2 Ninye deiyoknye Raja Yoas bira, Israel tam taleamuk keting tamun nirya ara, teleb ubuka ulamuk. Ara, Allah Yahweh, el kanye arye, ‘Aning ara, telebe,’ tenelamuk ning ara, imam Yoyada birye, Raja Yoas biti moubuka peteryamukba, bikamukce, teleb ubuka ulamuk. 3 Bukni, ninye deiyoknye Raja Yoas, el babye isa si erena ati, domba ato ning obuka boyana arye, uku dongobuka, erelamik aik nirya ara, ulubuka kum daklomuke. ‘Amalye ning nirya, kum daneipnamne,’ kum tenelamuk anya arye, sik Israel mutuku noutam ulamik ninye nirya ara, isa si erena ati, tuba opnarye, uku dongobuka arena ap, ‘Isa arye, nun moron yupu kekenamsiyak’ tenen, siltong teleb ning uku dongona ap, tuba arelyangalamik.

4 Raja Yoas birye, Israel mutuku taleamuk talak ara, tonok sum arye, Yoas birye sik imam-imam nang nirya ati yukubuk. Yukubukopura, “Allah Yahweh si erena ati, pia lek teleb aik boyanuka, arena pia teleb ning, yo bok do, dekna weik keil uang do, aning ara sikce bobinuka, Allah ati arelyanganyak, yo bok ara, moubuka bulupmunce delinamlume,” nyabuk. Ara, Allah Yahweh, el si eren aik wekelbana ati, dekna yo bok, pajak nyalamakto ning ati do, sik kanye aryuk talye arelamak ning do, sikce, ‘Na ni Allah ati winipnamnarya,’ nyalin yupu deice arye, arelamikce ning babye, bulupmunce, moubuka delinamlume,” nyabuk. 5 “Tonda, anggun imam-imam nang nirya ara, ninye arye boyasikirye, arenamsiyak ning nirya, moubuka dolonamlume. Aning nirya boyanamak yo bok, anggun imam-imam nang arye, moubuka deiamunye noutam arye, Allah Yahweh si eren aik noutam ulubuka dauamliba, malye tuba upmalye ning ara, ayo bok arepmunba, ayo bok arye, sik kel nang arye, aning nirya lipsisikuka donamake,” nyabuk.

6 Raja Yoas birye nyapdeibuk bukni, daulamika ani, Raja Yoas birye, amutuku taleamuka ani, keting tamun tahun dua puluh tiga (23) akunum ubukopura, sik imam-imam nang arye, Allah Yahweh, el aik noutam lipsisikuka dopmatu ning ara, tuba malye wamtu ning ara, min kum lipsisikuka dopnamtinge. 7 Ati ara, ninye deiyoknye, Raja Yoas birye, Imam Yoyada ap, sik Imam-Imam yuk nang ati yukubukce, nyabuk, “Deiyok yata ati, Allah Yahweh el aik ara, kum lipsisikuka dopnamlum do? Ati asum deiyok koupmunce, oupnamle talak ara, yuk nang arye, yo bok boyanuka, Allah ati arelyanganamak ning ara, aning tonap tabakuka dolona meme. Israel ninye, Allah Yahweh, el aik lipsisikuka dona ati, arenamak yo bok nirya ara, anggun bidamnye, anggun patan ning dekna ati, kum dolonamlume. Allah si eren aik lipsisikuka dona atibuk, dodopmunce, lipsisikuka don pil ati, dekuka punupnamlume,” nyabuk.

8 Nyabuka ati ara, sik imam-imam nang nirya arye, yupu talibikce, “Yo telebe. Amutuku noutam unyak ninye nirya arye, Allah aren ati, yo bok ara, bulubuka delinamak noutam arye, nun ton bokuka kum dolonamabe,” nyabik. “Tonda nun imam-imam nang aryuk, Allah Yahweh si eren aik noutam ulupmanto upmalinye birye, lipsisikuka kum dopmanto unamabe. Yuk nang aryuk, apil ara donamake,” nyabik. 9 Ati, imam Yoyada, elce tonok marikna yo doprobukce, ayo marikna el bublan deice tam ara, mitik bisik botobuk. Winibukopura, Allah Yahweh si eren aik wekelbana ati, bisik bublan urasin dam bukni, Allah arena ati, pala keil yangapdeibikak, el si mesba dam, sirik tam deibuk. Winibuka ati, Israel tam ulamik ninye nirya ara, Allah arena ati, yo bok boyangalamikba, sik anyaik kalekin imam-imam nang arye, ayo bok nirya ara, dololamikce, adiparyuk ayo marikna pum bisikuk dongolamik.

10 Winipnin balamika ani, asum-asum nirya ara, ayo marikna pum noutam dongolamika ani, ayo bok pia weik ubukopura, ninye deiyoknye Raja, el melina ati sekna deiyoknye sekretaris ap, imam-imam nang, sik ninye deiyoknye ap yanarye, neika ayo bok nuklamdik. Nuknopura, ayo bok nirya moubuka kitibukapnarye, karung pum ton delilamdik.

11 Winibuka daulamdika ani, aminyan talak ara, yupu nyana deiyoknye birye, Allah si eren aik lipsisikuka, pil dona deiyok kibuka ulamik nanguk arelamuk. Arelamukba, sik adeiyok kibuka ulamik nang arye, sik talye pil don nang ati, bokuka yuk-yuk arelamik. Ara, sik yo cakan nang ap, yo dobuka aik abilinga ap, aik nong ap, dolamik pil don nang ap, urasin teleb keil memepnarye puturuka pil don nang ap, tonda akeil-akeil nirya dukdongobuka, mot lelelin pil don nang ap ati, arelamik.

12 Tonda, aning nirya, sik imam-imam nang, sik ninye deiyoknye ap, Raja melina ati, surat sekna deiyok nang sekretaris ap arye, ayo bok nirya nukuka sekdopneura, sik anyaik dona ati, yo cakuka deiamik ning ap, urasin teleb keil memebuka deiamik ning ati, dekamdik. Tonda, anyaik pum tam, malye upnukce ati, yate pil lipsisikuka dona ati do nirya, abitinye nang arye, abulubuka delilamik yo bok bokukaprikce, Allah si eren aik, lipsisikuka don pil dekna ati, apil-apil deiyok nang ati, arelamdik.

13 Bukni, sik Israel ninye ara, Allah si eren aik dam boyanamikce, ayo marikna pum delilyangalamik yo bok ara, anyaik lipsisikuka, pil don atibuk arelamdik. Yuk ning weik tonun, ton deklamik bukni, ayo bok deice arye kum dekamdik. Anya arye, Allah Yahweh si eren aik pum uamuk ning, yate ning do nirya ara, ayo bok deice arye, kum deklamdik. Ara, mek makau atonun ning, cangkir perak nyanyak ning ap, weisa una ati, kintinip deibik ning ap, taruk mek likna ati, kintinip deibik mek makau loyang atonun ning ap, ninye yukuna ati, lelim nyan ning, el si terompet ap, tonda, aning-aning nirya, dekna weik ning emas do, perak do, aning arye puturubuka delilamik ning, yala nirya ara, ayo bok deice arye kum deklamdik. 14 Allah si eren aik dam, marikna yo pum dongolamik yo bok nirya ara, adiparyuk Allah el aik lipsisikuka, pil dona deiyok kibuka ulamik nanguk, sik dengna arelamik. Tonda, anyaik dona ati, deiyok kibuka ulamik nang arye, anyaik dona ati, patapne ninguk deklamik. Yuk talye ning ton pia kume.

15 Allah si eren aik lipsisikuka pil dona ati, yupu nyalamik deiyok kibuka ulamik nang ara, sik pia teleb aryuk, pil dolamikba, yuk deiyok nang arye, “Winipnamlume,” nyabuka, laka nyan yupu ton, kum sekuka arelamik. Deiyok ara, apil dona ati, deiyok kibuka ulamik nang arye, pia diksukumuk pil dolamikce, sikce, ‘Winipnamabe,’ nyalamik touk, aninguk winipnin balamika anya arye, yuk deiyok nang arye, “Ayo bok dobuka, aning-aning nirya dekemunye ning ara, lilibuka surat sekdumunce, nunti arepsumunba, laka nyanamsulume,” kum nyalamik. Ato ning ara, pia kum morolamik. 16 Bukni, sik Israel ninye nirya ara, ‘Allah arye, nun malye ulamupu ning namin kibuka, teleb kipdeipnamsil’ tenen, arelamikba, sik imam-imam nang arye, ninye kam ning obuka, uku dongona ati, punubuka dongolamik yo bok ap, tonda ninye, sik malye upmakce ning ati, ‘Allah arye namin kibuka, kum daneipnamsil’ tenen, yanuka kam ning obuka, uku dongolamik talak arye dongopmakce, yo bok ara, ayo marikna pum, pia kum dongolamik. Amambul weik pil bitinye ati, arelyangalamik yo bok nirya ara, arelamikba sik imam-imam nang aryuk, sik patan ning dekna ati, dololamik.

17 Ura, sik imam-imam nang arye, apil nirya dolamik talak noutam ara, Siria mutuku taleamuknye, Raja Hazael birye, ‘Anye opnirye, amutuku alupdopnamne’ tenen, el olbana ati, Kat mutuku noutam mal olalbiyik. Biyukopura, sik Israel mutuku noutam bukni, Kat mutuku obuka, sirya dakukce, amutuku noutam uamuk ning nirya, alubuka doprobuk. Winibukopura, adiparyuk tamubuka, ‘Yerusalem weik asik, kota nirya ara, opnirye sirya daknamne’ tenen, kintinibuka biyuk. 18 Winibukopura, Israel tam taleamuknye, Raja Yoas aning kekebukopura, minopce apil dobuk. Ara, ninye deiyoknye, Raja Yoas birye, sik minop talak ulamik Raja-Raja nang arye, Raja Yosafat ap, Raja Yehoram ap, Raja Ahasia ap, sik amutuku talilamik Raja nang arye, ‘Nun na’ tenen, delilamik ning yanuka, bulubukabukce, doprobuk.

Ara, aRaja-Raja nang arye, ‘Adekna weik ning ara, nun ni Allah, el ninguk unamle’ tenen, nun ‘Na’ tenen, delilamik ning nirya, bulubuka deibuk. Tonda, el babye, Raja Yoas birye, ‘Allah el ning tenelamukce, ‘Na’ tenen ati, deililamuk ning babye, doprobuk. Tonda, Allah Yahweh si eren aik ap, amutuku Raja aik ap, anyaik bitinye pum delilamik dekna weik ning, emas ara, Raja Yoas birye, aning nirya bulubukce, doprobuka deibuk. Winibukopura, Yoas birye bulyamuk ning nirya, Raja Hazael el kanye delina ati, dopdeibuk. Dopdeibukba, Raja Hazael birye, aning nirya eibukopura, ‘Yerusalem mutuku noutam unyak ninye nirya ara, kum olbinamne,’ tenebukce batakuk. Ati, Yerusalem mutuku kum olalbiyik.

19 Ura, Raja Yoas birye, Israel tam taleamuk talak arye, pil dolamuk ning ap, yupu nyalamuk ning ap, aning nirya akunum winibukopura, yuk nang arye, buku sekdeibik. Abuku si ara, ‘Sejarah Raja-Raja Yehuda,’ nyabukabikce, sekdeibik. 20 Tonda, ninye deiyoknye Raja Yoas, el amu tam yin talena deiyok nang nirya arye, “Nun deiyoknye Yoas nyalul yupu ton, kum kekenamabe. El ti obuka, sirya daknamabe,” nyabuka, yupu talipmek. Ara, mutuku si Bet-Milo dam arye obik. Aning ara, Sila mutuku bisik koulukuka, ban sukum arye obik. Raja Yoas binyak opdik nang ara, Raja Yoas, el yupu melin nang ulamdikba, Yoas bira, ‘Anang bitinye ara, teleb nang ururake,’ tenelamuk bukni, sik Simeat, el mi Yozakar ap, tonda Somer el mi Yozabad ap arye, Raja Yoas opdik.

21 Weik ninye deiyoknye, Raja Yoas akunum opdikopura, el nong dobukabikce, ninye deiyoknye, Raja Yoas palina ati ara, el apu yapu tuku luklamik sukumuk, Raja Daud el mutuku noutam bukni, ninye deiyok nang, sik Raja-Raja nang dipnaba, bobinuka weilamik sukumuk, Yoas babye lukik. Winibikopura, Yoas el mi Amazia bira, el li pununa ati, wibuka erepdeibikba, el Amazia bira, ninye deiyoknye, Raja kina ati tikukabukce, deiyok kibuka, amutuku talibuk.