Katapusan Na Mga Ambal Jacob Para Ta Mga Bata Din
49
Na Jacob i daw pamilya din naan gaistar ta Egipto, paumaw Jacob mga bata din na mama daw ambal din, “Magtipon kaw ki yaken tak isugid ko daw ino pa matabo ki kyo ta mabot pa na mga adlaw.2 Kyo na mga bata ko marani kaw di
daw mamati ki yaken na amay nyo na Israel.
3 Ruben, kaon na panganay ko na bata,
kaon keseg ko daw una ko na bunga.
Kaon pataod ta tanan na mga utod no
tak mas biskeg ka kaysa ki danen.
4 Dili ka kapegeng ta imo na kaugalingen
paryo ta biskeg na selleg ta baa na dili mapegengan.
Dili en kaon may datas na katengdanan bilang panganay
tak gadulog ka ta sawa ko
daw pagayyaan no nang kami i.
5 Simeon daw Levi, kyo na mag-utod,
pagamit nyo inyo an na ispada ta pagpatay.
6 Dili a maglabet ta inyo an na pagsapol.
Dili a man maglabet ta malain na plano nyo.
Tenged ta inyo na gilek, kapatay kaw ta mga ittaw.
Papiang nyo mga baka an aged masadyaan kaw.
7 Kyo yan silutan tak papatay nyo mga ittaw
ta subla nyo na gilek daw iseg.
Mga linai nyo magbelagay
daw maglapta man danen an naan ta lugar
ta mga linai ta inyo na mga utod.
8 Kaon, Juda, pirdien no imo an na mga kuntra.
Kaon yan dayawen ta imo na mga utod
daw danen magdemel ta tubangan no na magtaod.
9 Juda, kaon yan biskeg paryo ta lion na bata pa
na gatekeb ta ayep daw gabalik ta iya na taguan
daw ganegga na gapaunat-unat nang.
Kaon yan paryas ta lion na bai na ula may nangaas na magtublag ki kanen.
10 Kaon, Juda, naan ki kaon pirmi katengdanan na magdumala
daw magpadayon na naan ta imo na mga linai
asta mabot kanen ya na mag-ari gid ta tanan.
Kanen an tumanen ta tanan na mga nasyon.
11 Tama daw tambek gid mga tanem no.
Bisan magbanget ka ta asno no naan ta dayad na blagen ta ubas,
dili din man gyapon maubos ubas an tak sikad tama.
Bisan bino daw dega ta ubas na minog
ibunak no ta imo an na mga bayo,
dili man gyapon maubos tak sikad tama.
12 Dayad gid tubbas ta inyo na taneman ta ubas
na yon na pirmi minog lagen mata no an ta inem ta bino.
Tama gid na gatas alin ta imo na mga ayep
na yon na puti gid imo an na ngipen ta inem ta gatas.
13 Kaon, Zabulon, imo na lugar naan ta kilid ta dagat
daw imo na duungan limbengan ta mga sakayan.
Dlunan ta imo na basak kaabot asta ta Sidon.
14 Kaon, Isacar, paryo ka ta biskeg na ayep na asno.
Bisan may karga en na gasablay naan ta tudtod din, ganegga pa man gyapon.
15 Daw makita no na lugar na istaran no dayad na puayan,
maganyaan ka gid.
Yon na mag-agwanta ka nang na magpaulipen naan ta duma
bisan papas-anen ka danen ta beg-at
daw piliten ka danen na mag-ubra ta bellay.
16 Kaon, Dan, magdumala ta imo na mga linai
paryo man ta mga utod no na danen an magdumala
ta grupo ta mga linai ko na alin ki danen.
17 Kaon, Dan, iseg ka paryo ta bekkessan na dalitan na naan ta kilid ta agian
na mangagat ta tiked ta kabayo
na yon na mulog na gaayang-ayang ittaw na gasakay.
18 GINUO, gatagad a na luwasen a no.
19 Kaon, Gad, sulungon ta mga tulisan,
piro magbales ka ki danen na sulungon no daw pirdien.
20 Kaon, Aser, mag-ani ka ta pagkaan na sikad sabor
daw maalen na para ta mga ari.
21 Kaon, Neftali, paryo ka ta usa na pabuy-an
daw gabata ta dayad na mga tinday.
22 Kaon, Jose, paryo ta ila na tinday na asno
naan tengnged ta tuburan daw kilid ta bukid.
23 Mga manugpana gasulong ki kaon tenged pademetan ka danen
daw palagas ka danen ta pana.
24 Ula galiyas imo na pagpuntarya ta pagbales
daw imo na blukan pabiskeg ta Dyos
Na Makagagaem Na Pasirbian Jacob.
Kanen an Dyos na paumaw na Manugbantay
daw Bakod Na Bato Na Dangepan Israel
tenged pirmi gaamblig daw galuwas ki yaken.
25 Kabay pa na Dyos Na Makagagaem na pasirbian ta amay no,
magtabang kanen ki kaon
daw tagan ka din ta tama gid na mga kaayaran.
Pirmi dayad tubbas ta imo na basak tenged Dyos an
mag-atag ta uran, tun-og daw adlaw alin ta apaw
daw mag-atag ta waig alin ta dalem ta basak.
Malipay ka gid tenged Dyos an
mag-atag ki kaon ta tama na mga bata daw mga ayep.
26 Yaken na amay no, mga kaayaran na nabaton ko mas dayad
daw tama gid kaysa ta mga dayad na betang
na makita naan ta mga bukid daw mga bungyod na ula katapusan.
Kabay pa na iling tan man na mga kaayaran mabaton no
tak naan ki kyo na mag-utod, kaon ake na pinili.
27 Kaon, Benjamin, paryo ka ta iseg na ayam na sikad mangagat
na tanan na mga makita din, adlaw man o kilem, papatay din daw pakaan.”
28 Yon mga ambal ta iran na amay na para ki danen. Kada isya ki danen may mga bindisyon na igo gid ki danen. Dusi na bata Israel, danen an mga alinan ta dusi na linai ta nasyon na Israel.
Kamatayen Jacob Daw Paglebbeng Ki Kanen
29 Israel i gatugon-tugon naan ta mga bata din, “Dali a nang en mapatay. Daw mapatay a, naan a nyo ilebbeng tingeb ta alinan ko na mga kaapuan naan ta lebbengan danen ta kwiba naan ta uma Efron na Hetanen. 30 Kwiba an na lebbengan danen naan ta uma naan ta lugar na paumaw na Macpela naan dapit ta sennangngan ta Mamre na sakep ta Canaan. Kwiba an daw uma napalit en Abraham ki Efron na Hetanen para buaten na lebbengan. 31 Naan dya nalebbeng Abraham ya daw Sara na iya na sawa, daw Isaac man daw Rebeca na iya na sawa. Naan ko man dya nalebbeng Lea ya. 32 Uma an daw kwiba na naan ta uma papalit lolo ko na Abraham naan ta mga Hetanen.”
33 Pagtapos Jacob ta iya na patugon-tugon, pauntay din iya na mga batiis naan ta kattri daw ganegga daw nabugto iya na ginawa na yon man duma en kanen ya ta alinan din na mga kaapuan na gauna en.