2 Pakuyog Jose limma din na utod daw papakala din naan ki Paraon. 3 Paraon an gainsa ki danen, “Ino inyo na pangabuian?”

Sabat danen ki Paraon, “Kami i na mga suguon no manugbantay ta mga ayep na paryo man ta ame na mga kaapuan pugya. 4 Giling kay naan ta Egipto aged unti kay magtinir tak segeng na letem naan ta Canaan daw ula en kan-enen mga ayep nay dya. Anduni, gapangabay kay ki kaon na daw pwidi nang, kami i na mga suguon no tugutan no na magtinir naan ta Gosen.”

5 Ambal Paraon ki Jose, “Tenged giling ki kaon imo na amay daw mga utod, 6 paistaren no danen an naan ta Gosen na pinakadayad na basak naan ta Egipto. Pilien no daw kino ki danen sagad magbantay ta ayep aged danen pabantayen no ta ake na mga ayep.”

7 Na natapos en isturya Paraon naan ta mga utod Jose, padala Jose amay din naan ki Paraon aged ipakala. Pag-abot Jacob naan ki Paraon, gapangamuyo kanen na Paraon an bindisyunan ta Dyos. 8 Gainsa Paraon an ki Jacob, “Pila idad no an en?”

9 Sabat Jacob, “Idad ko sinto trinta na taon. Lipo nang ake na kabui, dili paryo ta kabui ta kaapuan ko anay pa sa na sikad lawig. Sigi a nang salyo-salyo ta ake na istaran daw sikad tama na mga kabellay naageman ko.”

10 Pagtapos ta ambal Jacob, gapangamuyo kanen isab para ki Paraon daw galin kanen naan ta tubangan Paraon.

11 Papaistar Jose amay din an daw mga utod naan ta pinakadayad na basak ta Egipto na yon man lugar na Rameses^a paryo ta sugo Paraon. 12 Pirmi gaatag Jose i ta pagkaan naan ta amay din daw mga utod din asta en ta iran na mga pamilya daw tanan na mga gaistar ta iran na panimalay dipindi ta iran na katamaen.

13 Tanan na mga lugar ula en pagkaan daw mga Egiptuanen daw mga Canaanen nakulian daw galuya iran na mga lawa ta segeng gid na letem. 14 Naan ki Jose sigi palit mga ittaw an ta pagkaan. Patipon din tanan na mga kwarta naan alin ta mga Egiptuanen daw mga Canaanen na bayad danen ta pagkaan daw padala din kwarta an naan ta balay Paraon. 15 Na sigi danen palit ta pagkaan ki Jose, naubusan en ta kwarta mga ittaw naan ta Egipto daw Canaan. Tanan na mga Egiptuanen giling ki Jose daw gambal, “Tagan kay no ta pagkaan tak ubos en ame na kwarta. Daw dili kay no tabangan, mapatay kay ta letem.”

16 Sabat Jose, “Daw ula kaw en kwarta, dleen nyo ki yaken inyo na mga ayep aged balyuan ko ta pagkaan.”

17 Yon na padala ta mga ittaw naan ki Jose iran an na mga ayep na mga kabayo, mga asno, mga kanding, mga karniro daw mga baka. Pabalyuan din ta pagkaan mga ayep na padala danen. Bilog na taon, gasupurta kanen ta pagkaan ta mga ittaw balyo ta tanan danen na mga ayep.

18 Sunod na taon, giling mga ittaw naan ki Jose daw gambal, “Sir, gasugid kay ta matuod na ubos en ame na kwarta daw naan en ki kaon tanan nay na mga ayep. Ula en may nabilin ki kami na ibalyo nay pa ta pagkaan. Ame nang en na mga kaugalingen daw mga basak pwidi nay an ibalyo ta pagkaan. 19 Sir, tabangan kay no aged dili kay mapatay naan ta imo na tubangan daw ame an na mga uma dili man maimo na sagbetan. Paliten kay no daw buaten no imo na mga ulipen. Paliten no man ame na mga basak aged imo nang en. Tagan no man kami ta pagkaan daw binni aged dili kay mapatay daw may matanem kay naan ta ame na mga basak.”

20 Yon na gabligya tanan na mga Egiptuanen ta iran na mga basak ki Jose tenged ta segeng gid na letem. Tanan na mga basak naan ta Egipto iya en Paraon tak napalit Jose para ki kanen. 21 Tanan na mga ittaw naan ta bilog na Egipto pabuat Jose na mga ulipen. 22 Piro, mga basak ta mga pari ula din napalit tak danen an pasupurtaan Paraon ta iran na pangabui. Yon na ula pabligya ta mga pari iran an na mga basak.

23 Jose an gambal naan ta mga ittaw, “Mamati kaw. Anduni, napalit ko en kyo yan asta en inyo na mga basak para ki Paraon. Yi na binni iatag ko ki kyo aged itanem nyo. 24 Daw mag-ani kaw en, isya na parti iatag nyo para ki Paraon daw appat na parti inyo nang en aged may pangbinni kaw daw may pagkaan inyo an na mga pamilya daw mga sinakepan.” 25 Ambal danen, “Sir, miag kay na buaten no kami na mga ulipen Paraon tak kaon galuwas ki kami.” 26 Gamando Jose parti ta tanan na mga basak naan ta Egipto na ta limma na parti ta ani, isya na parti iatag para ki Paraon. Yon man na mando pasunod ta mga Egiptuanen asta anduni. Piro, mga basak ta mga pari ula napalit Jose para ki Paraon.

27 Israel na paumaw man na Jacob daw iya na pamilya gaistar naan ta Egipto ta lugar na Gosen. Gatama iran na mga pagkabetang daw gatama pa gid iran na mga linai. 28 Jacob an naan gaistar ta Egipto ta disi-syiti na taon asta na gaidad kanen ta sinto kwarintay-syiti na taon.

29 Na gabot timpo na nabatyagan Israel na dali nang en iya na kamatayen, papaumaw din Jose an daw ambal din, “Daw miad nakem no ki yaken, ibetang no imo an na lima naan dalem ta ake na paa^b daw magpangako ka ki yaken na tumanen no ake i na tugon bilin ki kaon. Daw mapatay a, dili a no ilebbeng naan ta Egipto. 30 Dleen no lawa ko naan ta Canaan daw ilebbeng naan ta lebbengan ta mga alinan ko na kaapuan.”

Sabat Jose, “Sunuron ko imo an na tugon.”

31 Ambal Israel, “Magpangako ka gid ki yaken.” Pag-ambal din, gapangako Jose ki kanen. Pagpangako Jose, gademel Israel an naan ta uluan ta iya na kattri daw gadayaw ta Dyos.