahem bira, ninye deiyoknye Raja kibukce, Samaria mutuku ulamuka ani, amutuku batakukce, Tirsa mutuku arye, Samaria mutuku yangana ati, bisik yanganmok talak ara, yuk mutuku ton, Tifsa mutuku asik dolamik noutam ulamik ninye ap, domba ato ning, kam ning ap, asik nirya ap ara, anyasik dam dana-dana uamuk ning nirya ap ara, pia obuka deiplobukce, sirya dakuk. Amutuku uamuk ning nirya kum kipdeibukba, oldemuk ubuk. Winibuk talak aryuk, amutuku noutam ulamik ninye nirya babye obukce, amutuku ulamik kilapu ara, mi bopmek kilapu nirya obukabukce, tema arye, sik mun tiribukabukce, akilapu nirya obuka dakuk. Aning winibuka deiyok ara, sik amutuku ulamik ninye arye, “Menahem, ance nun mutuku talipsiminyeura, an tamuk ubirye, an amu tam unamabe,” kum nyabika ati, yu weik ubukba, sik nirya obuk.
17 Ura, Raja Uzia bira, Yehuda tam ulamik ninye talibuka ulamuka ani, keting tamun tiga puluh sembilan (39) tahun, akunum kibuk talak ara, ninye si Gadi, elce deiamuk mi Menahem bira, Israel tam ulamik ninye, deiyok kibuka Raja kibukce, Samaria mutuku ulamuk. Menahem bira, Israel tam ulamik ninye ati, talibuka ulamuka ara, sepuluh tahun (10) deice arye, aninye talibuka ulamuk.
18 Menahem bira, Israel tam talibuka ulamuk talak ara, malye ninguk talibuka ulamuk. Ara, Allah Yahweh arye, ‘Aning ara, pia malye un ning,’ tenelamuk ning ara, Menahem bira aninguk talibuka winilamuk. Ninye si Nebat, elce deiamuk mi, Raja Yerobeam Satu, elce Israel tam ninye talibuka winilamuk talak, pia malye winin ninguk benebukba, Israel ninye nirya eililamikce, sik babye malye winilamik touk, Raja Menahem babye, aning batakna kumce, aninguk tuba talibuka winilamuk.
19 Atalak ara, Asyur mutuku talibuka ulamuk ninye deiyoknye, Raja Pul, elce, ‘Israel ninye opnirye, sirya daknamne,’ tenebukce olyayuk. Winibukba, Raja Israel Menahem bira, dekna weik ning, el si perak, el ikin ara, tiga puluh empat ribu (34.000) kilogram nukukce, kintinibuk. Kintinibukce, Asyur mutuku deiyoknye, el kanye delina ati, bobinuka arebuk. Ara, Menahem birye, ‘Aning winipnya deice arye, Raja Asyur ap, na ap neika upnimirye, elce na talipse Israel mutuku nirya ara, mikip weik tonun tonap kipnirye, telebuk kipdeipnunil’ tenen, adekna ning arebuk.
20 Raja Menahem bira, adekna weik keil uang dolona ati ara, Israel mutuku noutam bona weik, talibuka ulamik nang nirya ara, “Anggun talelulum dekna weik ning, perak ara, na arena ati, ton dobuka arepnamnulume,” nyabuka, pia pi deibukba, sik anang nirya ara, bokuka deibikce, noutam arye bokuka, elti, arebik. Ara, sik tonok-tonok nang ara, yuk-yuk bukni, lima puluh perak keil uang dobuka arebik. Winibikura, Menahem bira, aperak nirya bulubukabukce, aning bobinuka, Asyur mutuku taleamuk Raja Pul biti, arebukopura, kanye deibukce, adiparyuk tamubuka, el mutuku biyuk. Israel tam ninye ati, piribuka kum obuk.
21 Ura, Raja Menahem bira, ninye deiyoknye kibuka, Israel tam taleamuk talak arye winilamuk ning ap, pil dolamuk ning ap, yupu nyalamuk ning ap nirya ara, Israel mutuku ulamik ninye talibuka, ulamik Raja-Raja ati, si sekuka delilamik buku noutamuk sekdeibik. Abuku si ara, ‘Sejarah Raja-Raja Israel,’ nyalamik. 22 Menahem dibukba, binuka weibik. Wibikopura, Menahem el mi Pekahya, elce ninye deiyoknye Raja kibukabukce, Israel noutam ulamik ninye nirya taleamuk.
Pekahya bira, Israel ninye deiyok kibuka, talibuk yupu
23 Raja Uzia bira, Yehuda tam ulamik ninye talibuka ulamuka ani, keting tamun weik, lima puluh (50) tahun akunum kibukopura, Menahem el mi Pekahya bira, Israel tam ulamik ninye deiyok kibuka talibuk. Elce atam ninye taleamuk talak noutam ara, Samaria mutuku ulamuk. Pekahya bira, Israel tam ninye ati, talibuka ulamuka ara, ouku weik kume. Elda keting tamun bitinye tahun dem, amutuku talibuka ulamuk.
24 Pekahya bira, Israel tam ninye talibuka ulamuk talak ara, malye ninguk talibuka ulamuk. Ara, Allah Yahweh arye, ‘Aning ara, pia malye un ning,’ tenelamuk ning, Pekahya bira talibuka wininmok. Ara, ninye si Nebat, elce deiamuk mi, Raja Yerobeam Satu, elce Israel tam ninye nirya talibuka ulamuk talak, pia malye winin ning winibuka benebukba, Israel ninye nirya elilamikce, sik babye amalye winin ninguk malye winilamik touk, Raja Pekahya babye, aning batakna kumce, aninguk tuba talibuka winilamuk.
25 Raja Pekahya, el yin talen nang bukni, sik deice tam weik deiyok yin talinanye bira, el si Remalya, elce deiamuk mi Pekah ap, tonda Gilead mutuku nang lima puluh (50) nang ap, sik nirya arye, ‘Raja Pekahya bira, el yupu ton kum kekenamaba anya arye, el opnamabe,” nyabuka, yupu sisikinmek. Sisikinmeka anya arye, Samaria mutuku asik noutam ara, ‘Yu nang wekuka, kum olyasiting’ tenen, weik keil poka domikak arye, Raja Pekahya ap, bitinye nang ton ap, sik nirya obik. Abitinye nang, sik si ani. Ara, Argob ap, Arye ap obik. Obikopura, Raja Pekahya obuknye, el si Pekah, elce ninye deiyok kina ati, tikukabukce, Raja Pekahya punubukabukce, ninye deiyoknye Raja kibukce ulamuk. 26 Ura, Raja Pekahya bira, ninye deiyoknye kibuka, Israel tam taleamuk talak arye winilamuk ning ap, pil dolamuk ning ap, yupu nyalamuk ning ap nirya ara, Israel mutuku ulamik ninye, talibuka ulamik Raja-Raja ati, si sekuka delilamik buku noutamuk sekdeibik. Abuku si ara, ‘Sejarah Raja-Raja Israel,’ nyalamik.
Raja Pekah bira, Israel tam ulamik ninye deiyok kibuka, talibuk yupu
27 Raja Uzia bira, Yehuda tam ulamik ninye talibuka, ulamuk talak ara, keting tamun lima puluh dua (52) tahun, akunum kibukopura, ninye si Remalya, elce deiamuk mi, el si Pekah bira, Israel tam ulamik ninye deiyok kibuka, Raja tikukce, aninye taleamuk. Elce amutuku taleamuk talak ara, Samaria mutuku ulamukce, Israel ninye ati, talibuka ulamuka ara, dua puluh (20) tahun deice arye taleamuk. 28 Bukni, Pekah bira, Israel tam ninye talibuka ulamuk talak ara, malye ninguk talibuka winilamuk. Ara, Allah Yahweh arye, ‘Aning ara, pia malye un ning,’ tenelamuk ning, Pekah bira, aninguk talibuka winilamuk. Ara, ninye si Nebat, elce deiamuk mi, Raja Yerobeam Satu, elce Israel tam ninye talibuka ulamuk talak, pia malye winin ning deiyok koubuka benebukba, Israel ninye nirya elilamikce, sik babye malye winilamik touk, Raja Pekah babye, aning batakna kumce, aninguk tuba talibuka winilamuk.
29 Raja Pekah bira, Israel tam ninye taleamuk talak ara, Samaria mutuku noutam ulamuk talak, Asyur mutuku ninye talibuka, ninye deiyok ulamuknye, Raja Tiglat-Piliter, elce, Naftali yala nang ulamik mutuku ap, Gilead yala nang ulamik mutuku ap, Galilea mutuku ap, malye kibukce, sik mutuku tuku nirya yanuka alupdobuk. Tonda, ‘Israel tam unyak ninye opnirye, sirya daknamne,’ tenebukce, sikti, olyayuk talak ara, elce alubuka doprobuk mutuku si, ton ning ara, ani. Ara, Iyon asik ap, Abel-Bet-Makha asik ap, Yanoah asik ap, Kedes asik ap, Hazeron asik ap, winibuka anyasik-anyasik ap, sik mutuku nirya ara, malye kibukce, binuka alupdobuk. Winibukce, amutuku-amutuku noutam ulamik ninye nirya ara, tomobuka tapu koubukabukce, ‘Sikda na ikin pil dipniba, na piluk donamniyak’ tenen, Asyur mutuku wenen asik bobinuka deibuk.
30 Atalak ara, ninye si Ela, elce deiamuk mi Hosea, elce, ‘Raja Pekah el yupu ton kum kekenamna anya arye, elti, opnamane,’ tenebukce, yupu sisikinmok. Wininmoka anya arye, adiparyuk Raja Pekah obuk. Obukopura, Hosea, elce punubuka ninye deiyoknye Raja kibuk. Hosea birye, amutuku taleamuka ara, Yehuda mutuku taleamuknye, Raja Uzia, elce deiamuk mi Yotam birye, ninye deiyoknye kibuka, Yehuda tam taleamuka ani, keting tamun weik, dua puluh (20) tahun akunum kibukopura, Hosea birye, Israel tam deiyok koubuka, Raja tikukce taleamuk.
31 Ura, Raja Pekah bira, ninye deiyoknye kibuka, Israel tam taleamuk talak arye, winilamuk ning ap, pil dolamuk ning ap, yupu nyalamuk ning ap nirya ara, Israel mutuku ulamik ninye talibuka, ulamik Raja-Raja ati, si sekuka delilamik buku noutamuk sekdeibik. Abuku si ara, ‘Sejarah Raja-Raja Israel,’ nyalamik.
Raja Yotam birye, Yehuda tam ulamik ninye ati, ninye deiyok kibuka, talibuk yupu
32 Remalya elce deiamuk mi Pekah, elce Israel tam ulamik ninye talibuka ulamuka ani, keting tamun ara, bitinye akunum kibukopura, Uzia el mi Yotam birye, Raja kibuka tikukce, Yehuda tam ninye ati, ninye deiyoknye kibuk. 33 Atalak ara, Yotam el keting tamun, dua puluh lima (25) tahun kibuka deice arye, Yehuda tam ninye ati, ninye deiyoknye kibukce, Yerusalem mutuku noutam ulamukce, atam mutuku noutam taleamuk talak ara, keting tamun enam belas (16) tahun kiamuk. Yotam el lin si ara, Yerusa. Elda, Zadok birye deiamuk kil ulamuk. 34 Yotam birye, ninye deiyoknye Raja kibuka, taleamukce winilamuk ning ara, teleb piluk dolamuka arye, Allah Yahweh el talima pum tam teleb kililamuk. Ara, Yotam birye, el li Uzia, pia teleb ulamuk touk, el babye teleb un ninguk, talibuka winilamuk.
35 Bukni, Yotam birye, talye isa si erena ati, amutuku noutam ulamik ninye arye memepdeiamikce, si erelamika ara, ulubuka kum batakamuk. Tonda, el ap, Yehuda tam ulamik ninye ap arye, talye isa si erena ati, domba ato ning, ton obuka, aning nirya boyangalamikce, isa ati arelamik. Tonda, sikce aisa si erebuka kina ati ara, siltong teleb nyana ati ara, boyanuka uku dongolamik. Bukni, Yotam birye, mitik tonun teleb pil dobuk ning ara, ani. Ara, Allah Yahweh si erena ap, el arelyakana ap ati, domik aik eitam bublan ara, malye ubuka ati, elce nyaibukba, el pil melin nang arye, bublan lipsisikuka teleb kipdeibik.
36 Ura, Raja Yotam birye, ninye deiyoknye kibuka, Yehuda tam taleamuk talak arye ulamuk ning ap, pil dolamuk ning ap, yupu nyalamuk ning ap nirya ara, Yehuda mutuku ulamik ninye talibuka, ulamik Raja-Raja ati, si sekuka delilamik buku noutamuk sekdeibik. Abuku si ara, ‘Sejarah Raja-Raja Yehuda,’ nyalamik. 37 Tonda, atalak noutam ara, Allah Yahweh arye, ‘Yehuda tam unyak ninye, sik wenena ati, yuk nang dopdeipniba, mal olyanganamak,’ tenyamuka ati, elce sik talima noutam nyabukura, sik bitinye nang, Siria mutuku ninye deiyoknye, Raja Rezin ap, tonda Israel tam taleamuknye, Raja Pekah ap, sik bitinye arye, Yehuda tam ulamik ninye ati, mal olyangalamik.
38 Raja Yotam akunum dibukopura, amutuku nang arye, el apu yapu dipnaba, binuka weilamikak uk binuka weibik. Ara, minop talak Israel ninye taleamuk deiyoknye, Raja Daud el mutuku, Yerusalem mutuku noutamuk weibik. Akunum weibikopura, Yotam elce deiamuk mi Ahas, elce el li punubukabukce, Yehuda mutuku ulamik ninye nirya ati, ninye deiyoknye kibuka, Raja tikukce, amutuku deiyok kibuka taleamuk.