3 Ambal Jose naan ta mga utod din, “Yaken Jose.” Ambal din pa, “Bui pa ate na amay?” Piro, iya na mga utod ula kaambal tak nagulpian danen daw nadlek gid na Jose pla na gatindeg naan ta iran na atubangan.

4 Ambal din pa naan ta mga utod din, “Daw pwidi, marani kaw ki yaken.” Na gaprani en danen an, ambal din, “Yaken Jose na utod nyo na pabligya nyo kan-o na yon na padala a di naan ta Egipto i. 5 Anduni, dili kaw mangalised daw dili kaw man magilek ta inyo na kaugalingen tenged pabligya a nyo. Pauna a ta Dyos ki kyo na miling di ta Egipto i aged magluwas ta kabui ta mga ittaw. 6 Natapos en darwa na taon na letem naan ta lugar na i, piro may limma pa na taon na dili kauma daw dili man kaani. 7 Pauna a ta Dyos ki kyo na miling di aged ta yi na makatingala na paagi maluwas kaw ta letem daw dili man marwad inyo na mga linai.”

8 “Dili kyo gapadala ki yaken di. Dyos gapadala ki yaken di. Pabuat a ta Dyos na manugtugda ta ari daw manugdumala ta iya na balay daw manugdumala ta bilog na Egipto.”

9 Patudluan Jose mga utod din daw ino ambalen danen naan ta iran na amay. Ambal din, “Malik kaw dagli ta ate na amay naan ta Canaan daw sugiran nyo kanen ya na bata din na Jose pabuat ta Dyos na manugdumala ta bilog na Egipto. Pailingen nyo kanen ya di daw kinanglan giran din. 10 Pwidi kanen mag-istar naan ta lugar na Gosen dani ki yaken. Ambalen nyo na dleen din mga bata din, mga apo, mga karniro, kanding, baka daw tanan din na mga pagkabetang. 11 Naan ta Gosen iatag ko ki kyo daw ino inyo na mga kinanglanen aged dili maleteman inyo na mga pamilya tak mabot pa limma na taon na letem.”

12 Ambal pa Jose naan ta mga utod din, “Anduni, nakita nyo daw nakita man Benjamin na yaken gid en mismo gambal ki kyo ta ate na linggwai na Hebreo. 13 Sugiran nyo ate na amay parti ta datas ko na katengdanan naan ta Egipto daw tanan na mga nakita nyo di. Dasigen nyo muli naan ta Canaan aged kabalik kaw dayon na dala nyo ate na amay.”

14 Pagtapos ta ambal Jose, gatakes kanen an ki Benjamin na utod din ta inay daw gagal kanen an. Gagal man Benjamin na gatakes ki Jose. 15 Paarekan man Jose tanan din na mga utod daw gagal. Na gaisturya Jose ki danen daw paarekan din danen an, yon na gasalig en danen ki kanen daw ula en danen adlek na mag-isturya ki kanen.

16 Kalambot balita naan ta balay Paraon parti ta mga utod Jose na gabot daw nalipay gid Paraon asta mga upisyalis din. 17 Ambal Paraon ki Jose, “Ambalan no imo na mga utod na magkarga en ta iran na mga dala naan ta iran na mga ayep daw muli naan ta lugar na Canaan. 18 Daw malik di danen an, pakuyugon danen inyo na amay daw iran na mga pamilya na miling di ki kaon. Tagan no danen an ta pinakadayad na basak naan ta Egipto. Naan di makapagusto danen ta dayad gid na pagkaan na prudukto ta iran di na taneman na basak. 19 Ambalan no man danen an na magdala danen an ta mga karo alin ta Egipto para sakayan ta iran na mga sawa daw derse na mga bata. Pakuyugon man danen inyo na amay. 20 Dili danen manugon ta mga pagkabetang danen na mabilin naan ta Canaan tak mag-atag a ki danen ta dayad gid na mga betang naan ta Egipto i.”

21 Tanan na mga ambal Paraon pasunod ta mga bata Israel daw paatagan Jose danen an ta mga karo sunod ta sugo Paraon daw paatagan din man ta balon. 22 Kada isya ta mga utod din paatagan din ta bag-o na bayo. Piro, Benjamin an a paatagan din ta limma na bag-o na bayo daw tris sintos na bilog na pilak. 23 Padalaan din man iran na amay ta sampulo na asno na mama na may karga na mga dayad na mga betang alin ta Egipto daw sampulo na asno na bai na may karga man na trigo, tinapay daw duma pa na pagkaan aged daw malik danen naan ta Egipto, may balon pa danen an. 24 Na gapriparar en danen na manaw, Jose i gambal, “Dili kaw magbasulay naan ta dalan.” Pag-ambal Jose, papuli din iya na mga utod.

25 Gapanaw en mga utod Jose alin ta Egipto na malik ta iran na amay na Jacob naan ta Canaan. 26 Pag-abot danen, pasugid danen naan ta iran na amay na bui pa Jose ya daw kanen gadumala ta bilog na Egipto. Pagmati ta amay danen, gatanga gid kanen an tak nagulpian daw ula kanen gapati ta sugid ta mga bata din. 27 Piro, pasugid danen naan ta iran na amay tanan na mga ambal Jose daw nakita din man mga karo na papadala Jose para sakayan danen. Pagkita din ta mga karo, gapati en kanen an daw nalipay gid iya an na nakem. 28 Ambal Jacob, “Bui pa pla bata ko ya na Jose! Gapati aren en. Miling a dya ki kanen aged makita ko kanen ya bag-o a mapatay.”