Pag-iling Jacob Daw Iya Na Pamilya Naan Ta Egipto
46
Jacob na paumaw man na Israel, kanen daw tanan na naan ta iya na panimalay gapanaw miling Egipto daw padala danen tanan na mga pagkabetang danen. Pag-abot danen ta banwa na Beerseba, gaiyaw kanen an ta mga ayep daw pasunog bilang alad naan ta Dyos na pasirbian man ta amay din na Isaac.2 Na kilem en, namatian Israel ambal ta Dyos paagi ta dagammo nang. Ambal ta Dyos, “Jacob, Jacob.”
Sabat din, “Ngaran sa?”
3 Ambal ta Dyos, “Yaken Dyos na pasirbian ta imo na amay. Dili ka madlek na miling naan ta Egipto tak naan dya buaten ko mga linai no na bakod na nasyon. 4 Dumaan ta kaw miling naan ta Egipto daw pabaliken ko imo na mga linai naan ta Canaan i. Daw mabot adlaw na mapatay ka, anen Jose ta kilid no.”
5 Galin danen Jacob ta Beerseba. Bag-o danen galin, kanen an papasakay ta mga bata din naan ta karo na papadala ta ari alin ta Egipto. Papasakay man danen iya an na mga apo na derse pa daw mga magad din naan ta duma na mga karo na alin man ta ari. 6 Padala man danen iran na mga ayep daw mga pagkabetang na napundar danen naan ta Canaan tak gasalyo Jacob an, mga bata din daw mga apo naan ta Egipto. 7 Tanan na mga bata din daw mga apo pakuyog din na munta ta Egipto.
Mga Linai Israel
8 Israel na paumaw man na Jacob, na giling kanen an naan ta Egipto gakuyog ki kanen iya na mga bata daw mga linai. Yi iran na mga ngaran:
10 Simeon daw mga bata din na mama: Jemuel, Jamin, Ohad, Jaquin, Zohar daw Saul. Inay Saul Canaanen.
11 Levi daw mga bata din na mama: Gerson, Coat daw Merari.
12 Juda daw mga bata din na mama: Er, Onan, Sela, Perez daw Zera. Piro, napatay Er daw Onan naan ta Canaan.
Mga bata Perez na mama: Hezron daw Hamul.
13 Isacar daw mga bata din na mama: Tola, Puva, Job daw Simron.
14 Zabulon daw mga bata din na mama: Sered, Elon daw Jaleel.
15 Yon mga bata daw mga linai danen Lea daw Jacob na danen an naan pa ta Padan-aram. Isya bata an danen na bai na ngaran din Dina. Tanan danen trintay-tris.
16 Gad daw mga bata din na mama: Zifion, Hagi, Suni, Ezbon, Eri, Arodi daw Areli.
17 Aser daw mga bata din na mama: Imna, Isva, Isvi, Beria, asta ta utod danen na bai na ngaran din Sera.
Mga bata Beria na mama: Heber daw Malquiel.
18 Yon mga bata daw mga linai danen Zilpa daw Jacob. Tanan danen disi-sais. Zilpa suguon na paatag Laban ta bata din na Lea.
19 Mga bata a Raquel na sawa Jacob darwa danen an na mama: Jose daw Benjamin.
20 Mga bata Jose na mama na kanen an naan ta Egipto: Manases daw Efraim. Danen an mga bata Jose ki Asenat na Egiptuanen na bata Potifera na pari naan ta banwa na On.
21 Mga bata Benjamin na mama: Bela, Bequer, Asbel, Gera, Naaman, Ehi, Ros, Mupim, Hupim daw Ard.
22 Yon mga bata daw mga linai danen Raquel daw Jacob. Tanan danen katursi.
23 Dan daw bata din na mama na Husim.
24 Neftali daw mga bata din na mama: Jaseel, Guni, Heser daw Silem.
25 Yon mga bata daw mga linai danen Bilha daw Jacob. Tanan danen pitto. Bilha suguon na paatag Laban naan ta bata din na Raquel.
26 Tanan na mga bata daw mga linai Jacob na giling naan ta Egipto sisintay-sais, piro ula labet ta bilang mga magad din na bai. 27 Darwa bata Jose natao naan ta Egipto. Tanan-tanan danen na giling naan ta Egipto sitinta.
Jacob Daw Pamilya Din Naan Ta Egipto
28 Bag-o mabot danen Jacob naan ta Egipto, pasugo din Juda an na muna ki danen na miling ki Jose aged plamen din Jose ya na sugaten din danen an naan ta lugar na Gosen. Pag-abot danen naan ta Gosen, 29 pasugo Jose mga sinakepan din na magpriparar ta iya na kalisa daw gapanaw kanen aged mugat ki Israel na amay din naan ta Gosen. Pag-abot din, gaprani kanen ta iya na amay daw patakes din daw lugay iya na agal.
30 Ambal Israel ki Jose, “Bisan na mapatay a anduni, malipay a man gyapon tak nakita ta kaw isab daw nlaman ko na bui ka pa.”
31 Ambal Jose naan ta mga utod din daw amay, “Miling a anay naan ki Paraon daw sugiran ko kanen an na gabot en mga utod ko daw tanan na pamilya ta amay ko alin ta Canaan. 32 Sugiran ko man na kyo yan mga manugbantay ta mga ayep. Padala nyo man inyo na mga karniro, mga kanding, mga baka daw tanan na mga pagkabetang nyo. 33 Basi Paraon ya mag-umaw ki kyo daw minsa kanen daw ino pangabuian nyo. 34 Yi sabat nyo ki kanen. Kyo na mga suguon din manugbantay ta mga ayep alin pa sa kan-o na bata kaw pa asta anduni na paryo ta inyo na mga kaapuan pugya. Iling tan ambalen nyo aged patiniren kaw unti Gosen i na madyo ta mga Egiptuanen tak nalainan mga Egiptuanen ta mga ittaw na manugbantay ta mga ayep.”