Allah el si eren aik dona ati, Raja Salomo birye aning-aning nirya, kintinibuk yupu
5
Ura Tirus mutuku taleamuknye Raja Hiram bira, tuba-tuba Raja Daud ap kanye deipdanamdik ati, yuk nang arye, “Raja Daud el dolamuk pil yok pununa ara, el mi Salomo anyuk tikmale,” nyabikba kekebukce, Raja Hiram birye el melin nang dopreibukba, Salomo dam nyalbiyik. Biyikce, “Nun ni Hiram birye, anda Raja kipmalama ara, ‘Telebe,’ nyapmakile,” nyabuka nyalbiyik. 2 Tuba tamubuka Salomo dam yayikopura, Salomo birye el ka koproba Hiram biti tamubuka yupu nyapdeibuk. 3 “Ance akunum kel kiplume. Na ni koproba Daud bira ninye deiyoknye Raja ulamuk talak ara, ‘Allah Yahweh, el si eren ati, aik doptinye,’ tenelamuk bukni, kum dopmanto ulamuk. Deiyok ara, dana-dana tam ninye arye, ‘Israel ninye obisipnamabe,’ tenelamikce, Daud dam olyangana uk ulamika ati, na ni anyaik kum domuke. ‘Aminyan talak ara, Allah el si Yahweh, el melipnilya deice arye, na mal olan nang nirya ati, narye obuka sirya dakniba, na amu tam akunum ubicopura, anyaik dopnamnarya,’ tenelamuk. 4 Utenelamuk bukni, wini talak ara na Salomo birye nyapkine, na si erenun Allah, el si Yahweh arye meilyamnuk deice arye, akunuma. Mutuku-mutuku nirya unyak ninye arye, nun ton kum olyanamsiyake. Wini talak ara, nun ap olalamupu nang ton kum unyake. Wini talak ara, ikin weik ning ap, yuk kanye imun ning ap ton kum upmasile. Talye mangkau kanye bobuka unyabe.5 Aning ati ara, Allah arye na ni koprop Daud biti akunum nyapdeiamuk touk winipnamne. Allah el si Yahweh arye, sisinanye Raja Daud biti nyapdeiamuk. “An mi tonoknye bira, an pununa ati, wipdeipnirye Raja tikeipnamne. An mi tiklirye Israel ninye talipnamle talak nirya ara, asukumuk na si eren aik dopnamnile nyabuk.” Allah arye, na ni koproba Daud biti nyabuka ati ara, wini talak narye tenepmana ara, na ni Allah el si Yahweh, el si eren aik dopnamne. 6 Ati ara na kwit koproba Hiram, ance nyapdeipminba, an mutuku nang ara, weik cang kat yo, el si ara aras yo, Libanon mutuku noutam arye wibikirye boyanuka, apil donamake. Atalak ara, na mutuku nang ap, an mutuku nang ap, neika pil donamake. Pil donamaka ati, sik dekne ning arenamne. Ance, ‘Winibuka arena telebe,’ nyapminye ninguk arenamne. Na kwit an kele, an mutuku nang sik Sidonia tam nang ara, yo cakna kel weik nang unyake. Na mutuku nang mitik anun aryuk kel bikamik bukni, Sidon mutuku nang ara, weik kel nang unyake. Ati, ‘Anang arye melipnamak’ tenen, moropkine.” Raja Salomo birye nyabuka, asurat sekuka Raja Hiram dam dopdeibuk.
7 Dopdeibukba, Raja Hiram asurat eibukopura, kanye deibukce nyabuk, “Allah el si Yahweh arye, min arye ulamuknye Raja Daud biti, weik kel mi akunum arebukba, amutuku-amutuku nirya ap, Israel ninye nirya ap, teleb ubuka talipnamle. Kel weik biklirye unamle. Ati ara, nun ni Allah ati, ‘Telebe’ nyapnamabe,” nyabuk. 8 Nyabuka kanye deibuka ati ara, Hiram birye surat sekuka Raja Salomo dam dopdeibuk. Asurat deice arye nyabuk yupu ara, ani.
“Na kwit Raja Salomo, ance sekeipmanilam yupu ara, akunum yinibuka bikmane. Ance moropmanilam touk melipnamkine. Ara, kat weik yo cang ning, el si ara sanobar yo ap, tonda cang yo, el si ara aras yo ap, webuka kintinipnamkiyabe. 9 Narye nyapdeipniba, na mapu arye Libanon mutuku welebikirye ayo webuka bobikirye, koulukuka yanamake. Koulukikirye weik laut mekwen kup-kup tam boyanamake. Winibikiba, ayo neika deibibirye, tapu arye koubipyopura, laut mekwen deice deibibiba, amekwen deice bobana ati, ance nyapmasilam ninguk ayo kirikuka delilbinamabe. Dopdeibibyopura, tapu yokikirya, ayo yuk-yuk lelebuka deibipyopura, an tam nang arye ayo dobuka bobinamake. Tonda, narye moropnukin ning ara, kekebuka melipnamnilame. Ara, na Raja deiyoknye ununa ati ara, na aik unyak ninye nirya ati, sik din ning kintinibuka arenamsilame. Akunum nyapkine,” nyabuk. Nyabukce, surat sekuka Raja Salomo dam dopdeibuk.
10 Ura, Hiram apil dolamuka deice arye, Salomo patalamuk touk, weik cang kat yo, aras yo ap, sanobar yo ap, weik arye toubuka arelamuk. 11 Aryamuk bukni, Salomo birye el ka Hiram biti, din ning el si gandum pia weik arye arelamuk. Ara, Hiram el aik unyak ninye sik din ning ati, empat ribu empat ratus kilo (4,400 kg) din ning el si ara, gandum libuka arelamuk. Tonda, yuk ning ton tabakuka areamuk. Ara, zaitun yo duk teikuka purubikba, minyak mekintinibuk ning ara, 440 liter areamuk. Tonda, Raja Salomo birye aning-aning arelamuk touk, aketing tamun, aketing tamun nirya, Hiram biti pia tuba arelbalamuk. Ara, Allah el si eren aik dolamik talak arye, dukdongobuka tuba arelamuk.
12 Ura, atalak ara, Allah el si Yahweh arye, ‘Aning ara wininamake,’ nyapdeiamuk touk, Raja Salomo biti weik kel bikna deiyok ning areamuk. Tonda, atalak nirya, Raja Salomo ap, Hiram ap kanye deipdarikce, teleb ubuka neika pil dolamdik. Sik mutuku nang ara, pia kum olalamike. Winilamdika ati, sik bitinye ara, ‘Olana kumce teleb kanye bobuka neika unamap’ tenen, nyalin yupu nyapdeipdarikce sekeipdarike.
13 Raja Salomo birye, ‘Na pil donamniak’ tenen, yupu nyapdeibukba, pil dopmanto nang yupa weik 30 ribu nang bulubik. 14 Bulubikopura, ‘Anang ara, Libanon mutuku pil dolbinamak’ tenen, ayupa weik bokeibukce, yupa yuk-yuk 10 ribu nang kintinip deibuk. Winibukopura, awala ara 10 ribu nang ton pil dolbiyik talak ara, ton 10 ribu nang ton yuk pil dolbiyik. Anang uk, tuba-tuba, awala-awala nirya atonun dolilamukba, 10 ribu nang pil dolbalamik. Winilamika ati, Libanon mutuku ara tonok wala deice arye, pil dolbalamika ani, tuba tamubuka sik mutuku yayikce, wala bitinye deice yanuka mapmeka ani, tuba tamubuka sik mutuku batakuka, Libanon mutuku tamubuka binuka, tonok wala deice ton pil dopra ulamik. Tuba-tuba winilbalamik. Tonoknye el si ara Adoniram, apil don nang sik deiyoknye ulamuk.
15 Tonda anyaik dona ati ara, Raja Salomo birye pil dona kel nang ton, yuk wibuka deiamuk. Ikin ning bolsusun nang ati ara, ninye yupa weik 70 ribu nang wibuka dopdeibuk. Ton nang ara, ‘Urasin teleb keil sekuka kintinipnamak’ tenen, ninye yupa weik 80 ribu nang ton wipdeibuk. Anang ara, mutuku dup deice pil dolbalamik. 16 Ura, apil don nang ara pia weik ati ara, anang sik pil deiyok kin nang ati ara, Raja Salomo birye yuk nang ton wipdeiamuk. Ara, 3300 nang wipdeibukba, anang arye sik yuk talye pil don nang ati, ‘Wininamlume, wininamlume,’ nyabuka, yupu bokolilamikce kaliklamik. 17 Raja Salomo birye, ‘Wininamlume,’ nyapdeiamuk touk, el pil don nang, sik urasin teleb keil sekne nang arye, weik mutuku pala weik keil bukamukak arye, kat teleb keil ara telepdeipnopura, yuk nang arye akeil dobuka urasin teleb kibuka kintinip deipna buk, yuk nang arye, aurasin teleb keil bobuka anyaik dolamikak boyangalamik. Akeil ara, ‘Allah el si eren aik, ayukumna atonun deibibirye, akeil deice arye, anyaik dopnamabe,’ tenelamikce apil dolamik. 18 Ati ara, Raja Salomo birye wipdeiamuk nang, kel bikna weik nang ap, Hiram wipdeiamuk nang ap, neika pil dolamik. Tonda, sik Gebal mutuku nang arye ton, yo ap, keil ap kintinibuka delilamikba, Allah el si eren aik dona ati, yuk nang arye aning bobuka anyaik dam boyangalamikba, anyaik dolamik.