4 Na natapos en mga inadlaw ta iran na pug-aw, Jose i gambal ta mga upisyalis ta Paraon, “Daw miad nakem nyo ki yaken, lingen nyo tuo ki Paraon, 5 ‘Kan-o i na dali nang en amay ko ya mapatay, paambalan a din na magpangako a na naan ko kanen ilebbeng ta lebbengan na naubra din para ki kanen naan ta lugar na Canaan. Daw pwidi nang, tugutan a no na miling a naan ta Canaan daw ilebbeng ko lawa din. Daw tapos en, malik a dayon.’”

6 Patugutan Paraon na manaw Jose para ilebbeng iya na amay aged matuman din papangako ta iya na amay ki kanen.

7 Gapanaw Jose i daw gakumpanyar man tama na mga upisyalis Paraon asta mga may datas na katengdanan naan ta palasyo Paraon daw duma pa na impurtanti na mga manugdumala ta bilog na Egipto. 8 Tanan man na pamilya Jose daw iya na mga utod asta mga panimalay ta iya na amay gakumpanyar man. Nabilin nang ta lugar na Gosen iran na mga bata daw mga ayep. 9 May mga gasakay ta kalisa daw gangabayo. Sikad gid tama na mga ittaw gakumpanyar.

10 Pag-abot danen dani ta linasan na naan ta Atad naan ta liyo ta Suba Jordan, gangasebe danen daw gaug-og ta sikad tudo. Gapug-aw danen Jose ta pitto na adlaw. 11 Na nakita ta mga Canaanen iran na pag-agal naan ta linasan ta Atad, ambal danen, “Segeng gid na kasebe ta mga Egiptuanen.” Yon tenaan na pangaranan na Abel Misraim^a lugar ya na naan dya danen gaug-og. Lugar ya na Abel Misraim naan liyo ta Suba Jordan.

12 Patuman ta mga bata Jacob iya na tugon 13 tak padala danen iya na lawa naan ta Canaan daw palebbeng danen naan ta kwiba na naan ta uma naan ta Macpela naan dapit ta sennangngan ta Mamre na papalit Abraham ki Efron na Hetanen para lebbengan. 14 Pagtapos lebbeng danen ta amay Jose, gabalik Jose an naan ta Egipto asta mga utod din daw tanan na mga gakumpanyar.

15 Na napatay en Jacob, mga utod Jose gambal, “Basi daw gademet Jose ki kiten daw males kanen ta tanan ta na mga nabuat kan-o na malain.” 16 Yon na may pasugo danen na miling ki Jose daw mag-ambal ta iling ti, “Bag-o napatay ate na amay, pasugo kay din na 17 ambalen nay ki kaon na daw pwidi nang, kami i na mga gasirbi man ta Dyos ta ate na amay patawaren no ta ame na sala ki kaon.” Pagmati Jose ta iran na tugon, gagal kanen an.

18 Mga utod din giling pa gid ki kanen daw galuod na gademel danen naan ta basak naan tubangan din aged magtaod. Ambal danen, “Daw pwidi, matian kay no. Kami i mga suguon no.”

19 Ambal Jose ki danen, “Dili kaw madlek. Dili ta kyo balesan ta malain tak Dyos nang may matareng an na magbales. 20 Kyo gaplano kan-o na magbuat ta malain ki yaken, piro Dyos an gaplano para ta kayaran ta tama na mga ittaw na danen an maluwas alin ta kamatayen. 21 Gani, dili kaw madlek. Iatag ko ki kyo daw naan ta inyo na mga bata na derse bisan ino na kinanglanen nyo.”

Iling tan pabuat Jose para ipasigurado din ki danen na kanen an miad ki danen man gyapon daw para magtawway iran na nakem.

22 Jose i daw mga utod din duma ta iran na pamilya padayon na gaistar naan ta Egipto. Gaidad en kanen ta sinto dyis na taon.

23 Bui pa kanen na natao mga apo Efraim ta buol. Mga bata Maquir na bata Manases pabaton din daw pakabig din man na danen iya na mga bata.

24 Gabot timpo na Jose i gambal naan ta iya na mga utod, “Dali a nang en mapatay. Piro, Dyos magpadayon ta pag-ubay ki kyo daw mabot adlaw na dleen din inyo na mga linai alin ta yi na lugar munta ta Canaan na pangako din pugya na iatag din ki danen Abraham, Isaac daw Jacob.” 25 Mga bata Israel na yon man mga utod Jose, paambalan Jose na danen an magpangako ki kanen. Ambal din, “Dyos an magpadayon ta pag-ubay ki kyo daw dleen kaw din naan ta banwa ya na papangako din. Magpangako kaw na dleen nyo dya mga bekkeg ko alin di.”

26 Na gaidad en Jose i ta sinto dyis na taon, napatay kanen an. Pabalsamo danen lawa din naan ta Egipto daw paugsak naan ta kabaong.