Yoahas bira, Israel ninye deiyoknye kibuka, taleamuk yupu
13
Keting tamun dua puluh tiga (23) tahun deice, Ahasia el mi Yoas, elce Yehuda tam ulamik ninye, sik deiyoknye kibuka, Raja taleamuk. Aketing tamun 23 noutam arye, Yehu el mi Yoahas bira, Israel tam ulamik ninye, Raja kina ati, deiyok kibukabukce, Israel tam talibuk. Elda, Samaria mutuku noutam ulamukce, keting tamun tujuhbelas (17) tahun deice deiyoknye kibuka taleamukce, ulamuk. 2 Bukni, Raja Yoahas babye, malye ning weik talibuka winilamuk. Ara, ninye si Nebat, elce deiamuknye, Raja Yerobeam birye, Israel yala ninye deiyoknye kibuka taleamukce, malye ninguk talibuka winilamukba, sik Israel ninye eibikce, sik babye malye ninguk winilamik touk, Raja Yoahas babye, Israel yala ninye deiyoknye kibuka taleamukce, malye weik winilamuk. Ara, Allah Yahweh el kanye ara, ‘Aning ara, malye ninguk,’ tenelamuknye, Raja Yoahas bira, aning talibuka, malyeuk winilamukba, sik Israel ninye babye, malyeuk winilamik. Amalye winin ning ara, el babye batakna kumce, tuba pia malyeuk winilamuk.3 Ati ara, Allah Yahweh arye, sik Israel tam ulamik ninye nirya, yu ubukba, sik wenena ati, elce, ‘Akunuma, Siriaa mutuku taleamuk ninye deiyoknye, Raja Hazael ap, tonda el mi Benhadad ap arye, sikce, ‘Israel ninye, anirya ayanuka optinge,’ tenebukba, aketing tamun noutam nirya ara, sik anang arye, ton talak ton olyanamna ani, ton talak babye, Israel ninye dam yanuka tupa-tupa olamdik.
4 Winilamdika ani, aminyan Raja Yoahas bira, Allah Yahweh ati, “Se na ni, Allah Yahweho, melipnilyame,” nyabuka morobukopura, Allah Yahweh arye kekebuk. Allah Yahweh arye, Yoahas morobuk ning, akunum kekebuka deiyok ara, Siria mutuku ninye taleamuknye Raja Hazael birye, Israel ninye sik deice, pia ikin ning weik delilamukba, imun kanye bolamik ati, Allah arye bico tenebukce, ‘Sik ti melipnamne,’ tenebuk. 5 Ati ara, Allah Yahweh arye, ninye bin tonok ton wipdeibuk. Ara, Israel ninye sikti, Siria mutuku ninye deiyok kibuka taleamuknye birye, ikin ning weik, sik nong deice delilamukba, imun kanye bolamika ati, ‘Anye wipdeipnirye melipniba, elce melibuka lyepdopliba, sik nirya ara, teleb aryuk, min talak doulamik touk unamak’ tenen, wipdeibuk. Winibukba, anye birye, Israel ninye melibukba, min talak teleb ulamik touk, tuba tonap teleb ulamik.
6 Allah arye, Israel ninye ati, melibukba teleb ulamika babye, sik Israel ninye arye, malye winilamik ning ara, pia kum batakamik. Tuba malye wininauk ulamik. Ara, Raja Yerobeam elce taleamuk talak arye, malye upnin yangalamukba, sik babye malye winilamik ninguk, pia tuba aninguk talibuka, malye winilamik. Amalye winilamik ninguk, sikce taleamikce, talye isa ati, ‘Nun ni’ tenen, tuba si erepnin yangalamik. Adeice arye, isa si Asyera, si erena ati, cang yo dobuka, urasin teleb ubuka, puturubuka deiamikce, ikamik ning ara, tuba Samaria mutuku noutam awamuk.
7 Israel ninye, sik yin talen nang nirya ara, Siria mutuku taleamuk ninye deiyoknye birye, yanuka obuka, sirya daknin balamikce, yin talen nang weik tonun, kum daneiyamuk anya arye, anoutam talak ara, Raja Yoahas el yin talibuka, kuda basam libuka bobana ati, tuku deice bikbik abuka ban ning, el si kereta kuda, aning deice tikuka, balamik yin nang ara, lima puluh (50) nanguk, tuba kam ulamik. Tonda, ninye olban talak ara, tuku bisik deice binarye, ninye ona ning, el si kereta kuda perang ara, sepuluh (10) tuba awamuk. Yuk ning nirya ara, pia kum danamuk. Tonda, Raja Yoahas, el yin talen nang yupa ara, sepuluh ribu (10.000) nanguk tuba ulamik. Sik yuk yin talen nang nirya ara, Samaria tam taleamuka deiyoknye, Raja Hazael birye obuka, sirya dakamuka deice arye, ninye arye, tuku sung-sunga yanilamaka atonun, ubuka omukce, sirya daklamukba, Israel tam yin talen nang ara, kum danin balamukce, mitik anunuk tuba kam ulamik.
8 Ura, Raja Yoahas bira, ninye deiyoknye kibuka, taleamuk talak arye ulamuk ning ap, pia pi dobuka, mikip weik tonun arye, pil dolamuk ning ap, yupu nyalamuk ning ap nirya ara, Israel yala ninye ati, ninye deiyok kibuka, talilamik Raja-Raja nang, si sekelilamik buku noutamuk sekdeibik. Ura, Raja Yoahas bira, Israel tam taleamuk talak noutam arye, pil dolamuk ning ap, yupu nyalamuk ning ap, aning nirya, akunum winibukopura, yuk nang arye, buku sekdeibik. Abuku si ara, ‘Sejarah Raja-Raja Israel,’ nyabukabikce, sekdeibik. 9 Raja Yoahas akunum dibukopura, Samaria mutuku noutamuk weibik. Weibikopura, Yoahas el pununa ati, Yoahas birye deiamuk mi, el si Yoas,b el li biti punubukce, ninye deiyoknye kibukabukce, Israel mutuku ap, anoutam ulamik ninye ati, taleamuk.
Raja Yoas birye, Israel tam taleamuk ning ati, sekik yupu
10 Anye Raja Yoas bira, el li Raja Yoahas ulamuk. El li Yoahas dibukba punubukce, keting tamun enam belas tahun (16) deice, Israel tam ulamik ninye talena ati, Samaria mutuku noutam ulamukce, ninye deiyoknye Raja kibuka ulamuk. Yoas birye, deiyok koubuka, Raja tikuk talak ara, Yehuda mutuku noutam ulamik ninye taleamuknye, el si ton Yoas ulamuka ani, keting tamun tiga puluh tujuh (37) akunum kibukopura, Israel tam talinanye, Raja Yoas birye, ninye deiyoknye Raja kibuka, Israel tam taleamuk.
11 Bukni, Raja Yoas babye, malye ning pia weik winilamuk. Ara, ninye si Nebat, elce deiamuknye, Raja Yerobeam birye, Israel yala ninye deiyoknye kibuka taleamukce, malye ninguk talibuka winilamukba, sik Israel ninye eibikce, sik babye malyeuk winilamik touk, Raja Yoas babye, Israel yala ninye deiyoknye kibuka taleamukce, malye weik winilamuk. Ara, Allah Yahweh el kanye ara, ‘Aning ara, malye ninguk,’ tenelamuknye, Raja Yoahas bira, aning talibuka, malyeuk winilamukba, sik Israel ninye babye malyeuk winilamik. Amalye ulamik ning ara, el babye batakna kumce, tuba pia malyeuk winilamuk.
12 Ura, Raja Yoas birye, ninye deiyoknye kibuka, Israel tam taleamuk talak arye winilamuk ninguk, pia pi dobuka, mikip arye pil dolamuk ning ap, ninye deiyok yupu nyalamuk ning ap, el Yoas birye, Yehuda mutuku ulamik ninye talibuka ulamuknye, Raja Amazia biti, yanuka obuka, sirya dakamuk ning ap, aning nirya ara, Israel yala ninye ati ninye deiyok kibuka, talilamik nang arye, winilamik ning ati, si sekelilamik buku noutamuk, yanuka sekdeibik. Abuku si ara, ‘Sejarah Raja-Raja Israel,’ nyabik. 13 Yoas akunum dibukopura, Israel mutuku ulamik ninye deiyok kibuka, talilamik Raja-Raja nang dipnaba, binuka weilamikakuk, binuka weibik. Winibikopura, Yoas el punubuka Raja una ati ara, Yoas birye deiamuknye, el si Yerobeam Keduac Raja tikukce, Israel tam ulamik ninye ati taleamukce, Raja ninye deiyoknye ulamuk.
Elisa dipnamuk talak, nyabuk yupu
14 Elisa dipnamuka ati, uk dilamuk talak ara, Israel ninye, sik ninye deiyoknye Raja Yoas yayukce, “Naio, na nio, an dipminyopura, nunda yata wiripnamsil do? Nun Israel yin nang arye, nun mal olan nang olbana ati, kuda basam balye tam bukuka balamap ning ap, nun kuda basam arye, kirikuka tuku deice balamle ning, kereta kuda ap ara, yata wiripnamsil do? Dipminyopura, ance kum melipnamsilama ati, nun ilil upsile,” nyabuka yanuka engebuk.
15 Nyabukba, Elisa birye Yoas biti, “Yin ap, mal ap, doproplyame,” nyabukura, Yoas birye doprobuk. 16 Israel sik deiyoknye Yoas biti, Elisa birye nyabuk. “An mal dopropnulyame,” nyabukura, doprobuk. Doprobukce, adiparyuk Elisa el taruk ara dobuka, Raja Yoas el taruk tatang deice deibuk. 17 Winibukce, “Keting yangan tam jendela ara, kukeipnulyame,” nyabukba, kukeibukba, Elisa birye Yoas biti, “Amal dobuka, keting yangan tam doplyame,” nyabukura, dobuka dobuk. Dobuk talak ara, Elisa birye nyabuk. “Amal ara, nun ni Allah el si Yahweh arye, sik Aram ninye obuka, sirya daknamala ati, amal ara Allah arye, lak kipdeipkile. Allah arye, melipkiliba, ance Aram mutuku ninye opmince, mutuku si Afek mutuku dam ara, Aram mutuku nang nirya ara, obuka sirya daknamalame,” nyabuk.
18 Aning akunum nyabukopura, Elisa birye Israel ninye, sik deiyoknye biti, ayupu ton nyabuk. “Aupmal mal ara, dobuka tuku deice deiplyame,” nyabukura, Raja Yoas birye, like winilye arye, tuku deice deibuk. 19 Winibukura, Allah el pil dolamuknye, Elisa pia yu ubukba nyabuk. “Dipkoprop ara, like pamubarye atonun, nakub barye atonun tukwak optum toura, Aram nang ati nirya obuka, akunum sirya daktumce, sirya daktume. Bukni, aning kum winiplama ati ara, like winilye sum bimince, Aram ninye opnamalam bukni, sirya kum daknalame,” nyabuk.
Nyabukopura, daulamdika ani, aminyan talak Elisa akunum dibukba, bobinuka weibik.
Yuk mutuku nang arye, Israel nang ati, olyangalamik yupu
20 Atalak ara, Israel ninye sik mal olan nang, Moab mutuku nang arye, ‘Israel nang opnuyap’ tenen, aketing tamun, aketing tamun nirya ara, amutuku anang ara, wa winiryuk wibuka kouna ati, deiyok koubuka koulamik talak ara, olyangalamik. 21 Winilamik touk, tonok talak ara, Israel nang arye, sik kwit dipmokba, weilbiyik talak ara, talye karin arye, sik mal olan nang, Moab nang yanganmekba, eibikce ilil ubukba, adiparyuk sik Israel nang ara, adipmoknye, el nong dobuka, mince Elisa weiamik keil deiya pum tam dongoplobikce, bikbik abuka bindobik. Winibikura, dipmoknye, el nong Elisa yok bol pibukopura, adiparyuk adipmoknye, el nong dobuka, keil deiya pum tam dopkwetepmiknye, kam bukukce, tikuka biyuk.
22 Aram mutuku taleamuk ninye deiyoknye, el si Hazael birye, sik Israel ninye ati, tuba-tuba olyangalamuk. Ara, Israel ninye sik Raja, Yoahas birye taleamuk talak nirya ara, sik mal olan nang taleamuknye, Raja Hazael ap, el tam nang ap arye, Israel nang ati, pia olyangalamik.
23 Winilamik bukni, Allah el si Yahweh arye, Israel ninye ati, bico tenelamuka anya arye, elce melilamuk bukni, sik Aram ninye arye, onauk ulamikba, Israel ninye nirya kum obuka, sirya dakik. Aning atonun, atalak arye, diprongobuka anoutam yangalamik talak nirya ara, Allah el si Yahweh arye, Israel ninye ati, pia kalikuka melilamuka ani, anang ati kum tamubuka, yuk mutuku nang arye, Israel ninye olamik bukni, min kum obuka, sirya dakamik.
Atalak ara, tuba kam unyake. Tonda Allah arye, tuba melilule. Deiyok ara, minop talak Allah arye, wenyamuk nang, Israel sik apu yapu Abraham ap, Isak ap, Yakub ap ati, “Wininamlulume, Winipmunyopura, narye tuba kalikuka melinamsine,” nyalin yupu nyapdeiamuk. Ayupu nyapdeiamuk ning ara, tuba aubuka ati, Israel ninye pia kum bataklamuk. Allah arye, ‘Anang ara, na dam tuba yanganamake,’ tenesulule.
24 Aminyan talak Aram mutuku nang taleamuknye, Raja Hazael dibukopura, el mi Benhadad bira, elti, punubukce, Aram ninye taleamuk. Raja Hazael birye, Aram ninye taleamuk talak ara, Israel ninye ulamik mutuku noutam mitik weik arye, obuka sirya dakukce, anyasik-anyasik ap, amutuku-amutuku ap, weik arye, dololamuk. Anyasik nirya dololamuk talak ara, Israel sik Rajanye, Yoahas ulamuk.
25 Bukni, Yoahas el mi Yoas birye, elti, punubukce, Israel ninye taleamuk. Yoas birye Israel ninye taleamuk talak ara, Hazael el mi Benhadad biti, like winilye arye, el dam binuka, obuka sirya dakuk. Obuka sirya dakukopura, Benhadad minop arye, dolamuk anyaik nirya ara, tuba tonap, Yoas birye dobuk. Anyaik-anyaik nirya ara, Israel ninye aik anya arye, tamubuka dobuk. Anyaik nirya ara, Yoas el li Yoahas, Israel ninye taleamuk talak, Aram mutuku nang arye dolamik bukni, Yoas birye, Aram mutuku nang obuka kum danaibukce, tuba ton dobuk.