Pagpangamuyo Jacob Para Ki Efraim Daw Manases
48
Paglambay ta pila na mga adlaw, may gasugid ki Jose na gamasakit Jacob na amay din. Pakuyog Jose darwa din na bata na Manases daw Efraim na magsud-o naan ta iya na amay. 2 May gasugid ki Jacob na miling ki kanen bata din na Jose. Pagmati din, gadasig lawa din an. Gabangon kanen an daw gamungko naan ta iya na neggaan.3 Ambal Jacob ki Jose, “Dyos Na Makagagaem gapakita kan-o ki yaken naan ta banwa na Luz naan ta Canaan daw gapangako kanen na tagan a din ta mga kaayaran. 4 Naan dya gambal Dyos ki yaken na tagan a din ta mga bata daw patamaen din ake na mga linai daw danen an buaten din na bakod na nasyon na may tama na grupo ta mga linai. Ambal din pa na iatag din ki danen Canaan para iran na lugar ta ula katapusan.”
5 Ambal pa Jacob ki Jose, “Efraim daw Manases na mga bata no na natao unti naan ta Egipto bag-o a giling di, anduni kabigen ko na ake man na mga bata paryo ki Ruben daw Simeon. 6 Daw may mga bata kaw na matao pa na sunod ki Efraim daw Manases, dili ko kabigen na ake. Imo en. Mabaton danen iran na panublien alin ki Efraim daw Manases. 7 Na galin kay kan-o ta Padan-aram, bakod gid ake na kalised tak napatay Raquel ya naan ta ame na pagbyai munta ta Canaan naan dani ta banwa na Efrata. Palebbeng ko kanen naan ta kilid ta dalan na munta ta Efrata.” Efrata an paumaw man na Betlehem.
8 Na nakita Israela mga bata an Jose, insa din, “Kino ni?”
9 Sabat Jose ta amay din, “Yi mga bata ko na atag ta Dyos ki yaken naan ta Egipto i.”
Ambal Israel, “Papranien no danen an naan ki yaken aged bindisyunan ko.”
10 Dili makita ta usto Israel mga bata an Jose tenged mata Israel delem en tak manakem en kanen an. Yon na paprani Jose mga bata din an naan ta iya na amay. Pagprani ta mga bata Jose, patakes Israel daw paarekan danen an. 11 Ambal Israel ki Jose, “Salig ko na dili ta kaw en makita isab. Piro, dili nang kaon nakita ko. Tenged ta pagbeet ta Dyos, nakita ko man imo na mga bata.”
12 Pagtapos ta ambal Israel, pakamang Jose mga bata din naan kilid ta buol Israel. Galuod kanen an daw gademel na magtaod. 13 Paprani din isab mga bata din an naan ki Israelb daw paibitan din Efraim an ta tuo din na lima para Efraim naan dapit ta wala na lima Israel. Manases an a paibitan din ta wala din na lima para Manases naan dapit ta tuo na lima Israel. 14 Paunat Israel iya na blukan daw palambid din. Tuo din na lima patungtong din naan ta ulo Efraim bisan na kanen mangngod daw patungtong din man wala din na lima naan ta ulo Manases na magulang.c
15 Papangamuyuan Israel danen an Jose,
“Kabay pa na yi na mga bata tagan ta Dyos ta tama na mga kaayaran.
Dyos pasirbian ta lolo ko na Abraham daw amay ko na Isaac.
Kanen man gaamblig ki yaken ta bilog ko na kabui asta anduni.
16 Kanen angil na galuwas ki yaken alin ta tanan na mga malain.
Kabay pa na paagi ta yi na mga bata dili malipatan ta mga ittaw ngaran ko
daw ngaran man ta lolo ko na Abraham daw amay ko na Isaac.
Kabay pa man na patamaen ta Dyos iran na mga linai.”
17 Na gapangamuyo Israel, nakita Jose na patungtong Israel tuo din na lima naan ta ulo Efraim. Dili miag Jose an tak salig din na sala pagtungtong an ta lima ta iya na amay. Pawiran din lima an ta amay din aged isalyo inta naan ta ulo Manases. 18 Ambal din ta amay din, “Tay, dili iling san. Dapat betang no tuo no na lima naan ta ulo Manases tak kanen panganay ko na bata.”
19 Piro, dili miag amay Jose na isalyo tuo din an na lima naan ta ulo Manases. Ambal din, “Tong, nlaman ko daw ino pabuat ko. Mga linai Manases patamaen ta Dyos daw danen tauron ta mga ittaw. Piro, mangngod din na Efraim may mas datas katengdanan kaysa ta katengdanan Manases daw iya an na mga linai patamaen ta Dyos daw danen an buaten din na tama na mga nasyon.”
20 Iling tan pabuat Israel na pabindisyunan din mga bata an Jose na Efraim an patagan din ta mas datas na katengdanan kaysa ki Manases. Ta iya na pagbindisyon, ambal din pa,
“Daw magpangamuyo mga linai ko,
gamiten danen inyo na ngaran. Iling ti ambal danen:
Kabay pa na tagan kaw ta Dyos ta mga kaayaran
paryo ta pag-atag din ki Efraim daw Manases.”
21 Israel an gambal ki Jose, “Nlaman no na dali a nang en mapatay. Piro, Dyos an padayon na mag-ubay ki kyo daw pabaliken kaw din naan ta Canaan na lugar ta ate na mga alinan na kaapuan. 22 Naan ko ki kaon iatag dayad na basak naan ta lugar na Siquem, dili naan ta imo na mga utod. Yon na basak nakamang ko kan-o ta timpo ta gira kuntra ta mga Amornen.”